Tanis Tanba Hadomi ! Papa Hanorin Hadomi Malu

Imagem : Sarani Dioseze Baucau Raul Barela iha Tasi-Tolu, 26/04/2025. 

SAPNewsTL, Díli : Hafoin partisipa misa fúnebre iha monumentu vizita Sua Santidade Papa Francisco Tasi-Tolu, Sarani Justina Arcanjo ho laran triste hato’o sentimentu deskontente katak nia parte senti fuan moras bainhira lembra kona-ba memoria vizita apóstolika Papa iha Timor-Leste.

Tuir Sarani Justina Arcanjo hateten bainhira rona novidades tristeza kona-ba Sua Santidade Papa Francisco hakotu ona nia viajen moris, nia parte senti triste tebe-tebes, tanba hanoin fila-fali mensajen inspirativu ne’ebe Papa Francisco husik hela ba povu Timor-Leste durante hala’o vizita apóstolika ihaTimor-Leste.

“Ha’u nu’udar sarani katolika liga ho falesimentu ita nia Papa Fransisco, ha’u sente triste tanba Amu Papa mai vijita ita nia rai Timor depois fila-fali ba la to’o tinan rua(2), no memoria durante vijita ita nia rai ita seidauk haluha iha ita nia fuan maibé nia fila hikas ba Aman Maromak nia uman” Dehan Sarani Justina Arcanjo ba SAPNews hafoin partisipa misa funebre Papa Francisco nian iha Tasi-Tolu, Sabadu (26/04/2025)

Justina aprofunda, ohin loron sarani timoroan sira ne’ebe hela iha kapital Díli konsentra hamutuk iha monumentu vizita Sua Santidade Papa Francisco Tasi-Tolu ho laran triste hamonu matan ben wainhira partisipa misa solenidade ne’ebe dedika espesial ba maktoban nia mate.

“Loron ohin selebrasaun misa ida ne’e ami tuir ha’u sente triste no fuan moras, maibé ho fuan bo’ot ha’u halo orasaun ba Aman Maromak, nune’e Amu Papa nia klamar nafatin tau matan ba ita nia rai no ba sarani sira hotu” Dehan Justina.

Imajem : sarani timoroan partisipa misa solenidade ba Papa Francisco

Sarani Justina Arcanjo hatutan, iha momentu Papa Francisco hala’o vizita apóstolika mai Timor-Leste, marka istória foun ba ferik katuas no foinsa’e sira tanba vizita Sua Santidade nian halo ema hotu senti entusiasmu hakarak rona lian ne’ebe Papa Francisco hato’o bainhira prezide eukaristia santa no mensajen sira iha loron 10 fulan setembru 2024.

“Ha’u hanoin memoria Papa Francisco nian halo ita senti fuan moras, tanba uluk nia mai halo ita halibur hamutuk kontenti tebe-tebes, maibé oin ita hotu mai ho fuan moras laran triste tanis”.

Sarani timoroan ne’e dehan, nia parte ho laran triste husu ba publiku liu-liu ba maluk timoroan sira atu hanoin nafatin memoria ne’ebe Papa Francisco hato’o, bainhira nia prezensa durante loron tolu iha Timor-Leste katak imi tenki oan barak.

Imajem : Justina Arcanjo 

“Ha’u husu ba Sarani sira hotu atu nune’e labele haluha liamenon ne’ebe mak ita nia Santu Padre Papa Fransisco hamenon mai ita ne’ebe mak hau sei lembra mak kuidadu labarik sira tanba sira mak futuru rai ne’e nian no kuidadu ferik no katuas sira tanba sira mak memoria nasaun ne’e nian, no hahoris oan barak no mós hadomi malu. ”

Iha fatin hanesan, Sarani Dioseze Baucau Raul Barela akresenta, Papa Francisco hanesan apóstolu ida ne’ebe motiva foinsa’e sira, tanba ne’e falesimentu Sua Santidade nian halo mundu tomak senti triste no lakon bibi atan diak ida.

“Iha tinan 2024 Santu Padre vizita ita nia rai, estatua ne’e ha’u lori mai no ohin loron intensaun misa ba falesimentu Sua Santidade Papa Fransisco, ha’u lori estatua Papa Francisco nian mai iha ne’e halo ha’u senti triste tebe-tebes, hanesan sarani katolika ho intensaun hatudu ita nia domin ba ita nia santu Padre, tanba nia inspira tebe-tebes joventude sira” Nia subliña.

Raul Barela salienta, durante maktoban apóstolu Francisco sei moris, memoria ne’ebe nia parte aprende husi Sua Santidade Papa Francisco mak, tenki hadomi tulun malu no respeita malu nu’udar umanu.

“Nu’udar sarani katolika no juventude ne’ebe mak gosta rona ita nia santu padre nia homilia, ha’u sente triste no lakon bainhira ita nia lider masimu igreja katolika fila hikas ona ba Aman Maromak nia uma. Mensagem ne’ebe mak ha’u sei lembra bainhira ita nia Sua Santidade Papa Fransisco vijita ita nia rai mak hadomi malu, no husi vijita santu padre nia ha’u aprende katak ita Timor oan tenke halibur malu, moris iha unidade no dame”.

Imajem : Bispu Diocese Baukau Dom Leandro Maria Alves iha Altar Santu Tasi-Tolu, 26/04/2025. Foto : Daniel da Silva

Iha omilia, Bispu Diocese Baukau Dom Leandro Maria Alves hateten falesimentu Papa Francisco lori tristeza boot ba sarani katóliku hotu iha mundu tanba lakon pessoa extraordináriu ida ne’ebe hadomi tebes povu Timor, ” Io Sono Rimasto Innamorato Do Timor Est / Ha’u nia laran monu ba Timor-Leste “.

“Jesus dehan keta tauk, Jesus haruka ita sai hosi ita nia tauk lalos Jesus enkoraza ita para oho malu maibe nia enkoraza ita atu hadomi malu no perdua malu, labele atu fila kotu ba malu”.

“Hahalok sira hanesan la tauk atu haklaken ka ko’alia lia loos, fiar metin, hakat sai hakbesik ba ema seluk no harii komunidade damen, domin, perdua malu, ksolok, alegria ka fraterna ou maun alin, ne’e mak hahalok komunidade resusitadu ninian, no ne’e duni maka hahalok sira ne’ebé ita haree duni iha Amu Papa Francisco “Ha’u nia fuan monu ba Timor-Leste”. Sublinha Bispu Leandro

Entretantu, iha misa solenidade ne’ebe hala’o iha monumentu vizita Sua Santidade Papa Francisco Tasi-Tolu, prezide direita husi Bispu Dioseze Baucau Dom Leandro Maria Alves, partisipa husi orgaun soberanu sira, Militar Sivil, Padre, Madre, Frater, Irmaun, irman no sarani rihun resin hodi fo omenajem ikus ba lider supremu igreja katolika mundiál molok halot apóstolu Francisco nia isin mate iha Casa Santa Maria Maggiore Roma

Reportajen : Marcela Mery & Guilhermino Ramos