Tempu Badak ! UEA Sei Mobiliza Investór & Vizita Timor-Leste
SAPNewsTL, Abu Dhabi : Prezidente Repúblika, José Ramos-Horta ho optimista husu Estadu Federál Uniaun Emiradu Árabe (UEA) liu hosi Ministériu Negósiu Estranjeiru no Kooperasaun Internasionál (MNEKI-UEA), atu mobiliza investór mai Timor Leste hodi ajuda dezenvolve no diversifika ekonomia iha rai-laran.
Asuntu ne’e hato’o direta hosi Prezidente Repúblika bainhira remata enkontru ho MNEKI-UEA, Liurai Abdullah Bin Zayed Al Nahyan iha sidade Abu Dhabi, Domingu, 15/10/2023.
Enkontru refere hanesan enkontru kontinuasaun husi enkontru dahuluk ho Prezidente UEA, Liurai Sheik Mohamed bin Zayet Al Nahyan iha Sexta foin lalais ne’e, hodi haklean asuntu sira ne’ebé diskute no oinsá atu aselera dezenvolvimentu relasaun bilaterál, hodi halais kooperasaun iha setór oin-oin, liuliu, iha setór ekonomia, komérsiu, investimento no asaun klimátika.
“Ami mos haklean liutan diskusaun atu oinsa Timor-Leste no UEA bele kolabora kona-bá konferénsia bo’ot ne’ebé sei mai kona-bá mudansa klimátika, iha Dezembru nia laran, iha ne’ebé Timor-Leste hetan konvite rua ida ba Primeiru-Ministru Xanana no ida ba há’u rasik nu’udár Xefe Estadu’’ informa Prezidente Repúblika
Prezidente Repúblika mós subliña katak potensiál investimentu ne’ebé Timor Leste presiza mak otelaria ho padraun fitun V tambá sai mós nu’udár kritériu ida bainhira adere ba ASEAN inklui mós investe iha área seluk ne’ebé kontribui ba diversifikasaun ekonomia rai-laran liu hosi loke kampu servisu.
Ba asuntu ne’e, governante hosi UEA ne’e fó resposta katak ‘’ Tempu badak sei mobiliza investór no sei vizita Timor Leste’’, akresenta Xefe Estadu.
Prezidente Horta mós husu ba Estadu Federál UEA atu fó empréstimu osan ho funan ne’ebé ki’ik bainhira presiza ba dezenvolvimentu Timor’Leste maibé ne’e sei depende ba Governu.
Tuir Planu, tempu besik, Timor-Leste sei formalmente loke nia embaixada iha Abu Dhabi no sai oportunidade bo’ot atu haluan kooperasaun no halais prosesu planu invetimentu tambá UEA rasik mós hatudu nia kompromisu ida ne’ebé forte.
Jornalista : Domingos Ferreira