PR Ramos “Admira” CCLN Hari’i Edifísiu “Banco do Nosso Futuro”
Imajem : Lansamentu edifisiu foun Banco do Nosso Futuro (BNF) iha Comoro, 04/09/2025
SAP News TL, Díli : Governu Konstitusional dasia ofisialmente lansa ona edifisiu foun Banco do Nosso Futuro (BNF) ne’ebé kria husi Konsellu Kombatente Libertasaun Nasionál (CCLN) hodi fasilita veteranu no publiku sira kontribui ba dezenvolvimentu ekonomia rai-laran.
Guilhermino Ramos & Marcela Mery — SAPNews TL
Iha diskursu, Prezidente Repúblika (PR) José Ramos Horta hateten, nia parte hato’o apresiasaun bo’ot ba veteranu sira tanba bele
kontribui 55$ milhoes ba Fundu Dezenvolvimentu Veteranu, (FDV) hodi inisia hari’i Banco do Nosso Futuro (BNF).
“Ha’u nia mensajen apresiasaun ba imi hotu, imi konsege akumula fundu dezenvolvimentu veteranu 55 milhoens, signifika hatudu imi nia komitmentu, ha’u admira, ha’u la espera imi-nia ideia, parabens hakuak bo’ot ba imi”. Dehan PR Horta liu husi nia diskursu, Iha resintu MACLN, Comoro, Quinta (04/09/2025)
Xefe Estadu salienta, imi-nia komitmentu no dedikasaun ba objetivu komún, hatudu admirasaun tanba buat ida ne’e mosu liu husi expetativa veteranu sira-nian.
Imajem : Ministru Asuntu Kombatente Libertasaun Nasionál (MACLN) Gil da Costa “Oan Soru”.
Iha fatin hanesan, Ministru Asuntu Kombatente Libertasaun Nasionál (MACLN) Gil da Costa “Oan Soru” salienta, Banku do Nosso Futuru mak banku ida ne’ebé kria husi ideolojia ne’ebe veteranu sira rekomenda ba Konsellu Kombatente Libertasaun Nasionál (CCLN), ho objetivu atu ajuda kombatente, veteranu no publiku sira iha futuru.
“Esforsu saida mak veteranu sira halo, ohin hodi eziste banku ida la naran banku veteranu, maibé naran Banco do Nosso Futuro, motivasaun saida mak ita halo buat ida ne’ebe la proteje husi lei maibé nakfilak ba proteje husi lei, motivasaun hari’i BNF mai husi hanoin ema veteranu sira nian” Dehan Oan Soru
Ministru MACLN Oan Soru hatutan, progresu konstrusaun edifisiu Banco do Nosso Futuro mai husi ideia no rekomendasaun ne’ebe veteranu sira hato’o ba CCLN durante tempu naruk, sosializasaun iha 13 munisipiu no hosi konsultasaun estrutura rezistensia tomak no ikus halo sosializasaun haleu postu adminitrativu 65 iha territoriu tomak.
“Ita la’o haleu postu adminitrativu hotu hodi husu opiniaun no aseitasaun hodi hetan lejitimidade liu husi kongresu CCLN nian ne’ebe hala’o iha fulan dezembru 2019, entaun ideia ne’ebe ita-bo’ot sira rekomenda, ohin ita hahu lansamentu banku ida ho naran BNF hanesan reflesaun ba pasadu, esforsu ne’ebe veteranu sira halo” Tenik Ministru Gil.
Entretantu, orsamentu ba edifisiu Banco do Nosso Futuro ho montante 5 milhoens ne’ebe finansia husi Fundu Dezenolvimentu Veteranu (FDV) tanba hetan kontribuisaun husi veteranu sira iha teritoriu nasionál liu husi deliberasaun Kongresu Nasionál Konsellu Kombatente Libertasaun Nasionál iha tinan 2019.