Selebra 12 Novembru ! EUTL Hametin Espíritu Resistênsia & Kontrola Desizaun Polítika
Imajem : EUTL hala’o marsa popular komemora 12 novembru 1991. Dili, 12/11/2025
SAP News TL, Díli : Iha selebrasaun tinan 34 Masakre Santa Cruz, reprezentante Portavós Estudante Universitáriu Timor-Leste (Sigla EUTL), Caitano da Cruz deklara, marsa EUTL la’os selebra deit Masakre Santa Cruz, maibé hafanun fila fali espiritu rezisténsia juventude Loriku aswa’in iha pasadu.
𝐃𝐢𝐫𝐜𝐢𝐚 𝐁𝐚𝐭𝐢𝐬𝐭𝐚 & 𝐃𝐚𝐧𝐢𝐞𝐥 𝐝𝐚 𝐒𝐢𝐥𝐯𝐚 – 𝐒𝐀𝐏𝐍𝐞𝐰𝐬𝐓𝐋
Iha intervista Portavós EUTL hateten, EUTL ho vizaun ida luta prolongada sei nafatin hamrik hamutuk ho povu maubere tomak husi kámada sosial no estudante hotu-hotu nafatin akonpaña dinamiku polítiku interna ninian hodi nafatin ezize ba ukun nain sira, foti desizaun saida de’it tenke bazeia ba interese povu nian no esperansa moris di’ak ba povu.
“Marsa EUTL la’os atu festeza de’it maibé ita nia hakarak atu halo reflesaun klean ida hodi hafanun fila fali espiritu rezisténsia juventude Loriku aswa’in pasadu nian ba juventude ka foinsa’e ohin loron hodi kontinua hatutan ba libertasaun povu nian”. Dehan Caitano da Cruz ba SAPNews, iha Semiteriu Santa Cruz, Quarta-Feira, (12/11/2025)
Estudante akademiku salienta, EUTL aprende husi luta juventude loriku aswa’in iha rezisténsia pasadu nu’udar inspirasaun no responsabilidade ba jerasaun foun tomak hodi hatutan sira nia luta iha libertasaun povu.
“Nune’e fó hanoin nafatin ba joven no foinsa’e sira hotu, hafanun nafatin ita-nia espiritu luta tanba ita-nia jerasaun pasadu liuliu juventude loriku aswa’in sira nia sai eransa boot ida mai ita oinsá atu kontinua hatutan sira-nia luta ba futuru rai no povu ida ne’e ninian” Tenik nia.
Kondisaun ne’e dudu EUTL hodi hatutan fila fali luta juventude Loriku aswa’in iha pasadu oinsá vizaun luta atu konkretiza libertasaun povu ne’ebé justu no próspera.
“Esperansa ba vizaun libertasaun pátria ita konsege konkretiza maibé libertasaun povu ita seidauk konkretiza, to’o ohin loron povu kontinua moris ho kondisaun pobreza, kiak, mal nutrisaun, analfabetizasaun no setor estratéjia ne’ebé relasaun direita ba povu kona-ba saúde, edukasaun no agrikultura nafatin sei frazil teb-tebes” Dehan Nia.
Portavós EUTL mós hato’o mensajen ba publiku no estudante universitariu sira atu kontinua defende direitu povu nian, ne’ebe istorikamente mai husi luta iha tempu naruk.
“Mensajen ba ita hotu katak liu husi marsa ida atu hanoin hikas fali juventude loriku aswa’in ne’ebé sakrifika nia vida iha trajedia, Masakre Santa Kruz 12 Novembru 1991 tanba sira mai ho prinsipiu ida atu defende direitu ba lialoos povu ninian ba libertasaun pátria no libertasaun povu”.
Iha ambitu reflesaun tinan 34 ne’e, EUTL observa katak situasaun atual ne’ebé Timor enfrenta dadaun povu kontinua moris ki’ak, hetan diskriminasaun, injustisa sosial no povu seiduak atinji nia mehi ba dezenvolvimentu sustentavel no inkluzivu.
Entretantu, EUTL sei firme nafatin hodi kaer metin espiritu nasionalismu no patriotismu ne’ebe heroiku sira husik hela, hodi akompaña prosesu implementasaun programa sira ne’ebe governu sentral ezekuta la bazeia ba nesesidade urgente povu nian.