Realiza Capping Day ! Estudante FMCS Deklara Prontu Servi Komunidade

SAPNewsTL, Díli – Estudante Universiade Nasional Timor Lorosa’e (UNTL) Fakuldade  Medicina  Siensia Saúde (FMCS), hala’o Capping Day ba estudante  akademika tinan 2024 iha salaun delta nova.

Reprezentante estudante  Kursu Licensiatura parteira Epifania Amaral Cardoso, sente orgullu, no fo agradese, tanba husi Cappyn Day  ida ne’e sira bele  hametin liu tan unidade, no amizade, nune’e garante katak futuro oin mai sai profisional ida ne’ebé di’ak iha saúde, no hatudu prestasaun liu husi servi povu doben Timor.

“Ha’u sente orgullu tebes tanba finalmente durante tinan hirak nia laran ami eskola uza ropa hitam puti, maibé ohin loron ami realiza ona ami nia capping day, tanba liu husi Capping Day bele hametin liu tan ami nia unidade, no amizade, ami garante sai profisional saúde ida ne’ebé diak no kualidade hodi presta servisu ne’ebe diak ba povu no nasaun iha futuru”. Dehan estudante Epifania Amaral Cardoso iha salaun delta nova, sexta 14/06/2024.

Esperansa hateten, nia espera katak sira bele sai hanesan pessoal saúde ida ne’ebé di’ak hodi kontribui ba dezenvolvimentu saude publika iha Timor-Leste.

“Ha’u nia esperansa ba futuru espera katak, aban bairua iha futuru oin mai ami sira iha ne’e, bele sai hanesan pesoal saúde ida ne’ebé maka di’ak hodi kontribui ba nasaun Timor-Leste ida ne’e”. Nia akresenta.

Esperansa mos husu ba estudante Universidade Nasional Timor Lorosa’e (UNTL) liu-liu Fakuldade Medicina Ciênsia de Saúde (Sigla Português, FMCS), tenke esforsu aan atu sai profesional saúde ne’ebé hatene respeitu, haraik aan no susesu iha futuru.

Reprezentante husi estudante Cursu Lisensiatura Enfarmagen Francelino da Costa Pinto konsidera capping day impostante tebes tanba ne’e sai hanesan inisiu ba sira nia knaar nu’udar enfermeiru no parteira, momentu ne’ebé furak no espasu di’ak hodi prepara sira bainhira hakat ba hala’o misaun iha terenu.

“Atividade Capping Day ne’ebé ohin realiza importante tebes, ha’u hanesan estudante agradese tebes tanba ida ne’e sai hanesan  inisiu ba ami nia knaar nu’udar  enfremeiru no parteira,  no sai momentu inisiu ne’ebé furak ba ami, espasu ida  hodi prepara aan di’ak liu tan,  bainhira atu hakat ba terenu  hodi pratika iha ne’ebá, no estagiu atu nune’e ami bele atende ema hotu ne’ebé prezisa ba nesesidade liga liu ba parte saúde nian, ami bele atende ho fuan laran”. Dehan Francelino da Costa Pinto.

Francelino deklara, promesa ne’ebé sira halo atu asegura ba ema nesesidade hanesan ohin juramentu no promesa ne’e atu asegura pasiente sira bainhira tun ba terenu.

“Ba promesa ohin ami halo katak, atu asegura ba ema nia nesesidade hanesan ohin ami halo juramentu no promesa bainhira ami tun terenu, ami asegura ba pasiente hotu ne’ebé maka mai halo konsultasaun, ami nafatin atende ho di’ak no laran luak nafatin tuir buat hirak ne’ebé ohin ami halo promesa ba”. Nia esklarese.

Francelino husu ba estudante sira ne’ebé maka hamahan aan iha Universidade Nasional Timor Lorosa’e (UNTL), liu-liu fakuldade ne’ebé realiza Capping Day, tenke iha espiritu vontade no luta hodi servi, aprende no kontribui ba saude publika iha komunidade nia leet.

“Mensagen ba estudante Universiade Nasional Timor Lorasae (UNTL), katak kuda espiritu vontade no espiritu luta atu nune’e bele kontribui ba ita nia rai, lolo liman hodi haree no servi ba ema hotu no ajuda ba ema ne’ebe prezisa ita nia tulun”. Nia husu.

Magnífiku Reitor UNTL João Soares Martins parabeniza estudante foun sira tanba bele hakat ona ba faze tuir mai, Reitor UNTL ne’e mos husu estudante sira atu estuda makaas no hatudu prestasaun servisu ne’ebe diak ba komunidade sira, wainhira hala’o estajiu ka servisu iha komunidade nia leet.

“Ohin marka istoria foun ida iha FMCS, parabens ba imi hotu ne’ebe ohin halo juramentu antes ba hala’o pratika iha klinika no ospital sira, ha’u husu imi hotu halo tuir saida mak imi promete ohin, wainhira hala’o knar iha baze”. Magnífiku Reitor UNTL João Soares Martins husu

Enkuantu, iha serimonia capping day refere hetan partisipasaun husi Magnifiku Reitor UNTL, Dekana Fakuldade Medisina e Siensia Saude, korpu dosente sira inklui konvidadu sira.

Jornalista : Ermelinda Soares