UNITAL Realiza Semináriu Nasionál, Alkatiri : Demokrasia La’os Fahe Malu

SAPNewsTL, Dili: Universidade Oriental Timor Lorosa’e (UNITAL) Realiza Semináriu Nasionál komemorasaun loron falintil ba Dala XLVII, iha Palestra Dr. Mari Alkatiri hateten demokrasia la’os fahe malu, demokrasia laos kontra malu, demokrasia loke dalan haburas unidade nasionál

“Ita tau problema ba kotuk ona, sosiedade tomak, katuas, ferik, joven jerasaun oi-oin de’it, obrigasaun atu kontribui loke dalan ba intendimento ba kompresaun, loke dalan la’os para hotu-hotu atu sai partidu ida de’it, loke dalan para atu halo demokrasia ida atu haburas unidade nasional,  demokrasia ida ne’ebe bele lori ita ba fahe malu, lori ita hotu mai kontra malu ne’e la’os demokrasia”. tenik Dr. Mari Bin Amude Alkatiri ba partisipante sira iha Salaun Unital tersa (16/08/22).

Nia hatutan, jerasaun tuan sei husik ba jerasaun foun Timor-Leste ida iha paz no estabilidade hodi fo matak malirin ba jerasaun vindouras hotu-hotu

“Ha’u hatene katak Timor Leste agora nakonu ho talentu, dala barak ita sei moris ho problema, tanba ne’e mak ohin loron laiha bee mos, eletresidade komesa ona, laiha estrada ba ita hotu, laiha komunikasaun, ha’u fiar katak ami hotu sei moris naruk, tempu mak ami sei iha ami sei halo buat hotu, atu husik ba jerasaun aban bainhrua Timor Leste ida Paz no estabilidade ho dezenvolvimento ne’ebe fo matak malirin ba ita hotu “. Dehan Alkatiri iha nia Palestra

Entretantu,  Tanente Korneliu Mario Baptista husu ba estudante sira kuda kultura literasia tanba kultura lee seidauk forte iha Timor-Leste

“Jerasaun foun liliu ba estudante universitáriu hotu iha Timor laran, tenki haburas kultura lee, tanba ita Timor laiha kultura atu lee barak, tenki lee barak labele hanoin katak imi remata imi nia estudu iha universidade, hanoin katak, imi matenek ona ne’e lae, tenki lee barak hodi hasa’e konesimentu no matenek”.

Enkuantu, Nia husu juventude sira atu buka aprende  hodi haree husi lider sira ne’ebe agora sei moris, labele  haree de’it ba sira nia kontradisões, ne’ebe mak iha  maibe hare mos nia vantagem ne’ebe mak balun hatudu jerasaun foun presiza aprende husi sira

Iha fatin hanesan, Magnífiku Reitor UNITAL Florindo Pereira  hatutan semináriu ida ne’e ho objetivu atu komemora loron Falintil

“Estudante sira bele koko atu  hala’o atividade ida ne’e hodi komemora Loron Falintil ba dala XLVII, semináriu ne’e hetan organiza husi estudante UNITAL, no partisipa husi Estudante UNPAZ, UNDIL, ETI, IOB, inklui sira seluk”.

Iha parte seluk, Reitor ne’e hatutan Universidade Oriental Timor Lorosa’e (UNITAL) iha Fakuldade hitu (7), Departamentu Tolunulu resin-lima (35) hotu-hotu akreditadu

“UNITAL iha Fakuldade hitu (7), Departamentu Tolunulu resin-lima (35) departamentu  hotu-hotu acreditadu, balun atu akretida  fila fali, ne’ebe Setembru ba leten  ami iha departamentu hitu (7) mak sei avansa”. Dehan Reitor Unital

Enkuantu, Nia fundamenta nu’udar universidade prepara atu sai universidade kualifikadu, estudante sira mai eskola iha ne’e senti katak ne’e universidade duni, UNITAL iha Dosente uituan maibe, balu agora daudaun ba halo ona kursu  doutoramentu no mestradu, purtantu, Dosente UNITAL hamutu atus rua(200).

Jornalista : Esmeralda da Silva & Antonio Tilman

Editor   : Ekipa Editorial