PR Horta Kondekora Embaixador Korea Shin Mantaek

SAPNewsTL, Dili – Prezidente Repúblika José Ramos Horta kondekora Grau Medalla Orden Timor-Leste ba Embaixadór Repúblika Korea Sr. Shin Mantaek. Kondekoeasau ne’e nu’udar rekunhesimentu husi estadu Timor-Leste ba dedikasaun no prestasaun ne’ebé nia hatudu durante mandatu.

Durante mandatu, Embaixadór Repúblika Korea Sr. Shin Mantaek hatudu ona dedikasaun esepsionál hodi hametin relasaun bilaterál entre nasaun rua no hatudu ona kompromisu ne’ebé metin ba Timor-Leste nia dezenvolvimentu no moris-di’ak.

“Pontu importante husi kontribuisaun Embaixadór SHIN hametin relasaun bilateral no lasu amizade entre Timor-Leste no Korea, fornese apoiu ne’ebé folin-laek iha área sira hanesan edukasaun, saúde, kapasitasaun, no empregu “. Sita Prezidente Repúblika José Ramos Horta iha Palasiu Presidensial Nicolau Lobato, 17/09/2024

Xefe Estadu, Jose Ramos Horta konsidera Embaixador SHIN nia prestasaun servisu hatudu rezultadu barak inklui promove amizade, paz, estabilidade no dezenvolvimentu nasionál.

“Onra ida ne’e fó nu’udar rekoñesimentu ba Embaixadór SHIN nia servisu sira ne’ebé di’ak tebes hodi promove amizade entre ita-nia povu no kontribui ba pás, estabilidade nasionál, no dezenvolvimentu iha Timor-Leste durante nia mandatu.”Ramos Horta sublinha

Prezidente Repúblika salienta, Korea Sul fó ona apoiu signifikativu liuhusi misaun manutensaun pás ONU nian, interkámbiu diplomátiku sira, akordu komersiál sira, no kooperasaun iha setór oioin, inklui programa sira husi KOICA nian no Sistema Lisensa Empregu nian.

Prezidente Ramos-Horta hato’o agradesimentu ba apoiu ne’ebé Repúblika Korea fó ba Timor-Leste, rekoñesimentu ida-ne’e hatudu parseria ne’ebé iha valór entre Timor-Leste no Repúblika Korea.

Fo hanoin fali katak, Embaixadór SHIN Mantael hala’o kna’ar nu’udar Embaixadór Korea nian ba Timor-Leste hahú iha fulan Janeiru tinan 2023 to’o ohin loron.

Jornalista : Ekipa Kobertura