Moris Defisiente ! Gomes Ho Família Na’in 7 Hela De’it Iha Baraka

SAPNewsTL, Ermera – Gabinete Prezidénsia Repúblika (GPR) liu hosi unidade servisu sosiedade sivil no apoia sosial fahe nesesidade bazika ba familia vúneravel sira iha Munisipiu Ermera, halo mos vizitasaun ba Paulo Gomes ne’ebe moris ho kondisaun defisiente iha nia moris fatin suku Lação.

Xefe Estadu Dr. Jose Ramos Horta liu husi Unidade Servisu Sosiedade Sivíl Assuntu Sosial (SSSAS) hala’o vizita ba família vúneravel Paulo Gomes ne’ebé moris ho kondisaun defisiensia durante tinan barak iha uma baraka ida, iha Suku Lação postu administrativu Atsabe munisipiu Ermera.

Vizita ne’e hanesan polítika Prezidente Repúblika nian ho espíritu pertense sosial, nune’e hatutan governu nia servisu atu reduz malnutrisaun no pobreza iha rai laran tanba númeru kiak ho persentagem 42% no Malnutrisaun ho 47%.

Vizita ne’e hodi hatan pedidu husi autoridade lokál Abrão da Conceição nu’udar xefe suku eleitu iha suku Lação ne’ebé akompaña no observa direta ba família ne’e nia moris, nune’e nia konvida Xefe Estadu liu husi Gabinete Sosiedade Sivíl no Apoiu Sosiál hodi bele haree direta ba komunidade sira.

Sefe Suku Abrão da Conceição hateten, durante nia sei hanesan komunidade baibain sempre preokupa ho familia vúneravel ne’ebe ema la preokupa, hafoin kandidata-an ba sefi Suku nia tau prioridade ba Paulo Gomes no nia familia sira.

“Ha’u hanesan xefe suku eleitu antes ha’u sei komunidade baibain preokupa tebes ba família ida ne’e nia moris tanba ha’u mos mai husi família ne’ebé simples no ha’u haree katak família ne’e vulneravel tebes no laiha ema ruma ne’ebé tau matan, hafoin ha’u kandidata-an tau mós prioridade ba katuas ne’e ho nia família sira”. Hateten Abrão da Conceição ba SAPNews iha nia knua Suku Lação, segunda 22/07/2024.

Xefe Suku ne’e mos aprezenta problema sira ne’ebe familia vúneravel ne’e enfrenta, iha ne’ebe hela iha uma baraka no lakon dokumentus familía nune’e difikulta sira hodi ba halo rezistasaun iha notariadu.

“Ha’u hanesan Xefe suku hakarak aprezenta mos problema balun ne’ebe família vúneravel ne’e enfrenta, sira hela iha uma baraka no lakon dokumentus família nian, nune’e difikulta sira atu bele halo registrasaun iha notariadu, maibé autoridade ne’e fasilita no trata ona sira nia dokumentu hotu atu bele hetan subsidiu ka apoiu ruma husi Governu”. Dehan sefi Suku Abrão da Conceição.

Iha oportunidade ne’e hakarak husu apoiu husi Prezidente Repúblika Dr. Jose Ramos Horta hodi tulun familia vúneravel ne’e hari’i uma mahon no tau matan ba oan nain neen (6) ne’ebe tinan barak la asesu ba edukasaun.

“Iha oportunidade ne’e ha’u hakarak husu mos apoiu ruma husi Prezidénsia Repúblika, atu bele halo uma mahon ida ba sira liu-liu tau matan mos ba oan nain ne’en ne’ebé tinan barak lahetan asesu edukasaun ba sira nia futuru”. Nia informa.

Paulo Gomes defisiente iha liman karuk, moris hamutuk ho nia fen no oan na’in neen (feto na’in tolu no mane na’in tolu) hela deit iha baraka ida iha Suku Lasaun, Postu Administrativu Atsabe Munisipiu Ermera.

Prezidente Republika Dr. José Ramos-Horta, nia gabinete  SSSAS distribui nessidade bazika ba Familia Vúneravel iha Suku Obulo, Postu Administrativu Atsabe, Municipio Ermera, ne’ebe lidera husi Asesor Sosiedade Sivil PR Dr. Quintiliano Moniz de Carvalho.

Jornalista: João Marito