Selebra Dies Natalis ! “Hafoun Komprimisiu, Hamrik Ain Leten & SAPNews Ba Profissional”

SAPNewsTL, Dili : Diskursu Ofisiál Prezidente Mídia SAPNewsTL iha ámbitu selebrasaun dies natalis datoluk no lansamentu revista vijita papal iha Timor Leste.

Povu Doben Timor Leste Iha Rai-Laran no Diáspora

Ita hotu nia agradese ba Nai Maromak Santíssima Trindade ne’ebe bele tulun no halibur ita hotu, permiti ita bele hasoru malu iha fatin ida ne’e ho saudável no kontente, liliu Mídia ne’e bele hamriik metin to’o ona tinan tolu, husi fatin ida ne’e mos, ita fo Onra no Gloria ba Heroi no Mártir sira ne’ebe mate ba rai ida ne’e inklui Jornalista Internasional sira ne’ebe husik ona mundu, ne’ebe nakfilak ita nia rain, sai estadu ida soberanu, Livre no demokrátiku iha mundu.

Tinan 2025 nu’udár tinan atu halo mudansa ba mídia juvenil, estudantil no akadémiku ne’ebé hanaran SAPNews Timor Leste. Ezisténsia SAP News nian dala tolu, la halo buat barak liu maibé mínimu bele kontribui ba dezenvolvimentu komunikasaun sosial.

Ezisténsia ne’ebé hahú husi zerro mai to’o ohin loron, la dependénsia ba ema ruma, la iha influensia husi poder polítiku no ekonómiku tanba ita garante independénsia editorial tuir kode etika jornalista nian, Lei komunikasaun sosial, no konstituisaun RDTL artigu 40o no 41o kona-ba liberdadee imprensa no liberdade espresaun.

To’o ohin loron, SAPNews konsege publika ona notísia iha ninia Website hamutuk 2.730 (ekivale ba 694.335 leitores), plataforma Facebook notisia 4.140 (durante fulan fevereiru 5.447.072 maka haree). Youtube notisia 232 (ekivale viewers 533.100) Tiktok notisia 223 (ekivale viewers 583.000). Hirak ne’e hotu nu’udar rezultadu prestasaun serbisu jornalista sira hotu nian no fontes sira hotu tanba bele koopera ho ami hodi fo informasaun. Ita nia basa liman ba sira hotu.

Mudansa teknolojia ne’ebé iha no influensia parte external ne’ebé sai hanesan mos dezafiu ida ba independensia editorial nian atravez poder politiku no ekonomia, halo renking liberdade imprensa nian komesa monu ba dadaun.

Nune’e mos media juvenil no estudantil SAPnews ne’ebé enfrenta situasaun hirak ne’e, maibé sira ne’e hotu sei la sosa no hanehan prinsípiu mídia SAPNews nian hodi informa, eduka, inspira no konstrui sosiedade Timor Leste ida mais justu, prósperu, amor, paz, no fraternu.

Exelénsia, Señores no Señoras

Tinan ida ne’e SAPNews mai ho tema, “Renova Kumprimísiu! Hamriik Ain Leten, SAPNews ba Profesionál”. Mídia SAPNews nu’udar plataforma online ida ne’ebé harí husi estudante universitáriu no formandu jornalizmu, mai ho nia natureza ne’ebé úniku, hoi ispiritu nasionalizmu no voluntarizmu. Ho nia estrutura ne’ebé hili ka ajusta kada tinan tolu atravéz reuniaun jerál maka partisipa husi membru hotu ne’ebé hamahan an iha mídia ida ne’e. Nune’e ba tinan ida ne’e SAPNews ninia estrutura ita renova atravéz reajustamentu tuir nesesidade instituisionál nian.

SAPNews ne’ebé harí husi zero la iha patrosinadór ou sósiu ida ne’ebé mai ho kapitál boot maibé SAPNews eziste tinan tolu ona sem hetan apoiu material husi ema ruma, maibé ami kumprimitidu no fiar an sei hamriik mesak husi ohin ba oin no ba nafatin, hodi dezenvolve mídia ida ne’e hamutuk ho ami nia konselleiru no konselleira sira, inan ho aman sira, haree na’in no rona na’in sira hotu atravéz sira nia orasaun, korajen no motivasaun.

