PM Xanana To’o Malázia, Partisipa Simeira ASEAN

Imajem : Primeiru Ministru Kay Rala Xanana Gusmão iha Aeroportu Internasionál Kuala Lumpur, 25/05/2025. Foto : Média PM

SAPNewsTL, Malázia : Primeiru-Ministru Timor-Leste Kayrala Xanana Gusmão ho ninia delegasaun to’o iha Aeroportu Internasionál Kuala Lumpur (KLIA), simu direta husi Ministru Rekursu Naturál no Sustentabilidade Ambientál Malayzia nian, Nik Nazmi Nik Ahmad.

Wainhira, Xefe Governu Timor-Leste ne’e to’o simu ho guarda-de-onra hosi ofisiál no pesoál na’in 28 hosi Rejimentu Reál Ranger Batallaun Dahuluk.

Prezensa Primeiru-Ministru Xanana Gusmão hodi tuir Simeira Asosiasaun Nasaun sira iha sudezte Aziátiku (ASEAN-Sigla Inglés) ba dala 46 no Simeira Relasionadu sira ne’ebé sei hala’o 26-27 de Maiu, iha Sentru Konvensaun Kuala Lumpur (KLCC).

Simeira ASEAN ba dala 46 sei hala’o iha loron 26 no 27 de Maiu, aleinde ne’e iha enkontru prinsipál rua iha nivel aas – Simeira 2ª Konsellu Kooperasaun ASEAN-Golfu (GCC) no Simeira dahuluk ASEAN-GCC-Xina.

Simeira ASEAN ba dala 46, ne’ebé hala’o tuir tema Prezidénsia ASEAN 2025 Malázia nian “Inkluzividade no Sustentabilidade”, ne’e halibur líder sira hosi Estadu-membru sira ASEAN nian hodi diskute kestaun rejionál sira no trasa diresaun futuru hosi kooperasaun ASEAN nian.

Iha viajen Primeiru Ministru Xanana Gusmão nian akompaña hosi Vise Minstru Asuntu Parlamentár Aderito Hugo da Costa, Sekretáriu Estadu Komunikasaun Sosiál(SEKOMS), Expedito Loro Dias Ximenes, Vise Primeiru Ministru, Ministru Koordenador Asuntu Ekonomia Francisco Kalbuadi Lay inklui ho ekipa media no protokolu sira.

Hafoin partisipa Simeira ASEAN ba dala 46°, Primeiru Ministru hamutuk ho ekipa delegasaun sei fila hikas mai Timor-Leste iha loron 28 Maiu 2025.