Problema Ekonomia ! Kasa Balada Fu’ik & Tesi Ai Fo Impaktu Ba Parke Nasionál Nino Konis Santana
Imajem : Parke Nasional Nino Konis Santana. Foto : Media Sosial Parke Nasional Nino Konis Santana
SAPNewsTL, Lautém – Xefe aldeia Lore Tchai, Postu Lore Munisipiu Lautém Virissimo de Asunção hateten ho kondisaun nesesidade, komunidade nafatin kasa animal fuik, tesi ai hodi halo tos no konstrui uma rezulta parke nasional Nino Konis Santana la matak ona.
Xefe aldeia Virissimo de Asunção haktuir tempu uluk area Parke Nasional Nino Conis Santana ne’e furak, , iha tenpu 1980 komunidade sira tesi ai hodi halo lutu de’it, maibe agora komunidade barak no balun tesi ai hodi konstrui uma, ho kondisaun nesesidade obriga sira nafatin kasa animal fuik sira, nune’e iha area parke nasional ne’e ladun matak ona.
“Tempu uluk area Parke Nasional Nino Conis Santana ne’e furak los, iha 1980 komunidade sira tesi ai hodi halo lutu de’it, maibe agora ne’e komunidade barak no balun tesi ai hodi konstrui uma, nune’e iha area parke nasional ne’e ladun matak ona, no problema ba ita mak kondisaun seidauk iha, loloos ne’e ema ne’ebé haree ba parke nasional ne’e importante tanba kondisaun nesesidade komunidade hela iha ne’e nafatin ba kasa animal fuik, ha’u haree iha ne’e la iha rai tetuk hodi halo toos, natar entaun atu halo toos tenke muda no tesi ai nafatin”. Dehan Xefe aldeia Virissimo de Asunção ba jornalista sira iha lore Tchai, 31/05/2024.
Virissimo hatutan, estrada no bee mós kuaze barak mak asesu ona husi Kruz Vermella to’o iha Lore Tchai, maibe bee ne’e familia uma kain lima (5) mak asesu torneira ida maibé la to’o uma, no iha Aldeia Titipari part Tchai lama PNDS dada bee ba komunidade ho kondisaun estrada ne’ebé aat to’o agora ekipamentu la lori hodi dada bee.
“Kondisaun aldeia Tchai mak média sira haree rasik, estrada no bee mos kuaze barak asesu ona husi kruz vermelha mai to’o iha ne’e, normalmente sira hadia hotu konstrusaun bee ne’e familia 5 mak asesu torneira ida, maibé la tama to’o uma, iha aldeia Titilari parte Tchai lama ne’e PNDS mak dada bee ba komunidade sira to’o agora seidauk hotu, tanba kondisaun estrada ne’ebé la permite hodi lori ekipamentus, dalan ne’e di’ak maibe tanba mudansa klimatika rai halai nune’e estrada aat, balun ameasa kotu”.
“Tempu ita nia maluk nasaun vizinho sei hamutuk iha ne’e sira hadia estrada tau alkatraun to’o iha aldeia Tchai, foin dadauk Indonesia fila ba sira nia rai mak estrada ne’e ita nia governu la iha manutensaun mak aat nune’e maibe uluk di’ak hela.Xefe aldeia esplika programa governu mai mak ateru rai mutin duni hanesan iha aldeia Tchai uluk iha 2010″. Nia informa.
Imajem : Entrevista Xefe aldeia Tchai Virissimo de Asunção iha Lore Tchai, 31/05/2024. Foto : Ekipa Media Tour
Xefe Aldeia ne’e sublinha, Tara Bandu seidauk iha maibé iha lei suku ne’ebé bandu komunidade hodi kasa ilegal no tesi ai, iha guarda floresta nain ida (1) iha tinan 2013, maibé aumenta tan nain rua (2) agora nain tolu (3), tanba area luan sira labele perkore hotu, komunidade mos estraga ai-kameli.
“Tara bandu seidauk iha maibe iha lei suku mak bandu kasa ilegal, tesi ai maske iha ne’e guarda floresta maibé nain ida de’it tinan 2013 ne’e mak aumenta tan nain rua, agora nain tolu dalaruma area ne’e luan sira la bele perkore hotu, iha ne’e nesesidade obriga komunidade balun ba estraga ai-kameli, no atividade kasa uluk to’o agora halo nafatin tanba mudansa klimatika, oinsa sira ba hola na’an iha merkadu, entaun komunidade sira tun ai-laran kasa nafatin animal fuik sira maibe bandu labele fa’an iha merkadu no kasador sira la’o uja kilat ho marka senafan ba atividade kasa”. Nia hato’o.
Guarda floresta Mariano da Costa hatenen, estadu tenke rekruta guarda floresta ba Parque Nasional Nino Kronis Santana, tanba ai-laran sira sei orijen, boidiversidade ka animal fuik iha oi-oin ne’ebé ejiste antes, korpu guarda floresta iha misaun katak tenke kontolu másimu maske nain tolu (3) deit.
