UNTL Gradua Finalista 2.195 ! João : Pasiénsia & Preseveransa Save Ba Susesu

SAPNewsTL, Díli – Graduasaun ba dala XXXI ne’e Universidade Nasionál Timor Lorosa’e (UNTL), gradua finalista hamutuk 2.195, Magnífiku Reitor UNTL João Soares Martins hateten pasiensia no preseveransa maka save ba susesu.

Ezekutivu UNTL, João Soares Martins konsidera graduasaun importante maibe presiza prense rekezitu sira akadémiku nian, pasiensia no preseveransa hanesan save ba susesu estudante nian.

“Graduasaun importante maibe presiza kumpri kritériu akadémiku, graduasaun la’os fim entre relasaun ho universidade, gradua imi atu kontribui ba dezenvolvimentu família, sosiedade no nasaun, ita presiza investe makaas iha edukasaun, forma ema sai kualidade, entaun pasiensia e preseveransa mak save ba susesu”. Tenik Reitor UNTL João Soares Martins iha CCD, 19/12/2024

João Soares hatutan wainhira estudante sira hasoru situasaun konfortu, tuir mai nia hasoru ho responsabilidade no hakat maka sei hetan experiensia foun, sai forte no susesu.

“Wainhira ita hasoru situasaun konfortu, la fasil, maibe wainhira ita hasoru no hakat, ita sei hetan lisaun foun, parabens ba graduadu sira hotu”. Nia sublinha

Lideransa UNTL ne’e fo agradese mós ba familia graduadu sira tanba bele halo sakrifisiu Barak hodi kontribui ba susesu oan sira nian.

“Agradese ba imi familia sira hotu, imi nia kolen, terus, sakrifisiu no servisu tomak, ami rekunhese, susesu imi nian ona”.João hateten

Vise Reitor Asuntu Akademiku no Garante Kualidade, Samuel Freitas sublinha Graduado Com exelénsia Caracter e Visão Global ho sentidu aleinde produs rekursu umanu kualidade forma mós karakter ema nian atu bele integra iha públiku hodi partisipa no garante dezenvolvimentu ne’ebé sustentavel.

Samuel mós afirma graduadu ne’ebé UNTL produz ne’e iha kompeténsia no karater hodi integra iha sosiedade katak sira iha kapasidade hodi servi sosiedade no nasaun.

“Graduadu UNTL garante kompeténsia no kualidade, sira iha kapasidade hodi integra an iha sosiedade, ita laiha dúvida ba sira nia kapasidade”. Nia dehan

Graduadu Sergio Alves dehan normalmentu susesu ne’e sai mehi komun humanidade ida-idak nian, ema hotu iha mehi diak atu realiza, mehi ne’e rasik obriga individu atu hakaas an, servisu makaas, dedikasaun, no halo determinasaun.

“Tebes, susesu ne’e ita konkista ho folin karun, karun tanba ita hakat naruk ida hosi hakat ida ba hakat seluk ida sempre nakonu ho dejafiu liliu atividade barak ne’ebe involve, tempu la naton ba ita atu dezenvolve an, ita presiza gasta tempu, osan, no energia tomak”.

“Prosesu naruk ne’ebe dejafiante, fo teste ba ita nia pasiensia, koragem, brani, fiar an no firmeza iha luta, luta ne’e lori tempu maibe susesu ne’e sempre sai serteza ba ita, ha’u hanoin katak ha’u bele, ha’u bele sai susesu, se ita hanoin, ita manan, ita sei manan”. Tenik Graduadu UNTL Sergio Alves da Costa iha Sentru Konvensaun Dili, 19/12/2024

Graduadu ne’e hatutan, prosesu naruk ne’e la ses hosi esforsu, badinas, no laran di’ak ne’ebe familia sira hatudu liu hosi apoia moral, material, no finansial durante tinan 6.

“Ha’u nia susesu ne’e fo ba familia sira, ha’u hetan susesu tanba sira nia komitmentu hodi apoia, ajuda, fo hanoin no motivasaun, entaun ne’e atu hateten katak laiha susesu ida ne’ebe sein apoia hosi familia sira”.

“Fou-foun ha’u tama UNTL, ha’u kompromete ba ha’u nia an katak ne’e mak tempu ha’u hahú luta, loron ida ha’u tenki gradua, ohin mehi ne’e sai realidade”.

