Prontu Serví ! Cabral Husu Xefi Suku Foun Reativa Demografia Suku
Imajem : Ministru Administrasaun Estatal (MAE) Tomas do Rosario Cabral iha Dili, 03/04/2025. Foto : Media MAE
SAPNewsTL, Díli : Hafoin fó tomada de posse ba autoridade Suku nain hat (4) Ministru Administrasaun Estatal (MAE) Tomas do Rosario Cabral enkoraja Xefi Suku sira atu organiza administrasaun, reativa demografia no livru (18) iha administrasaun suku.
Iha diskursu MAE Tomas Cabral hateten, Xefi Suku nia papel importante hodi ajuda governasaun lokal no dezenvolvimentu komunitariu iha baze hodi kria paz no estabilidade.
“Ba Xefi suku sira imi nia papel importante iha suku mak organiza administrasaun, kria paz no estabilidade, ajuda implementa programa Governu nian liu-liu ba programa prioridade PNDS, no reativa demografia no livru (18) iha kada suku”. Ministru Administrasaun Estatál Tomas Cabral hato’o lia hirak ne’e liu husi nia diskursu hafoin fó tomada de posse ba Xefe Suku eleitu nain haat (4) iha salaun VIP MAE Kaikoli, Quinta (03/04/2025).
Nia fundamenta, ba Xefe Suku sira atu halo servisu tuir juramentu ne’ebé ohin simu iha tomada de posse, xefe suku sira tenki hakbesik-an ba populasaun sira, xefe suku sira ne’ebe foin simu posse atu fila fali ba ida-idak nia suku hodi organiza servisu rua ne ebe importante iha suku, ligadu ba administrasaun no organiza populasaun iha suku no aldeia sira.
Iha oportunidade hanesan, Xefi suku Laku Mesak Postu adminitrativu Laclo Munisípiu Manatuto,
Luis Mendonça informa, hanesan lideransa foun prontu hodi simu responsabilidade responde ba komunidade nia preokupasaun iha baze no defende povu nia direitu asesu ba infraestrutura bazika.
“Husi tomada pose ohin ne’e katak ita hanesan xefi suku simu kna’ar ida ne’e atu halo atendimentu ba iha suku, prontu atu halo servisu sira mak hanesan, defende povu nia direitu, nune’e nafatin haree ba povu kbiit laek no ema defisiensia sira tanba sira mak hili, prontu hodi servi sira no garante katak atu la’o tuir mensajen sira ne’ebe mak ohin ministru ko’alia”.Luis Subliña.
Lideransa foun ne’e hatutan, nia parte sei obedese ba termu komprimisiu ne’ebe ohin nia rasik deklara bazeia sira ninia mandatu ne’ebé prevista iha artigu 11⁰ pontu 1 husi lei numeru 9/2016 hateten katak “Membru sira husi Konsellu Suku hahu sira-nia mandatu ho tomada posse iha reprezentante Governu nian hodi apoiu servisu governasaun lokal no dezenvolvimentu komunitariu iha baze.
Enkuantu, total populasaun iha suku Laku Mesak postu adminitrativu Laclo hamutuk 3.240 kompostu husi aldeia lima mak hanesan ,Aldeia Nakaleu ,Aldeia Tagamu ,Aldeia Readodok ,Aldeia Hatukona ,no aldeia Ilagou
“Tuir dadus provizoriu iha suku Laku mesak
postu Laclo populasaun sira purvolta 3. 240 ital ne’ebe mak ami rejistu iha aldeia lima (5) ne’ebe pertense ba Suku Lacu-Mesak”.
Entretantu, iha serimónia tomada de posse ne’e Ministru Administrasaun Estatal akompaña husi Presidenti Autoridade Munisipiu Manatuto no Lautem, no Kargus Xefias sira iha MAE, hodi atribui kna’ar foun ba Xefi suku nain hat (4) hosi Munisipiu Manatuto (2), Ermera (1), no Lautem (1).
Jornalista : Guilhermino Ramos da Cruz
