Taur Ne’ebe Laran Di’ak ! Ho Oin Midar Fo Perdua Ba Autor Soke Karreta Iha Atambua
![](https://sapnewstl.com/wp-content/uploads/2024/07/IMG-20240722-WA01602.jpg)
Imajem : Eis Prezidente Repúblika Taur Matan Ruak, hafoin hetan soke ba nia karreta iha Atambua-Indonézia, 22/07/2024. Foto : Media Eis Titular
SAPNewsTL, Dili — Eis Prezidente Repúblika, Taur Matan Ruak, segunda ne’e (22 fulan-jullu, tinan 2024) hetan asidente viasaun kiik ida iha área Atambua-Indonézia nian, wainhira ho ekipa iha dalan atu fila hikas mai Dili liu husi via terrestre , hafoin fila hosi Rejiaun Administrativu Espesial Oe-Cusse Ambeno (RAEOA).
Tuir informasaun ne’ebe SAPNewsTL asesu liu husi Pajina Facebook Eis Prezidente Repúblika Taur Matan Ruak haktuir asidente ne’e mosu iha área Atambua-Indonézia nian, hafoin hala’o vizita ba RAEOA ho ekipa iha dalan atu fila mai Dili liu husi via terrestre.
“Asidente soke ne’e akontese kuaze tuku 10 liu oras Indonézia (WITA), iha área Suskoe, Atambua, involve hosi Karreta Militar Indonézia (TNI) nian ho marka Isuzu hosi Yonif Raider 744/SYB, soke iha parte liman loos besik motorista tur ba.”SAPNewsTL asesu liu husi Pajina Facebook Eis Presidente Repúblika Taur Matan Ruak ohin kalan iha loron 22 fulan-jullu, tinan 2024. SAPNewsTL Screenshot
Iha akontesimentu ne’e, Eis Prezidente Taur Matan Ruak ho nia kondutor no muska iha kondisaun di’ak no la hetan kanek ruma, maibé Karreta mak nakbetok oituan besik parte kondutor tur ba.
![](https://sapnewstl.com/wp-content/uploads/2024/07/IMG-20240722-WA0162.jpg)
Imajem : Karreta Eis Primeiru Ministru Taur Matan Ruak ne’ebe hetan soke iha Atambua
Hafoin asidente ne’e, Responsável TNI hosi Yonif Raider 744, Polísia Tranzitu Atambua, Konsular-TL mai hamutuk rezolve iha Konsuladu Timor-Leste nian iha Atambua.
“Iha prosesu rezolve ne’e, parte Responsavel TNI nian hosi Yonif Raider 744 husu deskulpa ba Eis Prezidente Taur Matan Ruak ba asidente ne’ebé la espera no prontu responsabiliza ba nia membru nia neglijénsia.”
Eis Prezidente Repúblika Taur Matan Ruak fó perdaun ba motorista ne’e no husu ba parte Komandu TNI Yonif Raider atu taka kazu refere no husu mós atu lalika kastigu nia membru ne’e, maibé husu atu hadi’ak de’it mak karreta Inova Avansa ne’ebé mós hetan soke hamutuk iha asidente refere.
Hafoin rezolve tiha, Eis Prezidente Repúblika ho komitiva kontinua viajen hikas mai Dili, agora daudaun ho kondisaun diak hela iha nia rezidensia.