Relembra Ba Aswa’in Sira Nia Luta, Kombate Krime No Ki’ak Iha TL
SAPNewsTL, Ermera: Klibur Estudante Juventude Fatubessi ho joven movimentu sira realiza seminariu nasional hodi komemora loron FALINTIL ba dala XLVII (47), Objetivu husi seminariu ne’e hodi hanoin hikas lider rezisténsia sira nia luta ba independénsia nasional.
Tuir Sekretáriu Estadu Juventude no Desportu Abrão Saldanha hateten komemora loron FALINTIL nu’udar reflesaun ida ba juventude Fatubessi
“SEJD apoiu inisiativa joven sira iha Fatubessi ne’e atu halo refleksaun ba komemorasaun loron FALINTIL nian, oinsa mak importansia espiritu FALINTIL nian hodi sustenta luta ba libertasaun nasional, luta ba ukun rasik an nian ho atividade oin-oin ne’ebé komemora iha suku ida ne’e”. Dehan Sekretáriu Estadu Juventude no Desportu, Abrão Saldanha ba jornalista sira iha Fatubessi, Segunda-Feira, 15/08/2022.
Governante ne’e hatutan oinsa bele lori joven sira iha sentidu pertense ba nia rai, iha kreatividade hodi kontribui ba nasaun nia desenvolvimentu.
“Hein katak komemorasaun ne’e bele lori joven no estudante sira, oinsa iha sentidu pertense ba Timor Leste no buka kreatividade, realiza sira nia poténsia oin-oin atu nune’e bele kontribui ba dezenvovimentu nasionál iha ita nia rain espesialmente iha Ermera Fatubessi no Timor laran tomak”. Nia realsa
Sekretáriu Estadu ne’e fundamenta governu nafatin ho nia papel hodi kontinua kria espasu ba joven sira.
“Governu nia papel maka kontinua kria espasu ba joven sira liu husi programa edukasaun, formasaun dezenvolvimentu ekonómiku seluk ne’ebé maka bele ajuda joven sira no kria espasu oin-oin para joven sira bele realiza sira nia potensiál oin-oin”. Nia salienta
Iha fatin hanesan Eis Jeneral F-FDTL Lere Anan Timur hateten rai Ermera Fatubessi rai istóriku no mos baze FALINTIL nian ne’ebé uluk sai lider sira nia subar fatin.
“Ha’u mai iha rai Fatubessi, rai ida ne’ebé ke istóriku ida liga ba funu ba ukun an nian, rai Ermera mos hanesan fatin istóriku ida tanba ita nia lider ida mos subar iha fatin ida ne’e to’o mate iha fatin ida ne’e maka Saudozu Konis Santana, Fulan Agostu loron ruanulu (20) ne’e loron FALINTIL ne’e nia ezistensia ba XLVII, ami ne’ebé uluk halo funu hakarak konta oituan historia kona-ba FALINTIL nian ba ita nia oan no bei-oan sira kona-ba istória funu nian, tanba saida mak ita hakarak ukun an i FALINTIL maka se, ita nia lideransa maka se, ohin ha’u hato’o ona ba sira”.Tenik Eis Jeneral
Lider Rezisténsia ne’e fundamenta joven sira konfia an buka servisu maske ki’ak maibé oinsa moris ho dignidade.
“Ha’u lor-loron sempre simu joven sira tanba sira hakarak sai forsa, polísia konfia an buka servisu tenki halo oinsa para bele moris iha Ermera, Suai, Lospalos, naran katak keta komete krime, ita kiak ne’e la’os moe ida, na’ok ne’e mak ita moe no komete krime ne’e mak ita moe, o kiak tenki halo oinsa para moris ho dignidade ho onra ida, ne’e maka importante liu”. Nia hakotu
Jornalista: Ekipa Kobertura
Editor : Luis dos Santos