Lideransa PSHT & 77 Husu Membru Sira Kria Paz ! Sebastião : “Tan Nesesidade, Domingos Ba Buka Moris”
Imajem : Aman Sebatião Nunes husi matebian, Domingos do Rêgo ne’ebe hetan entevista husi jornalista sira kona ba kazu oho nia oan mane iha Portugal. Salaun KRAM Dili, 07/06/2024. Foto : Ermelinda Soares
SAPNewsTL, Díli – Relasiona ho kazu oho malu iha Fátima Portugal, Vise Presidente Organizasaun Persaudaraan Setia Hati Terate (Sigla Indonesia, PSHT) Manuel Smith hateten, konflitu ne’ebé akontese iha Nasaun Portugal hamosu tristeza boot ba Timor-oan liu-liu ba nia inan-aman.
Konflitu ne’ebe akontese iha nasaun Portugal hamosu deskontenti ba maluk Timor-oan hotu-hotu liu-liu rai hela tristeza boot ida ba aman-inan ida ne’ebe lakon nia oan mane iha Portugal.
“Enkontru ohin ami simu konvite husi Prezidenti, Komisaun Organizadora Arte Marsiais (KRAM), mai atu hare kona ba oinsa maka halo prosesu prevensaun iha situasaun rai laran, ita hatene katak akontesimentu iha Portugal ne’e mosu deskonfiansa katak membru husi organizasaun rua maka halo asuan krime hodi ikus hamosu ita nia sidadaun ida lakon nia vida”. Hateten Vise Presidente asuntu organizasaun estrutura, Persaudaraan Setia Hati Terate Manuel Smith ba Jornalista sira iha Salaun KRAM Sexta, 07/06/2024.
Manuel Smith salienta, hato’o sentidu kondolénsia ba inan-aman no ba familia tomak ne’ebe ho laran triste rona oan lakon vida iha nasaun Portugal.
“Ha’u hato’o sentidu kondolénsia ba inan-aman no familia tomak ne’ebé ho laran triste rona oan lakon nia vida iha nasaun Portugal, hanesan Timor-oan hakarak Nasaun Timor-Leste moris iha paz no estabilisade hodi minimiza aktu konflitu sira ne’ebé envolvimentu pessoal husi arte Marsiais no Arte rituais”. Dehan Manuel Smith.
Imajem : Presidente KRAM Octávio da Conceição hamutuk ho Vice Prezidenti PSHT Timor-Leste Manuel Smith no Reprezentante GAR sete-sete (77), João Baptista.
Vice Prezidenti PSHT Timor-Leste Manuel Smith, fundamenta, nu’udar reprezentante organizaun persaudaraan setia hati Terate (PSHT) husu ba Governu atu foti dezisaun rigurozu hasoru suspeitu sira ne’ebe envolve iha kazu omesidu ne’e, nune’e ba futuru juventude sira labele pratika hahalok krime.
Iha fatin hanesan, Reprezentante GAR sete-sete (77), João Baptista komenta, ba família organizasaun sete-sete no mós PSHT rai-laran no mós rai-liur atu nafatin mantein situasaun hakmatek, kria pás no dame bá malu hodi evita problema.
“Ha’u sei la ko’alia barak, ha’u rekomenda bá ita-hotu hotu tenke halo situasaun hakmatek, atu PSHT, atu Arte Rituál fali, fó avizu bá maun-alin sira neʼebé maka nakar iha fatin-fatin sira ne’e, husu para sira hakmatek, labele atu hamosu situasaun barullu, mate ne’e iha nasaun Portugal estadu mak iha direitu foti desizaun”. Husu Prezidente GAR sete-sete João Baptista.
Aman Sebatião Nunes husi matebian, Domingos do Rêgo ne’ebe lakon vida iha, Santuario Fátima Portugal husu, Governu kopera ho Governu Portugal transporta mate isin Domingos do Rêgo mai Timor-Leste, hodi halot iha nia rai moris fatin, Postu Administrativu Remexio, Munisipiu Aileu.
“Ohin, mai iha ne’e hanesan aman bá ami nia oan-mane Domingos, ida neʼebé mak lakon vida iha semana kotuk liubá, iha Lisboa- Portugal, ho ida ne’e maka ohin ami mai hamutuk ho Prezidente KRAM, atu nune’e hato’o bá Governu bá MNEK, bá embaixada sira, buka meius oinsá para mate isin Domingos do Rego tenke to’o iha Timor”. Sebatião Nunes Husu Governu
Sebastião hatutan, matebian Domingos do Rêgo hakat ain sai husi Timor-Leste hodi buka moris iha nasaun Europa Portugal, tanba nesesidade familia obriga nia buka osan hodi responde ba familia nia presiza diaria.
Enkuantu, iha reuniaun Konsellu Ministru (KM), kuarta (05/06) Governu haree ona oinsá Ministériu Solidariedade Sosiál no Inkluzaun (MSSI) atu transporta mate-isin hosi Portugál hodi entrega bá família iha Timor-Leste.
Jornalista : Ermelinda Soares