Timoroan Na’in 8 Sei Hala’o Estájiu Profissional Iha Rai-Liur
Imajem : SEFOPE & Dili Development Company LDA asina MoU iha Senai Bekora, 28/05/2025
SAP News TL, Dili : Secretário Estado Formação Profissional e Emprego (SEFOPE) asina Memorandum of Understand (MoU) ho Díli Development Company LDA hodi rekruta timoroan hala’o estajiu profissional iha rai-liur no rai-laran.
Dircia Baptista Belo & Daniel da Silva – SAPNews
“Ohin, SEFOPE asina MoU ho Dili Development Company, LDA. Ne’e sinal pozitivu tanba empregador mós prontu simu ita-nia estajiadu sira ne’ebé mak governu fasilita ona sira, depois sira hetan kedas empregu husi parte empregador, servisu iha area ba Portelin, Eskalator, Hotelaria no mos ba office management”.
“Programa lansamentu estajiu profisional ba loron ohin ne’e importante tebes, primeiru parte mak halo lansamentu ba estajiu priofisional iha rai laran no rai liur, durante SEFOPE eziste estajiu profisional ne’ebe mak barak ona iha rai laran entaun ohin ita aumenta tan espasu ida estajiu profisional iha rai liur”. Hateten SEFOPE Rogério Araújo Mendonça iha Senai Bekora, 28/05/2025
Rogério Araújo hatutan, “Estajiu profisional iha rai liur ne’e importante tebes hodi prenxe fila fali vaga sira ne’ebe mak iha ninia merkadu presija”.
Iha parte seluk, SEFOPE mós sei rekruta timoroan ba servisu iha Nova Zelândia tuir sistema Recognised Seasonal Employer (RSE).
“Prosesu ba servisu iha Nova Zelândia, ita bolu RSE, ita labele foti fila fali vaga ida ne’ebe mak prosesu iha hela PALM nia laran hodi kahur fali ho RSE, bainhira asina ona MoU RSE nian ne’e halo lansamentu ba rekrutamentu, loke fila fali programa RSE nian rasik”.
Governante ne’e informa SEFOPE sei rekruta trabalhador 100 iha fulan Outubru hodi ba servisu iha Nova Zelândia.
“Faze primeiru ita sei haruka ba Nova Zelândia iha fulan outubru mak hamutuk na’in atus ida (100), manda uluk iha tinan 2025 ne’e, Recognised Seasonal Employer (RSE) ne’e sei halo rekrutamentu keta-ketak”.
Tuir dadus ne’ebe SAPNews asesu katak traballador estajiu profisional hamutuk 78, entre sira na’in 62 hala’o estajiu iha rai-laran, iha rai-liur hamutuk na’in 8, estajiariu hirak ne’e iha area konstrusaun jeral, eletrisidade, kanalizasaun, soldadura, albenaria, karpintaria, hospitalidade, agrikultura no administrasaun.