Novidade Diak, Governu Aprova Konkursu Públiku Ba Membru PNTL Na’in 500
Imajem : Primeiru Ministru Kay Rala Xanana Gusmão iha Palasiu Governu Dili. Foto : Augusto dos Santos
SAPNewsTL, Díli : Rezolusaun Governu Nú. 9/2025, loron 12 fulan-Fevereiru define katak governu sei rekruta Membru Polisia Nasional Timor-Leste (PNTL) hamutuk na’in 500 hodi “reforsa pesoál sira no hadi’a kapasidade operasionál,” tanba PNTL hasoru dezafiu signifikativu sira iha tinan hirak ikus ne’e.
Marciana da Conceição – SAPNewsTL
Tuir publikasaun ne’ebe SAP News – TV asesu liu hosi Jornal da República iha haktuir katak governu liu hosi Konsellu Ministru aprova ona proposta rekrutamentu membru PNTL hamutuk 500 ne’ebe apresenta hosi Ministru Interior
“Definisaun ba pessoál atu rekruta ba Polísia Nasionál Timor-Leste iha tinan 2025 no autorizasaun atu loke konkursu públiku ba admisaun formasaun ajente no ofísial sira”.Sita iha Jornal da República, 12/07/2025
IX Governu Konstitusionál kontinua halo esforsu atu dezenvolve rekursu umanu Polísia Nasionál Timor-Leste (PNTL) nian ho objetivu atu fó ba nia númeru pesoál ne’ebé sufisiente hodi hala’o nia misaun no tuir planu estratéjiku sira ne’ebé aprova ona.
“Nomeadamente, Planu Estratéjiku 2023-2030 (Planu Desenvolvimentu Sustentável ba Polisiamentu Timor-Leste) Planu Estratéjiku ba Seguransa Interna 2011-2030, Planu Estratéjiku Dezenvolvimentu 2011-2030, no Programa Governu Konstitusionál da-IX”.
Konsidera, dahuluk, katak intensaun maka atu “reforsa pesoál sira no hadi’a kapasidade operasionál,” tanba PNTL hasoru dezafiu signifikativu sira iha tinan hirak ikus ne’e tan falta rekursu umanu ne’ebé sufisiente atu hala’o ho efetivu nia funsaun sira iha nasaun tomak, no falta pesoál ida-ne’e sai aat liután lahó influénsia korrespondente hosi pesoál foun sira.
Prosesu rekrutamentu iha tinan ida ne’e sei permite reforsa PNTL nia kuadru sira, fornese tan rekursu umanu hodi garante prezensa polísia adekuadu iha munisípiu hotu-hotu. Ida-ne’e sei hadi’a nivel patrullamentu no vijilánsia hodi kontribui ba sentidu seguransa no prezensa ne’ebé boot liu iha populasaun nia leet
Tuir mai, “rejuvenescer os quadros e promover a renovação”—aleinde défisit numériku, PNTL mós hasoru dezafiu forsa ida ne’ebé envelhese. Ofisiál atuál barak maka besik ona ba idade reforma nian ho média maizumenus tinan 46—ne’ebé bele agrava liután falta polísia nian iha tinan hirak tuirmai.
Lansamentu prosesu rekrutamentu iha 2025 ne’e sei permite inkorporasaun hosi númeru konsideravel hosi ofisiál sira ne’ebé joven liu, nune’e promove renovasaun no rejuvenesimentu hosi forsa instituisaun nian ne’ebé sei sai benefisiál la’ós de’it operasionalmente maibé mós ba introdús dinámika no mentalidade foun sira iha forsa polísia nia laran.
“Promove reprezentasaun no prosimidade entre komunidade sira,” atu asegura forsa polísia ida ne’ebé reprezentativu liután ba diversidade nasaun nian, ne’e esensiál atu estabelese relasaun ida konfiansa no prosimidade nian ho komunidade oioin.
Rekrutamentu ofisiál ba PNTL nu’udar nesesidade estratéjiku ne’ebé vitál atu garante lideransa ne’ebé iha kapasidade atu komanda no foti desizaun iha senáriu kompleksu ho risku aas hodi hatán ho efetivu ba ezijénsia ne’ebé buras hosi seguransa nasionál no instituisaun PNTL
Ikus liu, rona tiha Komandante Jerál PNTL nian, tuir Artigu 92 hosi Dekretu-Lei No. 35/2024 loron 18 fulan-Outubru hodi konsidera vaga hamutuk 500, 400 ba prosesu selesaun públika ba admisaun formasaun ajente ne’ebe ingresu iha postu ajente PNTL no 100 ba formasaun ofisiál ho entrada subsekuente ba grau Inspetór Asistente PNTL.
1. Atu determina katak nesesidade ba pesoál ne’ebé atu rekruta ba PNTL iha tinan 2025 mak vaga 500.
2. Atu autoriza Ministru Interiór loke prosesu selesaun públika ho vaga 400 ba admisaun ba formasaun ajente ne’ebe tama ba Postu Ajente Polísia Nasionál Timor-Leste.
3. Atu autoriza Ministru Interiór loke konkursu públiku ho vaga 100 ba admisaun iha Kursu Formasaun Ofisiál ba entrada subsekuente ba kargu Inspetór Asistente Polísia Nasionál Timor-Leste nian.
4. Atu determina katak rezolusaun ida-ne’e tama iha vigór iha loron tuirmai ninia publikasaun.
Aprovasaun hosi Konsellu Ministru ne’ebe asina hosi Primeiru Ministru Kay Rala Xanana Gusmão ne’e iha loron 5 fulan-Fevereiru tinan 2025 no publika iha Jornal Repúblika iha loron 12 Jullu 2025.
Tuir planu, rekrutamentu ne’e sei organiza hosi Ministériu Interior no hahú ninia preparasaun iha fulan Agustu tinan ne’e. Informasaun detallu no kritériu kandidatu SAPNews sei publika wainhira iha ona rekezitu ba rekrutamentu.