UNICEF Apoia Governu Ba Redusaun Malnutrisaun Husi 48% Iha TL

Imajem :

SAPNews TL, Díli – Primeiru Ministru (PM), Kayrala Xanana Gusmão hala’o sorumutu ho reprezentante United Nations Children’s Emergency Fund (UNICEF sigla Inghlés) iha Timor-Leste, hodi diskute problema saúde labarik malnutrisaun

Representante UNICEF Patrizia Digiovanni hateten, durante enkontru ho Xefi Governu, parte rua ko’alia kona-ba hadia saúde labarik, malnutrisaun iha Timor-Leste, nu’udár planu prioridade ne’ebe UNICEF ho Governu Timor-Leste, tan ne’e parte rua sei tau iha implementasaun programa.

“UNICEF interese atu hadia problema saúde labarik malnutrisaun, entaun iha sorumutu ohin nian ami diskute situasaun ba labarik sira iha nasaun Timór-Leste, saida mak prioridade Governu nian no saida mak UNICEF bele halo atu ajuda hadi’a labarik sira-nia moris iha nasaun ne’e,” Dehan representante UNICEF Patrizia Digiovanni ba Jornalista sira hafoin remata enkontru ho PM iha Palasiu Governu (11/07/2024).

Patrizia Digiovanni argumenta, bazeia ba planu prioridade ne’ebe trasa ona maka prefere liu ba asuntu dezenvolvimentu labarik ne’ebe sofre malnutrisaun inklui saúde labarik moris iha risku ba saúde publiku. UNICEF hanoin ona mekanismu iha atendimentu faze dezenvolvimentu ba labarik sira liu husi apoiu edukasaun, saneamentu, bee no ijene ne’ebe seguru ba protesaun saúde labarik.

“Ami hare edukasaun. Ami haree ba Saneamentu no Bee, ijene oinsa bele apoiu hela protesaun sosiál ba labarik sira. inklui inan sira ne’ebé isin-rua no neonatal nia saúde. Tamba ne’e ha’u hatene katak UNICEF tama ona iha Timor-Leste dezde 1984. UNICEF orgullu tebes atu mai no sai parte husi tradisaun ida-ne’ebé ami hela, ajuda labarik sira no área sira ne’ebé ami halo ona promesa, oinsá ami bele ajuda servisu sosiál sira atu sai amigavel liu ba klima no mós haree ba problema foin-sa’e sira-nian” Tenik nia.

Nia afirma, durante ne’e UNICEF apoiu Governu Timor-Leste liliu iha área sira ne’ebé servisu hamutuk ho setór saúde prefere liu ba saúde, Jeral labarik nian no programa saúde imunizasaun importante tebes ba labarik no joven sira, saúde feto isin-rua sira-nian atu sira-nia oan mós bele moris saudavel, Nia salienta.

“UNICEF apoiu ona serbisu barak iha saúde nian, haree mós buat barak seluk hanesan ha’u temi ona, ita haree oinsa ita bele halo sensitivu ba klima, servisu sosial, ami haree hela ami-nia protesaun ba labarik sira ne’ebé iha estrada ka kiak. Problema ho se, labarik sira iha problema ho lei, oinsá mak ita bele halo sistema ida-ne’ebe di’ak tebes atu ajuda sira, UNICEF servisu iha área oioin ba labarik sira, sira-nia família no komunidade”.

Representante UNICEF Patrizia Digiovanni hatutan, durante apoiu serbisu saúde enkoraja tebes nia atu serbisu hamutuk ho governu iha setór saúde nian, liu-liu realiza programa ne’ebe Governu hamutuk ho UNICEF implementa ona iha teritoriu nasionál.

“Buat barak ne’ebe enkoraja tebes ha’u kona-ba servisu governu nian. no nia (PM Xanana Gusmão) mós hatudu iha área sira ne’ebé mak UNICEF tenke kontinua ajuda Governu Timor-Leste kombate problema malnutrisaun iha iha nia rain no ajuda komunidade sira”. Nia hakotu

Enkuantu, tuir dadus ne’ebe antes ne’e United Nations Children’s Emergency Fund (UNICEF) fo sai katak Timor-Leste rejista problema malnutrsaun ho persentajem 48 (48%) no okupa numeru dahuluk iha ASEAN tanba kauza husi redimentu kiik, ki’ak barak (42%), seguransa alimentar (36%), numeru dezempregu no investimentu ba setor saude iha Timor-Leste ne’ebe sei kiik durante tinan 22.

Jornalista : Juvita Guterres