PR Horta Konsidera Relasaun Externa Importante Ba Dezenvolvimentu TL
SAPNewsTL, Cambera : Iha vizita estadu, Prezidente Repúblika, José Ramos Horta iha Pais Vizinu Australia, Xefe Estadu konsidera politika relasaun internasional entre Timor Leste, Austrália no Indonézia ne’e importante tebes ba dezenvolvimentu Timor Leste nian.
“Ita hotu-hotu hatene ona polítika nasionál externa Timor Leste, importante no prioridade mak Indonézia ho Austrália, iha 2002, ha’u hanesan Ministru Negósiu Estranjeiru, Marí Alkatiri hanesan Primeiru Ministru, Maun Bo’ot Xanana hanesan Prezidente Repúblika, ha’u rasik mak momentu ne’ebá rekomenda, kuandu Primeiru Ministru ho Prezidente eleitu, nasaun dahuluk ne’ebé mak ita vizita mak Indonézia no Austrália”. Tenik Xefe Estadu iha intrevista ho jornalista sira, iha Embaixada Timor Leste iha Cambera, 08/09/2022
Enkuantu, Iha Austrália, Prezidente Repúblika hala’o enkontru ho variedade entidade, objektivu husi enkontru sira ne’e atu hametin relasaun entre nasaun Austrália no Timor Leste.
“Horse’ik enkontru ona Primeiru Ministru, Ministru Negósiu Estranjeiru, Ministru Defeza ho deputadu lubuk ida, haree ajenda ida klaru kona-ba Greater Sunrise, kooperasaun ekonómika ne’ebé tulun Timoroan sira, hanesan bolsa estudu no traballadór ne’ebé mai iha Austrália hodi apoia diversifikasaun ekonómika”. Dehan nia
Entretantu, Xefe Estadu Timor Leste ne’e mós rekoñese papel governu Australianu nian dezde tinan 1999, hodi apoia dezenvolvimentu nasionál no fó oportunidade de empregu ba Timoroan sira iha Austrália.
Jornalista : Vincensius Morais
Editor : Luis Pailofo