Nu’udar mídia online ida ne’ebé mós komesa famozu dadaun iha públiku ninia matan no tilun, ema balu komesa atake ami hodi dehan fahe informasaun falsu, buka popularidade ka viewers, mídia partidu nian no seluk seluk tan.

Maibé hirak ne’e hotu la sai obstáklu ida mai ami hodi satan netik ami nia jornada, más ami konsidera hirak ne’e hotu nu’udár dezafia ida mai ami atu hamriik hodi ko’alia lia loos, sai lian ba lian laek sira, hodi fo roman ba sira be ema la haree no haluha sira.

SAPNews hola papel importante hodi rekolla no publika informasaun sira, nu’udar fontes informasaun ida atu hato’o ba makaer ukun sira hodi haree no rona povu ninia halerik no opiniaun ba desizaun polítika ne’ebe hatan ba interese povu no nasaun nian.

Nune’e selebrasaun ezisténsia SAPNews nian ba dala tolu ida ne’e, ami komprimitidu sei garantia liberdade imprensa no espresaun iha mundu espesialmente iha rai doben Timor Leste. SAPNews sei sai profesionál, independente, imparsialidade no balansu iha ninia kobertura no publikasaun ba informasaun hotu-hotu tuir kondisoins mak ami iha.

Povu Doben Timor Leste Mak Ha’u Hadomi

Iha tinan 1989, Santu Padre João Paulo II vizita Timor-Leste ho lema ‘Neon ida deit, laran ida deit’ ho mensajem save ‘‘imi masin rai nian no naroman mundu nian’’, liu tiha tinan tolu nulu resin-lima (35), Papa Francisco halo vizita pastoral ne’ebé mai ho eslogan ‘‘Atu Imi Nia Fiar Sai Imi Nia Kultura’’ nu’udar tema sentral.

Liafuan save husi tema sentral ne’e maka fiar no kultura, fiar hanesan buat abstratu ne’ebé labele haree ho matan no kaer ho liman, maibe fiar ne’e bele expresa hosi hanoin, orasaun, hahalok no toman ema nian.

Kultura maka ábitu ne’ebé sosiedade hatudu hosi atetude no prátika iha família, igreza no nasaun. Papa Francisco iha ninia mensájen dehan “Jovens tenki halo barullu, tau matan ba ferik katuas sira, kuidadu labarik sira, nasaun ne’ebe iha futuru maka nasaun ne’ebé iha jovens”, ninia liafuan ikus iha aeroportu Internasional Nicolau Lobato Comoro dehan “Cuidem Bien Este Pueblo Maravilhoso”. katak “Kuidadu didiak povu diak ida ne’e”. Mensajen xave hirak ne’e Ami hanoin nafatin.

Tuir Bíblia, Saun Tiagu haktuir, “Fiar moris ho nia hahalok, fiar sai lolos ho hahalok moos, Abrão fiar ida ne’e nu’udar Maromak nia justisa” (Tiago 3:22-23). Fiar ne’ebe la ho hahalok, fiar ne’e mate, enkuantu hahalok ne’ebe la ho fiar, hahalok ne’e la folin.

Durante vijita Papa Francisco nian, Mídia ida ne’e hola papel importante iha kobertura hodi kolleta no divulga mensajen importante sira.

Hafoin Vijita Sua Santidade Papa Francisco nian iha Timor Leste, Mídia SAPNews ho inisiativa rasik halo elaborasaun ba Revista ida ne’e sai hanesan memória ida ne’ebé importante no ineskesível atu tau iha Biblioteka sira nu’udár memória importante iha pós independénsia ba jerasaun futuru nian bele lé hodi hatene hodi hatutan valores hirak ne’e.

