To’o Iha Rai Moris Fatin, Assanami Afirma Hadia Estrada No Hasa’e Produsaun Agríkola
Imajem : Presidente Partidu Demokratiku Mariano Assanami Sabino Lopes to’o iha Luro-Lautem hamutuk ho Komitiva, Lautem, 10/04/2023
SAPNewsTL, Lautem : Presidente Partidu Demokrátiku (PD) Mariano Assanami Sabino Lopes haktuir wainhira hetan fiar husi povu ba kaer governasaun PD lori mudansa, hadia dezenvolvimentu, hasa’e produsaun agríkola no hadia estrada sira ne’ebe a’at inklui estrada diresaun Luro ne’ebe a’at kleur ona
“Vota ba PD para ita halo mudansa, hametin estadu de direitu no demokrátiku, ita tenki hamutuk lori nasaun ne’e ba oin hodi hadia estrada Luro ne’ebe a’at, hasa’e produsaun agríkola, hadia esdukasaun liliu Sekundaria Geral Lasama Luro, kria kampu servisu ba joven sira, ema ida-idak tenki iha katana rasik ka profisaun hodi halo servisu”. Tenik Presidente PD Mariano Assanami Sabino ba Militante sira Iha Postu Administrativu Luro-Lautem, 10/04/2023
Assanami Hatutan, PD nia manan hakotu korente konflitu lider tuan sira nian ne’ebe la’o naruk tebes, PD manan sei konsolida lider sira hodi hadia povu nia moris, oinsa prepara prepara joven sira hodi partisipa iha dezenvolvimentu nasional, nune’e bele kompete iha merkadu rejional
Imajem : Militantes Partidu Demokratiku Iha Postu Administrativu Luro, Munisipiu Lautem
Entretantu, Lider Jerasaun Foun ne’e husu organizasaun arte marsial sira hamutuk iha hun ida, abut ida, povu ida, rai Timor ida de’it
“Ba organizasaun arte marsial sira, ita maun alin, ita mai husi hun ida, abut ida, povu ida, rai Timor ida deit, ita presiza hamutuk para ema labele soran ita, ema labele joga ita para nia sai ema, ita labele sai beibeik sira na catur para sira halimar catur, ita tenki sai pemain catur, tempu to’o ona para ita hatudu ita nia ezistensia katak jerasaun foun iha duni prontu hodi lori rai ne’e ba oin”. Assanami defende
Prezidente PD konsidera dezenvolvimentu agora intupidu, joven iha papel importante para halo mudansa, dezenvolvimentu markar pasu iha fatin, joven tenki hamriik halo mudansa
“PD hakarak halo para nasaun ne’e sai nasaun juvenil, rai barak iha mundu joven mak halo mudansa, joven tenki hamriik lori rai ne’e ba oin, PD sei tau iha Gabinete Primeiru Ministru Juventude Inovador no Transformador to’o iha postu no suku hodi halo ransformasaun no inovasaun, fo kréditu ba estudante sira hodi eskola no sai matenek servi nia rain no joven sira ne’ebe hakarak sai emprezáriu”. Afirma Presidente PD
Jornalista : Luis Pailofo