PR Horta Informa Liurai Boot Brunei Sei Partisipa Eventu 20 Maiu
Imajem : Presidente Repúblika Jose Ramos Horta iha Timor Plaza, 07/05/2024
SAPNewsTL, Dili : Hafoin partisipa iha serimónia open office reception iha embaixada Brunei Darusalam iha Timor Plaza, Presidente Repúblika hateten nia parte nunka falta hodi responde ba konvite husi embaixada no ajénsia sira iha Timor-Leste.
“Ha’u nunka falta iha eventu, konvite ruma husi embaixada iha Timor Leste konvite mos husi Ajénsia naçoens unidas, ha’u sempre marka prezensa, ita nu’udar uma na’in iha Timor Leste kuandu embaixada ruma halo aktividade nasional ka kultural, relijiozu, Ita hatudu hatudu respeitu buka tempu hodi partisipa”.Tenik PR José Ramos Horta ba Jornalista sira iha Timor Plaza, 07/05/2024
Xefe Estadu akresenta, nasaun sira tempu para simu amigu taka tiha inimigu sira no laiha inimigu, embaixada odamatan loke para simu grupu sira.
Ramos Horta dehan, Liurai Boot Brunei Sua Majestade Southdawn, Ema ne’ebe primeiru iha ukun rai ida estabilidade, tan ne’e hot hotu koinese kriminalidade radikalismu laiha Brunei.
“Ha’u kuhnese dala barak ona, kuandu iha konferensia internasional ruma iha ne’eba, ami sempre hamutuk ko’alia kona ba servisu uluk kedas nia apoio Timor Leste tama ba ASEAN, tanba ne’e mak iha 2015 loke ona embaixada nune’e mak husu Sua Majistade, oinsa mak loke embaixada iha Timor Leste”. Ramos Horta Informa
Presidente Repúnlika mos konvida ona Liurai Boot Brunei Darusalam hodi mai partisipa eventu 20 de Maiu nu’udar konvidadu espesial.
“Ha’u konvida Sua Majistade atu mai, nia sei mai duni iha 20 de Maio hanesan konvidadu espedial Presidente da Repúblika nian, Governu ho protokolu presidénsia, protokolu Governu Ministru hot-hotu kordena para simu ita nia belun boot ne’e. Ho festa boot hatudu ba dehan Ita nia gratidaun hodi apoiu ba Timor Leste iha ASEAN.”
Iha Parte seluk, kona ba alterasaun lei Komisaun Anti Korupsaun (KAK), Xefe Estadu Ramos Horta afirma sei promulga lei KAK tanba lei ne’ebe sai fali obstákulu diak liu muda tiha.
“Ha’u seidauk simu lei alterasaun KAK, se mai ha’u asina kedas tanba ha’u koinese alterasaun, ha’u haree lei sai fali obstákulu, diak liu muda tiha, ha’u apoiu governu nia desizaun, demokrasia tenki mos funsionál, koperasionál tenki mos prátika”. Afirma Xefe Estadu
Lei KAK hetan ona alterasaun husi Parlamentu Nasionál, enkuantu Presidente Repúblika sei promulga wainhira to’o ona nia iha nia meza.
Liga ba eviksaun, Ramos Horta la konkorda ho polítika governu ne’ebe duni deit inan sira ne’ebe faan modo iha dalan ninin, la konkorda tanba deit ilegal governu ba sobu deit, pelu menuz fo tinan lima para sira bele muda ba fatin seluk.
“Ha’u la konkorda se tanba deit ilegal governu ba sobu deit, ema sira ne’ebe ilegal ne’e bele fo prazu tinan lima mak sai, para bele buka fatin. Kuitadu, Duni fali ama sira be faan modo iha dalan ninin ne’e ha’u la konkorda”. Jose Ramos Horta hateten
Daudaun ne’e, Governu liu husi Sekretariu Estadu Asuntu Toponomia no Organizasaun Urbanu (SEATOU) Germano Santa Brites Dias ho nia ekipa konjunta sobu ona uma lubun iha area Metiaut, Aitarak Laran, Bidau, Terminal Bekora, inklui SEATOU halo ona dialogu ho komunidade tasi-tolu no comoru hodi hamamuk fatin molok ekipa ba halo eviksaun.
Jornalista : Genoveva Lopes Sarmento