“Parque Nasional Nino Conis Santana ne’e kompostu husi Postu Administrativu Tutuala, Lospalos, Lore no Illiomar, iha ne’eba suku sia (9) maka iha laran hanesan ita hare’e dadauk katak Parque Nasional ne’e estadu tenke rekruta guarda floresta ba Parque ne’e, iha area Santana mak ai laran sira sei orijen, biodiversidade animal fuik sira iha oin-oin hanesan rusa fuik, laku, meda, lekirauk no grupu manu fuik sira hanesan manu pombu, niki, kakatua, manu kakuk no mos grupu samea sira ne’e ejiste antes ita iha, nu’udar korpu guarda floresta ami iha misaun ida tenke kontrolu másimu, maske ami nain tolu deit maibe ami halo orariu hodi loro-loron ami hala’o patrollamentu no monitoriza iha dalan Lore ba Lospalos atu bele asegura rikusoin sira no atividade ilegal sira ba merkadu no ba fatin seluk”. Mariano da Costa hateten.
“Uluk maluk Modesto deit labele kobre hotu ba ai-laran sira entaun ema kasa no sabadu-sabadu ema fa’an na’an laku iha merkadu Lospalos. Maibe iha tinan 2021 rekruta tan, ami mai hamutuk ho nia, ami nain 3 esforsu hamutuk agora minimiza uituan atividade ilegal ona, ita hare’e iha merkadu ema la fa’an ona na’an laku no na’an rusa iha merkadu no atividade tesi ai ilegal hanesan ai kualidade mudial ne’e balu-balun sei lakon maibe iha loron 25 maiu tinan ne’e, ami konsege kaptura ema ida iha dalan Trans nian besik Lospalos, ema ne’e husi parte Lore nian lori ai-kameli atu fa’an iha merkadu mais ou menus kilograma 70 ka 80 hanesan ne’e tamba se sira lori barak entaun prezudika sira. Sira foti barak liu ita toman kaer lori ba tribunal hodi tuir prosesu ba komarka konforme juis sira nia desizaun”. Mariano hatutan.
Imajem : Guarda Floresta Mariano da Costa
Mariano deklara, iha Lore aplika regulamentu United Nations Transitional Administration in East Timor (sigla Inglés, UNTAET) nian iha artigu 17/2006 bandu ema labele tesi ai, artigu 19/2000 dehan katak labele tesi ai Iha area protezida, iha mos artigu 14/2017 ko’alia kona-ba regime geral floresta nian, no iha artigu 6/2020 kona-ba protesaun boidiversidade parque Nino Kronis Santana, sensibilizasaun la’o nafatin atu komunidade muda karakter hodi proteje rikusoin ho lolos, labele hare deit ba mina tanba to’o tempu mina hotu laiha rendimentu atu troka.
“Iha Lore aplika regulamentu United Nations Transitional Administration in East Timor (sigla Inglés, UNTAET) nian iha artigu 17/2006 bandu ema labele tesi ai, artigu 19/2000 dehan labele tesi ai iha area protezida sira, iha mos artigu 14/2017 ko’alia kona ba regime jéral floresta ninian no mos ba fali artigu 6/2020 ne’e kona ba protesaun biodiversidade Parque Nasional Nino Conis Santana nian tamba ne’e sensibilizasaun ne’e lao nafatin, nune’e komunidade sira muda karakter hodi proteje rikusoin lolos.”
“Se ita hare’e deit ba mina to’o tempu hotu, la iha rendimentu ida atu troka ida ne’e tamba mina rai rendimentu ne’ebe inrenovavel, ne’e duni wainhira estadu investe barak ba biodiversidade aban bainrua biodiversidade ne’e maka sei fo rendimentu ba ita. Oinsa maka ema fo rendimentu mai ita liu husi ai Kameli sira, Governu tenke halo programa barak liu ba ita nia sosiedade sira kuda ai kameli iha sira nia kintal ka knua rasik atu nune’e aban bainrua troka fali rendimentu ne’ebe la iha ona”. Nia haktuir.
Komunidade ne’ebé halo toofs iha Parque Nasional Nino Konis Santana menus ona, lahanesan uluk guarda floresta seidauk ba, no iha zona tolu ne’ebé hetan kontrolu husi kotu guarda floresta.
“Komunidade sira halo to’os iha Parque Nasional Nino Conis Santana ne’e agora menus ona, la hanesan uluk guarda floresta seidauk mai tamba iha zona tolu maka hanesan Zona inti, Zona trapaun no Zona tranzisaun ne’e hetan kontrolu husi korpu guarda floresta”.
“Zona inti, mak ai laran orijen ne’ebe husi beiala sira to’o agora ema nunka halo to’os no natar iha ne’eba. Zona trapaun mak ai laran ne’ebe depois de Portugal mai komunidade sira halo to’os iha ne’eba maibe Indonesia mai okupa, durante funu laran sira la halo to’os no natar entaun to’o agora ai hun bo’ot barak fali sai ai laran ona. Zona tranzisaun mak depois ukun an komunidade sira halo to’os no natar iha ne’eba maibe agora koñesementu agrikultura menus entaun zona ne’e mos ai komesa moris fali iha ne’eba atu ba Zona trapaun ona”. Nia hakotu.
Entretantu, iha Aldeia Tchai, suku Lore un (1), postu administrativu Lore, Munisipiu Lautém total populasaun iha aldeia refere hamutuk familia mane nain-252 no feto nain- 551, total hamutuk 1154.
Notisia ne’e SAPNews kolleta liu husi progrma media tour ne’ebe organiza husi Assosiasaun Jornalista Timor-Leste (AJTL) ne’ebe servisu hamutuk ho Oxfam Timor-Leste.
Jornalista : Ermelinda Soares