PR Horta Mobiliza Apoiu Internasional, Tulun Guvernu Fornese Hahan Ba Komunidade
Imajem : Presidente Republika Jose Ramos Horta hamutuk ho Empreza Zamancartel International Investment – LTD no kiik oan sira, iiha Palásiu Prezidente Nicolao Lobato, (16/03/2023). Foto : Media PR
SAPNewsTL, Dili : Empreza Zamancartel International Investment – LTD husi Malázia apoia pakote alimentasaun ba Prezidénsia Repúblika, hodi haforsa programa sosiál, atu tulun família vulnerável iha Territoriu Timor Leste
“Ne’e grupu bo’ot ida husi Malázia no grupu ne’e ezíste mos iha Europa. Ha’u hasoru sira, sira hakarak halo investimentu oin-oin ba Timor-Leste. Agora, sira apoiu dadaun ona Pezidénsia Repúblika nia programa apoiu umanitária (sosiál), hahu ho tulun fós, hahan iha kalém (Lata), sira sei fó mos osan oituan, atu ajuda programa sira ne’e,’’ Esplika Prezidente Repúblika, José Ramos-Horta iha Palásiu Prezidente Nicolao Lobato, (16/03/2023)
Tuir Prezidente Repúblika, ajénsia internasionál, empreza no individu balun mos hatudu sira nia disponibilidade, hodi tulun programa apoiu sosiál.
“Ha’u ko’alia daudaun ona ho Koreia Súl, atu haruka komputadór ne’ebé oras ne’e sira organiza ona, inklui programa multivitamina ba labarik sira nia saúde. Tanba ne’e, tempu badak programa Prezidénsia nian sei aumenta, atu ajuda kosok-oan sira, família vulnerável,’’ informa Prezidente Repúblika, Horta.
Ba Xefe Estadu, programa sosiál ne’e responsabilidade governu nian, maibé Prezidénsia Repúblika, buka tulun governu, liu husi mobiliza apoiu internasionál, seitór privadu iha rai-laran, atu kontinua apoia komunidade iha baze.
Imajem : Presidente Republika Jose Ramos Horta hamutuk ho Empreza Zamancartel International Investment – LTD
Reprezentante Grupu Zamancartel International Investment LTD, Intan Safinar M. Safri, fiar katak, apoiu ne’e sei distribui ba família vulnerável.
“Ohin ita halo doasaun fós mai Prezidénsia Repúiblika atu kontinua tulun família vulnerável, inklui labarik sira no dadaun ne’e ita prosessa apoiu hanesan fós no hahan vitamina balun no sei to’o Timor-Leste iha tempu badak ne’e. Apoiu ne’e sei kontinua fazeadamente ba Prezidénsia Repúblika, espera katak povu Timor-Leste bele simu,’’ Tenik Intan Safinar.
Inisiativa ne’e atu apoia labarik sira nia nutrisaun, hodi haforsa dezenvolvimentu labarik sira nia futuru. Ba faze dahuluk, empreza husi Malázia apoia fós saka 100 no pakote alimentasaun seluk, hodi distribui ba komunidade vulnerável iha Munisípiu Díli.
Entretantu, Grupu Emprezariál ne’e halo hela levantamentu nesessidade, kona-ba modelu investimentu ne’ebé atu loke iha Timor-Leste, hodi emprega Timor-oan sira, liu-liu kriasaun indústria “mie instant” no ai-han nutritivu, hodi atende nesesidade merkadu no haforsa dezenvolvimentu nasionál.
Enkuantu, Tuir dadus ne’ebe SAP News asesu katak problema subnutrisaun iha Timor Leste hamutuk 48% bazeia ba Publikasaun dadus husi UNICEF iha tinan 2022
Jornalista : Marcela Lemos