Sarani Hari’i Ho Voluntáriu To’o 40%, PM Xanana Apoia & Finaliza Kapela Manutasi

Imajem : Primeiru Ministru Kay Rala Xanana Gusmão iha Ainaro, 14/02/2026. Foto : Média GPM. 

SAPNews Pro, Ainaro – Populasaun sira hosi suku Manutasi, postu administrativu Ainaro Vila, munisípiu Ainaro konvida Primeiru-Ministru (PM), Kay Rala Xanana Gusmão hodi hala’o vizita bá Kapela Nossa Senhora do Rosário de Fátima Manutasi, suku Manutasi, Parókia Nossa Senhora de Fátima Ainaro.

‎‎Xefe Suku Manutasi, Manuela da Silva Caldas lori komunidade Manutasi nia naran hato’o agradesimentu kle’an bá Primeiru-Ministru tanba fó ona apoiu bá finalizasaun konstrusaun kapela ne’e.

‎”‎Kapela ne’e konstrui hosi sarani Manutasi ne’ebé ho sentidu solidariedade no voluntáriu fízikamente atinji ona 40%. Tanba kbiit la to’o maka antes ne’e husu apoiu bá PM Xanana”. Hatete Xefe Suku Mandela da Silva Caldas iha Ainaro, 14/02/2026. Sita Média GPM

‎‎Tanba ne’e, iha vizita PM Xanana nian iha tinan 2025 entrega kedan apoiu ne’e bá Autoridade lokál Manutasi hodi finaliza. Kapela ne’e lokaliza iha Fatuk Maria, Suku Manutasi ho medida 14x24m.

‎‎Iha vizita PM Xanana nian ne’e, akompaña mós hosi Ministru Obras Públikas, Samuel Marçal ho Sekretáriu Estadu Terras no Propriedades, Jaime Xavier Lopes.