Problema Mudansa Klimátika ! AJTL Sei Fo Sai Informasaun Rural

Imajem : AUTO & Oxfam hala’o komunikadu imprensa iha Salaun Oxfam Dili, 20/01/2024

SAPNews TL, Díli — Identifika problema sosial ne’ebe implika ba grupu invizivel sira ne’ebé kauza husi mudansa klimatika, Assosiasaun Jornalista Timor Lorosa‘e (AJTL) serbisu hamutuk ho OXFAM liu husi projetu justisa sei realiza Média tour iha Rejiaun Administrativa Espesiál Oe-Cusse Ambenu (RAEOA)

Prezidente Assosiasaun Jornalista Timor Lorosa‘e (AJTL) Zevonia Vieira informa, OXFAM ho AJTL halo ona média briefing ho jornalista sira hodi identifika asuntu ne’ebe liga ho problema mudansa klimátika no oinsa haree asuntu justisa klimátika ne’ebe sai problema ba feto, ema ho defisiénsia no grupu vulnerável sira hasoru.

“Implementa média tour ba dahaat liu hosi projetu justisa mudansa klimátika ne’ebe hetan apoiu hosi OXFAM Honkong kolabora ho OXFAM iha Timor-Leste, halo ona média tour iha munisípiu Lautém, Baucau, Laga, Ermera, no ikus iha Oe-Cusse”. Dehan Prezidente AJTL Zevonia Vieira ba jornalista sira liu husi komunikadu impresa ne’ebe hala’o iha resintu OXFAM Hudilaran, Segunda (20/01/2024)

Dirijente AJTL ne’e akresenta, mekanismu protesaun hodi proteje ambiente saudavel ne’ebe fó impaktu pozitivu ba komunidade, maka AJTL ho OXFAM organiza ona jornalista sira hodi identifika problema mudansa klimatika ne’ebe durante ne’e implika ba komunidade no grupu vulnerável sira.

“Ita nia jornalista sira mós identifika ona kona-ba problema asesu bee-moos iha tempu bailoron naruk, hahalok ema nian ne’ebe ladun halo prevensaun hodi proteje ambiente ne’ebe fó impaktu ba komunidade sira nia moris liu-liu grupu vulnerável”.

Setor agrikultura hetan mós impaktu hosi mudansa klimátika iha area rural ne’ebe maka jornalista sira seidauk to’o hodi deskobre, nune’e AJTL foti oportunidade ida ne’e hodi lori jornalista sira ba area rural iha Oe-Cusse besik fronteira, oinsa identifika feto sira nia luta ho distánsia ne’ebe dook hodi buka bee-moos.

Zevonia fundamenta, Jornalista sira mos sei identifika istória susesu hosi estudu kazu sira ne’ebe karik grupu joven ka komunidade sira halo oinsa konserva bee iha ne’eba hodi ajuda komunidade sira bele asesu bee ho distansia ne’ebe besik, tanba ne’e solusaun ne’ebe matenek lokal sira halo atu ajuda sira nia komunidade sein hein tempu naruk hosi Governu hodi dada bee-moos besik sira.

Prezidente AJTL hato’o agradesimentu ba OXFAM tanba kontinua fó fiar ba AJTL hodi halo média tour, no organiza jornalista sira espalha informasaun ne’ebe fó benefisiu ba komunidade sira no to’o ba lideransa sira oinsa atu bele rezolve problema sosial iha komunidade nia leet.

Nune’e, AJTL nia prinsípiu no komitmentu fó espasu barak liu ba ema kbiit laek no lian laek sira ne’ebe dala barak ema haluha tau importansia ba sira hodi hato’o sira nia direitu ba iha justisa klimatika.

“Bainhira ha’u halo reflesaun ho jornalista hamutuk ho OXFAM, komunidade sira kontente no apresia tanba primeira ves jornalista hasoru sira iha area rural, tanba dala barak jornalista to’o iha sidade ka vila deit hodi hasoru lideransa sira, maibe atividade ne’ebe AJTL halo ne’e to’o iha area remota atu hasoru komunidade sira ne’ebe maka lahatene jornalista nia papel” Hateten Zenovia.

“Benefisiu ne’ebe ita hetan por ezemplu iha munisípiu Lautém governu rasik aprosima média balun hodi implementa programa balun, lori jornalista sira ba haree moris ne’ebe komunidade sira hala’o no hasoru liu-liu iha setor produtivu ne’ebe komunidade Lore hasoru”.

