PDHJ : Eskritóriu Provizóriu Iha HER, Kada Fulan Selu 23.000 ! Hein To’o Konstrusaun Foun Finaliza

Imagem : Provedor de Direitos Humanos e Justiça Virgílio da Silva Guterres. Foto : Média PDHJ

SAPNewsTL, Díli : Eskritóriu Provedor de Direitos Humanos e Justiça (PDHJ sigla Portugués),  provizóriamente muda ona ba Hotel Excelsior Resort (HER) tanba atu halo ninia konstrusaun.

Provedor de Direitos Humanos e Justiça Virgílio da Silva Guterres hateten, relasiona ho tenderizasaun ba konstrusaun foun edifisiu PDJH, nune’e eskritoriu aktual muda ba iha Hotel Excelsior Resort.

“Atu fó hatene ba públiku katak, eskritoriu provizóriu PDHJ nian hahú ohin ba oin, muda ona ba Hotel Excelsior Resort iha Pantai Kelapa, ami tenke hamamuk tanba prosesu tenderizasaun la’o ona no fulan oin kompania sira hahú halo konstrusaun iha Caicoli”. dehan Provedor de Direitos Humanos e Justiça Virgílio da Silva Guterres, ba Jornalista sira iha edifísiu foun Hotel excelsior resort, Segunda-feira, 26/01/2026.

Provedor informa ba sidadaun hotu ne’ebe hakarak hato’o keixa iha PDHJ bele ba Hotel Excelsior Resort tanba diresaun ne’ebe trata ba asuntu investigasaun, asitensia públiku muda hotu ba Excelsior Resort.

“Atu fó hatene katak fatin ida ne’e, provizóriu adjuntu ho adjunta ho diresaun balun maka iha edifisiu hotel nian, iha prinsipál besik resesaun ne’ebá iha asistensia ba públiku, no iha entrada portaun sidadaun sira ne’ebé hato’o keixa tanba ne’eba hanesan diresaun
investigasaun”.

Virgílio haktuir orsamentu ba konstrusaun edifisiu foun Provedor de Direitos Humanos e Justiça besik millaun ualu resin.

“Orsamentu Besik millaun ualu resin kona-ba durasaun ita hein maibe ba ami importante kualidade ba konstrusaun ne’e, nia durasaun bele ba tinan ida ka rua importante edifisiu ne’ebé forte”.

Enkuantu, orsamentu ba aluga fatin Hotel Excelsior ba eskritoriu provizóriu Provedoria de Direitus Humanus e Justiça hamutuk rihun ruanulu resin-tolu (23.000) kada fulan.