Realiza Hand Over ! Forma Foinsa’e Ne’ebe Matenek Presiza Servisu Hamutuk

SAPNewsTL, Lautem – Hafoin remata serimónia entrega poder (hand over) ba Gabinete Diretiva foun Eskola Sekundaria Jeral Fernando Lasama Luro nian, Diretor Edukasaun Munisipiu Lautem Anibal Fernandes husu Professor sira atu servisu hamutuk hodi lori eskola ne’e ba oin liuliu iha prosesu aprendijazen.

Iha intrevista ho Diretor Servisu Edukasaun Munisípiu Lautem Anibal Fernandes haktuir Professor sira presiza servisu hamutuk hodi lori eskola ne’e ba oin liuliu iha ensinu aprendizajen nian.

“Iha inisiador, iha mos kontinuador, nune’e kontinua buat ne’ebe di’ak, servisu hamutuk, servisu ho ekipa atu nune’e servisu ne’e bele la’o tantu sesante tantu nomeadu hamutuk atu bele lori eskola ne’e ba oin liuliu prosesu aprendijazen ne’e la’o los, wainhira professor sira servisu hamutuk ho Diretor ho Diretor Adjuntu foun hamutuk hodi servisu di’ak”. Katak Diretor Servisu Edukasaun Munisípiu Lautem Anibal Fernandes iha Edifisiu ESG Fernando Lasama Luro, 10/06/2024

Diretor Anibal hatutan atu garante edukasaun ne’ebe kualidade presiza tebes mestre sira nia responsabilidade nu’udar manorin hodi bele eduka oan sira sai matenek.

“Timor atu la’o di’ak, Timor atu ba oin liuliu iha parte edukasaun ne’e presiza Mestre hotu-hotu nia responsabilidade, oinsa mak eduka oan sira atu sai matenek, eskola ida kualidade ne’e ita bele atinje, ne’ebe atu lori mundu mai Timor no lori Timor ba mundu ne’e liu husi edukasaun”. Tenik Diretor.

Iha fatin hanesan, Reprezentante Administrador Postu Administrativu Luro Alfredo Ximenes parabeniza gabinete diretiva foun no husu atu responsabiliza ba kargu foun ne’e ho didi’ak no labele orgullu ho kargu ne’e.

“Parabens ba Diretor ho Adjuntu foun no agradese ba Diretor sesante ba esforsu lubuk ida ne’ebe halo ba prosesu aprendijazem durante ne’e, husu atu labele orgullu ba kargu ne’e tanba kargu ne’e hanesan responsabilidade ida tenke responsabiliza ho diak, labele sente kargu ne’e hanesan bo’ot ida no labele orgullu demais ho kargu ne’e”. Alfredo informa

Entretantu, Diretor foun Eskola Sekundaria Jeral Fernando Lasama Luro Tomas Mouzinho fo agradese ba gabinete diretiva sesante ne’ebe servisu makaas durante mandatu no ohin bele entrega hikas mandatu ne’e ba estrutura foun, espera bele servisu hamutuk nafatin hodi dudu no lori eskola sekundaria ne’e ba oin ho susesu.

“Ha’u agradese ba parte hotu liu-liu ba gabinete diretiva sesante ne’ebe servisu servi oan sira to’o ohin loron agradese ba esforsu hotu-hotu ne’ebe halo, ita sei hamutuk nafatin lori eskola ne’e ba oin”. Tomas agradese

Enkuantu, serimonia ne’e partisipa husi Diretor Servisu Edukasaun Munisípiu Lautem ho nia ekipa, Reprezentante APA Luro, Komandante PNTL Eskuadra Luro, Reprezentante Veteranus Luro, Autoridade Suku iha Postu Luro, Reprezentante NGO CHILDFUND iha Luro, Reprezentante AHHA SOLS iha Luro, Diretor EBC sira, Ekipa Instalador inklui estudante sira.

Jornalista: Denilia Soares & Olandina Pinto