“Ita hetan feedback barak iha plataforma sosial media kona-ba informasaun ne’ebe importante tebes ba Governu hodi haree komunidade sira nia moris iha area rural, ida ne’e mos kontribuisaun husi jornalista hodi fó sai informasaun ne’ebe durante ne’e ema haluha no la tau importansia liu-liu iha asuntu bee-moos, estrada aat no setor agrikultura”.

Prezidente AJTL hatutan susesu ne’e jornalista sira halo tanba bele fó ona espasu ba komunidade sira hodi fó sai sira nia lian. Liu hosi programa ida ne’e mos oinsa bele fó hanoin ba Governu atu bele implementa fundu klimátika ba area sira ne’ebe maka seidauk hetan projeitu fundu klimátika hodi hadia bee-moos, saneamentu, estrada aat no setor produtivu sira atu bele halo mitigasaun ka adaptasaun ba reziliénsia asuntu mudansa klimátika iha Timor-Leste.

Iha oportunidade hanesan, Kordenador Strategy and Engagement Lead Oxfam in Timor-Leste Adilsonio da Costa Junior aprofunda, nia parte apresia tebes ba servisu ne’ebe AJTL halo liu hosi kolaborasaun hamutuk ho OXFAM iha Timor-Leste, hodi kontinua habelar programa media tour ba munisípiu sira iha territóriu nasionál.

“Projetu ne’ebe apoiu hosi OXFAM Honkong ba mudansa klimátika ne’e hanesan projeitu ne’ebe foka barak liu kona-ba oinsa impaktu mudansa klimátika ba komunidade sira liu-liu ba maluk sira ne’ebe vulnerável liu hanesan feto no ema ho defisiénsia ne’ebe hetan impaktu makas husi klima ne’e rasik”.

OXFAM hakarak servisu hamutuk ho jornalista sira hodi explora klean kona-ba situasaun ida ne’e iha nivel komunidade no oinsa ajuda politika Governu hodi investe orsamentu ba problema ne’ebe sosiedade enfrenta iha area rural.

“Ita espera rezultadu hosi media tour ne’e rasik sei lori reportajen ne’ebe mak diak no investigativu, karik bele lori dadus no informasaun importante ne’ebe bele uza hodi ajuda governu ka politiku nain sira, atu bele uza evidensia ida ne’e hanesan baze ba sira nia politika no programa sira, no mos orsamentu ne’ebe governu investe bele responde ba nesesidade komunidade ne’ebe afeta hosi krize klimátika ne’e rasik”.

Nia dehan, OXFAM nafatin servisu hamutuk ho AJTL hodi sai hanesan aliadu estratéjiku ajuda governu no komunidade sira hodi haluan liutan lian laek sira ne’ebe dala barak menuz hetan kobertura husi média iha Timor-Leste.

Lider Oxfam iha Timor-Leste ne’e realsa, liu hosi programa média tour ne’e hetan rezultadu pozitivu hosi governu, ezemplu hanesan joven sira ne’ebe hola parte iha atividade konservasaun bee hanesan TILOFE iha Ermera, sira kontinua hetan atensaun makas hosi governu, tanba grupu joven ne’e mai ho inisiativa rasik servisu hamutuk ho komunidade no autoridade sira hodi konserva bee uza matenek lokal ne’ebe sira iha.

“Tuir planu AJTL ho OXFAM sei habelar programa media tour kona-ba asuntu agrikultura no setor produtivu sira seluk, kobertura media sei la akontese deit iha Díli maibe ita sei servisu hamutuk ho AJTL hodi kontinua explora diak liutan kreatividade no matenek lokal ne’ebe eziste iha komunidade, oinsa ita bele reporta informasaun sira ne’e hanesan dadus no evidensia ne’ebe bele ajuda ita nia parseiru dezenvolvimentu sira bele implementa politika ne’e diak”

Entretantu, média nasionál ne’ebe sei tuir mèdia tour ba iha Oe-Cusse hamutuk sanulu resin-lima (15), mak hanesan média SAPNews, RTTL.E.P, Neon Metin, Lafaek News, Democracia, Orluli News Ainaro, Media One Timor, Díli Post, Timor Post, Jornal independent, Radio Liberdade, Tatoli, TVE, GARDA MOR no Média Labeh.

Jornalista : Marciana da Conceição