Taís Modernu Domina Merkadu ! Soru-Na’in Husu Guvernu Kria Lei Regula Presu
SAPNewsTL, DILI : Soru Na’in Cançio Henriques husu Guvernu Timor-Leste hodi kria lei ida proteze folin tais orijinal no modernizadu, tanba daudaun ne’e taís lokal la folin iha merkadu nasionál.
Cançio Henriques konsidera Tais orijinal Timor-Leste hahu ona halo modifikasaun no modernizasaun oioin liliu iha supermerkadu sira, guvernu presiza halo lei hodi proteze presu taís iha merkadu nasionál.
“Husu guvernu tenki toma atensaun ba supermekadu sira, liliu halo lei hodi proteze tais lokal tanba iha era modernizasaun ema hahu modifika produtu lokal sira sai foun ho folin baratu, halo Tais Lokal sira la folin iha merkadu, ne’e bele kontribui ba hamenuz produsaun tais iha futuru tanba faan ema la sosa”. Tenik Sidadaun Cancio Heriques ba SAPNewsTL iha Lautém, 14/12/2023.
Cançio salienta, Tais ne’ebe produz sempre lori fulan rua ba leten, hafoin bele diak no hotu tanba nia prosesu naruk, entaun wainhira faan tenki tuir presu ne’ebe boot hanesan 40-100 ba leten, dala barak ladauk hetan rendimentu ne’ebe naton
“Produz tais ida mais ou menuz fulan rua ba leten, tanba prosesu hoban no soru ne’e lori tempu barak, maibe ho atividade ne’e bele hetan rendimentu naton hodi sustenta familia no oan sira ba eskola maske hetan uituan, tais ida ho presu 40-100 ba leten”. Nia
Cançio mos husu ba ema hotu hodi hakaas an produz nafatin tais, uza tais iha eventu improtante sira hodi promove identidade ne’e ba ema hotu, nune’e beiala sira nia eransa ne’e labele lakon iha futuru.
Bazeia ba rekomendasaun husi no. 8 husi Resolução do Parlamento Nacional n.º 2 2022 de 26 de Janeiro ne’ebé hatete katak “Apela ba Governu, komunidade sira, eskola sira no populasaun atu organiza asaun promosaun ba Tais iha loron 14 Dezembru kada tinan hodi hasa’e koñesimentu, divulgasaun no uzu Tais nian iha territóriu Timor-Leste ho komunidade timoroan iha mundu tomak.
Tais hetan rekoñesimentu internasionál husi UNESCO iha loron 14 fulan dezembru 2021, Parlamentu Nasionál Timor-Leste hasai no aprova kedas Resolusaun Parlamento Nacional n.º 2 / 2022 de 26 de Janeiro institui o dia nacional do Tais e aprova recomendação ao governo para a proteção e preservação do TAIS hodi defini loron 14 Dezembru sai hanesan Loron Nasional ba Tais
Enkuantu, ohin Loron 14 fulan dezembru 2023 Timor-Leste selebra loron nasional tais ba daruak, Timor-Leste konsidera tais nu’udar patrimoniu kultural ne’ebe hetan ona rekoñesimentu internasionál husi The United Nations Educational, Scientific and Cultural Organization (UNESCO) iha loron 14 fulan dezembru 2021. Tan ne’e Timor oan hotu tenki promove no dezenvolve tais ba futuru
Reportajen : Luis Pailofo