UNTL : PR Horta Laiha Vontade Kombate Korupsaun Maibe Proteze Koruptor
SAPNewsTL, Dili : Associação Acadêmica Estudantil Universidade Nacional Timor Lorosa’e (UNTL), konsidera desizaun Prezidente da Repúblika da RDTL, José Ramos Horta ne’ebe fo Indultu ba kondenada nain rua hanesan Sra. Emilia Pires no Madalena Hanjam ne’e hatudu Xefe Estadu laiha vontade kombate korupsaun iha Timor-Leste.
Associação Acadêmica Estudantil Universidade Nacional Timor Lorosa’e konsidera desizaun refere hatudu katak Presidente republika laiha vontade kombate korupsauntanba proteze koruptor sira ho indultu maske la koopera ho justisa.
“Ami konsidera prezidente da Repúblika laiha vontade diak hodi kombate korupsaun no hakarak koruptor sira livre husi responsabilidade criminal husi aktu neebe sira komete hasoru nasaun no Estadu RDTL.’
“Prezidente rasik promulga Lei nú. 20/2023, de 12 de dezembro kona ba procedimentu de concessão Indultu hodi revoga lei nú. 5/2016, de 25 de maio, ne’ebe preve rekezitu atu kondenadu ka kondenada presiza kumpri antes hetan indultu husi Prezidente da Repúblika maske prezidente hatene hela katak Lei nú. 20/2023, de 12 de dezembro bainhira entra em vigor sei protégé ka salva koruptor no koruptora sira husi responsabilidade kriminal ka kastigu. Ho promulgasaun Lei nú. 20/2023, de 12 de dezembro husi Prezidente da Repúblika, fo oportunidade ba governante sira ka polítiku sira ba ukun la tauk atu halo korupsaun tamba iha hela lei ida neebe atu proteje sira.” Dehan Porta voz Jopra Fernandes Amaral iha Kampus Sentral UNTL, 20/12/2023
Assosiasaun Estudantil UNTL konsidera indiretamente Presidente da Repúblika nudar protetor ba eis governante sira ne’ebe mak durante iha mandatu governativu komete krime korupsaun no kontra prinsípiu neebe hanaran Anti-Korupsaun neebe sai ona kultura ba nasaun no Estadu Timor-Leste.
“Ami konsidera Prezidente halo povu Timor tomak, laran kanek ka insatizfeitu no desmotiva autoridade judiciariu sira hanesan Juíz , Procurador no mos orgão auxiliar Ministeriu Públiku, hanesan CAC ne’ebe ho misaun principal hodi kombate korupsaun iha Timor-Leste, atu halo esforsu hodi lori koruptor sira ba tribunal hodi hetan kondenasaun tamba Presidente da Republika sei fo indultu ba kondenadu ka kondenada sira hodi livre ka liberta husi prizaun maske Ministeriu publiku no CAC halo esforsu makas hodi hetan provas hodi ikus mai tribunal bele kondena”. Jopra Fernandes Amaral Sublinha
Atual Senadu Estudantil Fakuldade Ciensia Ezatas ne’e mos husu ba Prezidente da Republika, ba oin, atu promulga diploma lejislativu sira neebe produz husi Parlamentu tenki análise no estuda didiak antes promulga atu ikus mai la bele fo deit benefisia ba, grupo balun ka elit sira deit hanesan exemplu promulga Lei nu. 20/2023, de 12 de Dezembru, neebe ikus mai kria injustisa social.
Senadu Estudante ne’e mos husu ba deputadu sira iha parlamentu nacional ne’ebe reprezenta povu atu haree fila fali Lei nu. 20/2023, de 12 de Dezembru ne’ebe promulga husi Prezidente no entra em vigor ona iha Estadu RDTL tanba Lei refere benefisia ka atu liberta koruptor sira husi kastigu no halo governante sira la tauk atu prátika korupsaun.
“Se deputadu sira laiha vontade polítika hodi reve lei refere mak hatudu katak ita boot sira laiha seriedade hodi kombate korupsaun iha rai doben Timor-Leste ida ne’e no ita boot sira mak hakarak asegura koruptor sira”.
Entretantu, antes ne’e Presidente Republika Jose Ramos Horta klarifika kata desizaun ne’e mai husi inisiativa PR nian bazeia ba Konstituisaun RDTL artigu 85 alinea i no dekretu Lei nu. 20/2023 komutasaun de pena tanba razaun umanitaria no seluk tan.
Jornalista : Isabel de Deus