Ami nia dejezu ho Revista Vijita Sua Santidade Papa Francisco nian ida ne’e bele tulun ita hodi hatene mensájen espesial sira husi Sua Santidade ninia vijita ba Timoroan sira, sarani Indonéziu, Papua Nova Guiné no Singapura.

Ami konsidera katak “Momentu espesial sira ne’ebe akontese sei la repete tan, nune’e mós istória ne’ebé iha sei la lakon wainhira ita hakerek”. Ita hotu hatene, oras ne’e Santu Padre moras, ita reza atu nia isin di’ak fila fali iha loron aban bainrua.

Inan Aman sira no Maluk Haré Na’in Sira Mak Ha’u Hakneter

Desde tinan 2022, SAPNews hala’o atividades kobertura ho de’it telefone no limitasaun iha buat oioin em termos ekipamentus no finanseira. Maibé hirak ne’e hotu nu’udár prosesu teste ida ba ami. Tinan ida ne’e Felizmente Família boot mídia SAPNews konsidera nu’udár tinan grasa nian, ne’ebé hetan apoia doasaun pakote ekipamentus live streaming nian husi Família boot Sr. Francelino da Conceição ne’ebé ho laran luak no laran kmaus, hodi apoia SAPNews. Ita hotu nia basa liman ida ba hodi fo agradese ba laran diak ida ne’e.

Maske ho kuantidade ne’ebé ki’ik mas ami konsidera ida ne’e nu’udár grasa boot ida mai husi Nai Maromak atravéz Sr. Francelino da Conceição, Traballadór Timoroan ida ne’ebé ho nia kosar been rasik iha boa vontade hodi apoia ami. Ami nia agradesimentu no orasaun mais klean ba Sr. ho Família, dezeju bom traballu ba ita bot Nai Maromak Haraik bensaun ba ita.

Exelénsia Konvidadus no Maluk Partisipantes Hotu Mak Ha’u Hadomi

Molok atan ha’u atu hases aan husi fatin ida ne’e permiti ha’u lori família boot Mídia SAPNews nia naran, atu fo agradese wain ba Sua Exelénsia Ex PM Dr. Marí Alkatiri no Rev. Mgr. Marco Sprizzi ne’ebé disponível hodi fo tempu mai ita hotu halo palestra sobre tema ne’ebé ami rekomenda inklui fo biban hodi ami halo audiensia no rona opiniaun barak.

Agradese wain ba Sua Exelénsia SEComS, Prezidente Konsellu Imprensa, Prezidente Ezekutivu Fundasan Cristal Dr. Agostinho dos Santos Gonçalves ne’ebé autoriza Salaun, CEO Telkomcel ne’ebé apoia aniversáriu no imprimi Revista, Konselleru sira, estrutura SAPNews no Jornalista sira hotu, inan aman sira ne’ebé sempre apoia ami oan sira ho imi nia tulun ami bele hala’o serbisu ida ne’e maske todan maibé ami sente kmaan wainhira ho imi hotu ninian orasaun, korájen no motivasaun.

Ami komprimitidu sei hala’o serbisu ida ne’e ho neutru, independente, edukativu, inspirativu no profisionál tuir Konsituisaun RDTL, Lei Komunikasaun Sosial no Kódigu Étika Jornalista.

Ami husu ba SEKOMS hodi kontinua fo atensaun ba Media hothotu ho igual no apoia, nune’e bele garante kualidade informasaun, sustentabilidade orgaun komunikasaun no liberdade informasaun ba ida-idak iha territóriu nasionál.

Husu mós ba konsellu imprensa hodi regulariza no monitoriza nafatin orgaun komunikasaun sosial hotu inklui kontinua fasilita formasaun ba jornalista sira hodi hadia kapasidade intelektual, tékniku no profisional tuir lei inan no lei oan sira.

SAPNews imi nian, SAPNews ita hotu nian, SAPNews bele no ba oin nafatin. Nai Maromak no Matebian sira Haraik tulun mai ita hotu iha Misaun Nobre ida ne’e.

Viva SAPNews
Viva Timor-Leste
Salaun ISC Balide, 26/02/2025