Operasaun Kalan ! SEATOU To’o Fatin, Vendedor Halai Namkari
Imajem : Sekretaria Estadu Asuntu Toponomia Organizasaun Urbanu (SEATOU) Germano Brites ho Xineza iha Comoro, 01/08/2024. Foto : Marciana Fernandes
SAPNewsTL, Díli – Sekretaria Estadu Asuntu Toponomia Organizasaun Urbanu (SEATOU) Germano Brites hamutuk ho ekipa konjunta to’o iha Merkadu Comoro no Fatuhada, iha ne’ebe halo fa’an na’in sira halai namkari ho produtu lokal ne’ebe sira fa’an.
Sekretaria Estadu Asuntu Toponomia Organizasaun Urbanu (SEATOU) Germano Brites ho ekipa konjunta hala’o operasaun kalan ba fatin públiku sira ne’ebe vendedor sira faan iha estrada públiku.
Objetivu husi operasaun ne’e atu hapara vendedor sira hodi labele fa’an iha dalan públiku inklui iha loza hirak ne’ebe Xineze sira fa’an bá.
Observasaun Jornalista iha terenu nota katak molok SEATOU Germano Brites to’o fatin, ekipa SEATOU to’o uluk fatin hodi fo avizu ba vendedor sira katak labele fa’an sasan iha dalan públiku.
“Hasai imi nia sasan no labele fa’an iha espasu públiku”. Jornalista SAPNews akompanha direta iha Comoro, 01/08/2024
Hafoin fo avizu no haree katak ekipa konjunta to’o ona fatin, vendedor sira hi’it sira modo no balun ho 3 roda, komunidade sira ho nia sasan ses husi fatin fa’an sasan, ikus mai produtu balun monu ba rai no husik hela tanba sira halai namkari.
Produtu ne’ebe komunidade sira fa’an iha dalan públiku maka Modo-tahan, Mostarda, Kanko, Ageraun, Tomate, senoura, aifarina-tahan, aidila-tahan, brinzela, alfase, ailia, ai-manas, tahu, tempe, ikan, no selu-seluk tan.
Imajem : Produtu Komunidade Ne’ebe Fakar tanba vendedor sira halai namkari.
Ekipa konjunta ne’ebe lidera husi Sekretaria Estadu Asuntu Toponomia Organizasaun Urbanu (SEATOU) Germano Brites ne’e kontinua hala’o sira nia operasaun iha tempu kalan to’o tuku 9 liu minutu zero-zero.
Ekipa konjunta ne’e mak hanesan Membru Guarda Floresta Munisipiu Dili, Polísia Nasional Timor-Leste (PNTL), Polísia Militar (PM) no Membru FALINTIL Forsa Defeza Timor-Leste (F-FDTL).
Maske nune’e, maibe, hafoin ekipa SEATOU husik fatin, vendedor sira kontinua ba fila fali dalan públika hodi fa’an sira produtu lokal tanba husi halo negosiu ne’e maka bele sustenta sira nia nesesidade lor-loron no tulun oan sira ba eskola.
Jornalista : Conzita Mota & Marciana Fernandes