Tasi-Tolu Nakukun ! Sarani Timroan Sunu Lilin Ba Papa Francisco
Imajem : Sarani timoroan partisipa misa solenidade ba Papa Francisco iha Tasi-Tolu, 26/04/2025
SAPNewsTL, Díli : Durante misa solenidade iha Tasi-Tolu ba falesimentu Papa Francisco, sarani timoroan kontinua sunu lilin, halo orasaun no partisipa misa hodi fo omenajem ikus ba Pontifise Romanu.
Iha misa ne’e, sarani sira falun ho retratu Papa Francisco no sunu lilin nu’udar sinal fo omenajem no hadomi tebtebes Santu Padre Papa Francisco.
Misa ne’ebe prezide hosi Bispu Diocese Baukau Dom Leandro Maria Alves ne’e hetan partisipasaun maksimu hosi sarani timoroan sira iha kapital Díli no município balun.
Iha Tasi-Tolu, sarani sira identiku ho kamizola mutin, imajem, ai-funan no banner ne’ebe pinta ho imajem Santu Padre Papa Francisco.
Ai-funan no retratu Papa nian ne’e halibur hosi instituições oioin ne’ebe antes ne’e presta omenajem ba Santu Padre iha loron 22-25 Abril iha Estátua Na’in Feto Lesidere.
Imajem : Sarani Katólika iha Timor-Leste ne’ebe partisipa misa solenidade ba Papa Francisco iha Tasi-Tolu
Hatais kamizola mutin, lori ai-funan, imajem no halo komboiu nu’udar sinal hodi fo omenajem ba Maktoban Santu Padre Papa Francisco ne’ebe hakotu iis iha ho idade 88 iha loron 21 Abril 2025 iha Vatikanu.
Misa funeral ba Sua Santidade Papa Francisco nian ne’ebe sei hala’o iha tuku 18:00 loraik iha Tasi-Tolu ne’e hetan partisipasaun maksimu hosi sarani timoroan sira.
Fo hanoin katak misa solene ne’e hetan segurança parte PNTL no F-FDTL, Tuir observasaun SAP News TL iha Tasi-Tolu nota katak sarani sira kontinua forma naruk no partisipa ativa iha misa ne’e.
Jornalista : Marciana da Conceição & Conzita Mota