Tanis Haree Ninia Mama ! Teves Jr : “Ha’u Triste Tan Sei Kadeia Maske La Hetan Kondenasaun”.
Imajem : Arnolfo Arnei Teves Jr iha halo konferénsia imprensa iha Sede Gabinete Nasionál Investigasaun (NBI), Sidade Pasay, 30/05/2025.
SAPNewsTL, Filipina : Kongresista Negros Oriental ne’ebé hetan espulsaun Arnie Teves hamutuk ho ninia inan no advogadu sira hala’o konferénsia imprensa, durante konferénsia Arnei Teves hamonu matan-ween wainhira hasoru nia inan no tur iha nia sorin.
Marciana da Conceição – SAPNews / Fontes – Philippine Star
Arnei Teves hetan kapturasaun tanba hetan akuzasaun ho kazu asasinatu ba governadór matebian Roel Degamo inklui sidadaun sira balun iha Filipina.
‘Espera Katak Ida-ne’e Sei Hotu’
Eis Kongresista Negros Oriental, Arnie Teves espresa emosaun oioin hafoin kaer nia relasiona ho kazu asasinatu ba governadór matebian Roel Degamo.
“Ha’u triste tanba ha’u sei tama kadeia maski ha’u la hetan kondenasaun. Maibé iha parte seluk, ha’u kontente tanba ha’u bele haree ha’u nia inan hafoin tinan rua”. Hatete Arnie Teves durante halo konferénsia imprensa iha Sede Gabinete Nasionál Investigasaun (NBI), Sidade Pasay, 30/05/2025. Sita Philippines Star
Image : Arnolfo Arnei Teves Jr in Philippines
Teves mós apela ba prosesu judisiál ida ne’ebé lalais: “Ha’u hein katak tribunál sei rona kazu ne’e lalais. Ha’u fiar tebes ha’u nia advogadu sira. Ba ha’u, ha’u hein katak ida-ne’e sei hotu lalais.”
Eis-deputadu ne’e hetan kapturasaun husi Migrasaun iha Díli, Timor-Leste (27/05/2025), hafoin deporta fali ba Filipina tamba hetan akuzasaun omisídiu, inklui nia alegadu envolvimentu iha omisídiu Degamo no ema balun iha Pamplona, Negros Oriental iha Marsu 2023.
Oras ne’e, Arnolfo Arnei Teves Jr sei iha fatin detensaun Gabinete Nasionál Investigasaun (NBI) ne’ebé lokaliza iha resintu Prizaun Foun Bilibid (NBP) nian iha Sidade Muntinlupa, Filipina.
Konferénsia imprensa ne’ebe Arnolfo Teves halo ne’e hamutuk ho nia advogadu legál, Atty. Ferdie Topacio, ho nia inan, Zenaida Teves.
Arnei Teves subar iha Timor-Leste hahú iha tinan 2023, hafoin hetan akuzasaun nu’udar mestre asasinatu ba eis-Governadór Negros Oriental Roel Degamo, iha ne’ebé nia hetan akuzasaun nu’udar mestre.
Antes ne’e, Presidente Filipina Marcos Ferdinand deklara Eis Reprezentante Arnie Teves Jr fila fali ba Filipina tanba Timor-Leste prontu haruka fila no apoia husi Primeiru Ministru Kay Rala Xanana Gusmão no Presidente Repúblika José Ramos Horta.
“Eis Reprezentante Arnie Teves Jr oras ne’e fila fali ona mai Filipina, ha’u hetan informasaun kona-ba dezenvolvimentu ne’e husi Primeiru Ministru Gusmão durante reuniaun ASEAN ne’ebé ha’u foin fila husi Kuala Lumpur”.
Image : Marcos Ferdinand, President Philippines
“Timor Leste prontu atu haruka Teves fila fali ba Filipina. Entaun ida ne’e sei la akontese bainhira laiha asisténsia husi Prezidente Horta no Primeiru Ministru Xanana Gusmão husi Timor-Leste”.
“Sira serbisu maka’as tebes atu lori ida-ne’e ba konkluzaun ida tanba ita hatene katak eis-kongresista Arnie Teves hasoru hela akuzasaun sira ba omisídiu no krime sira seluk relasiona ho oho emboskada ba eis-Governadór Digamo”. Informa Presidente Filipina Marcos Ferdinand iha Filipina, 29/05/2025
Presidente Filipina ne’e dehan sidadaun Arnie Teves Jr tempu ona atu hasoru justiça.
“Ami hakarak mós atu garante ba ami nia sidadaun sira hotu katak hahalok la tuir lei hanesan ne’e sei hetan kastigu no agora to’o ona tempu ba Arnie Davis atu hasoru justisa”. Nia afirma
Sidadaun Arnie Teves Jr hetan akuzasaun kriminál oioin iha Filipinas, inklui akuzasaun omisídiu hamutuk 13, tentativa omisídiu 13 no omisídiu frustradu 4, relasiona ho krime sira ne’ebé komete entre tinan 2019 no 2023, inklui asasinatu ba Governadór Negros Orientál, Roel Degamo, iha tempu ne’ebá.
Foto : Ryan Baldemor/The Philippine STAR