Graduadu Domingos de Jesus hateten susesu ne’ebé nia hetan la’os ba nia mesak maibé dedika ba mós ba família sira.

“Ha’u estuda iha Faculdade Engenharia Ciénsia no Teknologia, Departamentu Geolojia no Petróleu, ohin ha’u hetan graduasaun, ha’u orgullu no família sira haksolok, sussesu ne’e la’os hau nian mesak, maibe susesu ne’e familia hotu nian tanba husi sira nia esforsu mak mehi ne’e sai realidade” Tenik Domingos de Jesus

Graduadu ne’e agradese ba Maromak tanba bele tulun nia iha tempu naruk nia laran to’o realiza ninia mehi, mehi família sira nian konsege atinji ona.

“Ha’u nia agradese ba aman kriador, uma no ahi husi lisan Aitula no Pugen, ha’u nia agradese liliu ba Pai no Mãe no familia sira hotu, tanba hetan susesu sira ne’e la ses husi sira nia esforsu ne’ebe mak la senti kolen no la senti loron nia manas tan deit hakarak ha’u atinji mehi ida ne’e”. Nia dehan

“Mehi ne’e fasil maibé atu realiza mehi ne’e la fasil, ha’u rekunhese katak laiha vitória ida ne’ebé fasil ba ita no gratuita sein paixaun, domin no suporta husi  pai no mãe sira nian, ha’u hatene katak imi nia kolen no esforsu ha’u selu labele tanba luan hanesan tasi no aas hanesan lalehan, domin puru no inkondisional”.

Domingos hatutan, prosesu estudu ne’ebé la’o dalan naruk sempre kait dejafiu barak, menuz finanseiru, hetan traballu no materia barak ne’ebé ke’e ita nia vontade no komitmentu atu aprende.

“Ha’u nia estudu iha dejafiu barak mak ha’u hasoru hanesan  hamlaha, hambrok, tanis, hakarak atu hakotu deit ona estudu ne’e, haree ba oin dalan ne’e naruk tebes no hateke ba leten lalehan ne’e aas, maibe  ha’u nafatin esforsu hodi realiza mehi ne’e atu pai no mãe bele kontenti ho susesu ida ne’e”.

“Susesu la’os hanesan milagre ne’ebe mosu derepente, maibe bainhira ita nunka esforsu, pasiensia, halo orasaun mak mehi ne’e saugati deit, maibe bainhira ita mehi akompanha ho esforsu, pasiensia no orasaun, fiar katak maromak sei loke dalan hodi atinji ita nia mehi”. tenik nia

Gradua ona iha ensinu superior, la signifika mehi ne’e remata ona maibe ne’e hanesan hakat ida ba kapítulu foun hodi konkretiza matenek ne’ebé hetan iha eskola no kampus.

“Ohin, ha’u hakat foun ida ba espasu dejafiante, husik mundu teoria ba mundu prátika, ha’u tama ba kapítulu foun, la’os ikus ba mehi ne’e  maibe inisiu husi luta foun ida hodi integra an ba interese sosiedade no nasaun nian, ha’u sei kontinua aprende hosi servi no kontribui ba bem estar komunidade nian”.Domingos  fundamenta

Fo hanoin fali katak, desde 2003 to’o 2024 (Graduasaun I-XXXI), UNTL produz ona graduadu hamutuk rihun ruanulu resin hitu (27.000) resin. Entre sira maioria hetan ona servisu, kontinua estudu no balun seidauk hetan servisu.

Enkuantu, tuir numeru post graduasaun mestradu total estudante 28, Fakuldade Agrikultura hamutuk 170, Fakuldade Enjenharia Siensia no Teknolojia 201,Fakuldade Siénsia Ezata hamutuk 4, fakuldade Turizmu arte no industria kriativu hamutuk 43, Fakuldade Medisina Siénsia Saúde hamutuk 633, Fakuldade Siénsia Sosial hamutk 267, fakuldade ekonomia gestaun hamutuk 222, fakuldade direitu 34, fakuldade edukasaun hamutk 497 no fakuldade filisofia hamutuk 97.

Jornalista : Ekipa SAPNews