Poezia : Lian Foinsa’e Be Barani “Kene-Kene”

SAPNewsTL, Dili – Poezia ho títulu “Adeus Lian Foinsa’e Be Barani”, Obra Husi Alexandra Tilman, Feto Poetiza Timor-Leste ne’ebe dedika poezia ida ba Maktoban Xisto alias “Kene-Kene” ne’ebe hakotu iis iha Loron 17 Fulan Marsu tinan 2023.

LIAN FOINSA’E BE BARANI
Ohin minutu ba ne’e. Oras ba ne’e
Ami lubuk ba ne’e fuan lakon,
Lakon fiar, lakon hanoin, tan lakon Ó
Iha ne’e: Ha’u, Nia, Sira no Ami lubuk ba ne’e Ninia-Belun
Belun husi Lian Foinsa’e be Barani…..

Belun…
O ha’u Belun… iha ne’e…
Iha tuts nia leten ha’u koko buka ó-nia hasee. Koko buka Ó-nia hamnasa ne’e!
Maibe, laiha forsa, laiha kbi’it.
Susar tebes ba ha’u atu konta O-nia barani mak dala wain
Hasoru matan, tilun no hahalok Emar lubuk Gravatadu….
Gravatadu no Kazaku rebo-rebo,
Mak kaan tetak lia-midar,,, mak kaan bobar-lia
Ba interese kakutak kahoer no kabun
Hodi hanehan lian la’ek, ki’ik, ki’ak no mukit-sira.
Mukit ba Lia-Loos….mukit ba Justisa no domin ba Rai-Doben,
Rai Timo-Leste, Rai Lafaek be Lulik….

Belun…O ha’u Belun…
Belun lian ba Ki’ik no la’ek-sira…
Belun lian ba tristeza be halerik ba Lia-Loos…

Belun Ativista be nakonu ho Espíritu ba Luta.
Belun… dala wa’in ha’u haree, Ó sai lian ba lian la’ek sira. Maske dala wa’in mós amiasa, terór, intimidasaun no kapturasaun mai sai Ó-nia buka’e!!

Maske risku wa’in mosu nafatin Ó tuba metin, Ó hamaluk Foinsa’e raan bee nakali Mak Hamlaha,

Hamro’ok ba Lia-Loos Hamri’ik hasoru
Luta kontra amigu Rai-Rain be lakon fuan ba Direitu-Emar
Luta kontra emar lubuk Marjinalizadu ba emar lubuk marginalizadu seluk!

Belun…
Belun….. Ó mós lian foinsa’e be Barani Ida,
Barani duni iha rai Independénsia Timor-Leste Ninia Leten be Lulik.

 

Belun…
Maske Ó la’o uluk bá ne’e. Maibé.

Ó-nia Istória luta ba Lia-Loos la nahas ba ne’e…
La rohan ba ne’e, la kotu ba ne’e !!!
Ó sei konta metin iha istória mós ba jerasaun foun be barani

Lian wa’in Foinsa’e-sira Seluk sei le’ut Ó-ain fatin… Hodi Ko’alia…Hakilar ho Krítiku, Analítiku, no Tuba Metin Luta…

Luta hodi Kontra Injustisa Sosiál mak dala wain…
Hanehan Hanoin no Moris no buras iha emar ki’ik, ki’ak No kbi’it la’ek wain sira-nia leet.

Belun Sisto…
La sinte Madrugada loron 17 Fulan marsu 2023
Mai lori lakon Ó dook no lakon husi Ami sorin
Mai lori Ó sees no la hamaluk ona ami, iha kafe hamutuk, iha hamnasa midar,
Iha Diskusaun no Debate furak sira…

Ah belun… Ó halo ami lubuk ba ne’e laran moras
Ó halo ami lakon fiar katak Madrugada 17 mai lori lakon duni Ó…
Lori lakon Ó-nia istória murak wa’in husi ami-sorin.

Adeus Belun Xis….
La’o…La’o tuir kalohan mutin be naruk…
Adeus…Lian Foinsa’e Be Barani
Iha Rai Timor Lafaek be Lulik Ninia leten.

Memória Salatiga, 18 Marsu 2023

Hakerek Na’in : Alexandra Tilman