Verónica Hetan Oho Husi Laen Iha Tasi-Ibun, Oras Madrugada
Imajem : Komandante PNTL Munisípiu Dili Orlando Gomes ne’ebe ko’alia kona ba Veronica dos Santos hetan oho iha Praia dos Coqueiros, 21/03/2026.
Sapnews Pro, Díli : Feto ida ho naran Veronica dos Santos (Abe) hetan oho hosi nia laen ho naran inisial C iha área Pantai Kelapa (Praia dos Coqueiros) iha oras madrugada, 21 Marsu 2026.
Hafoin laen oho nia fen iha oras madrugada (03:45), parte Polisía Nasional Timor-Leste (PNTL) to’o kedas iha fatin akontesimentu hodi halo identifikasaun, dada fita iha lokal kazu no translada kedas mate isin ba Hospital Nasional Guido Valadares (HNGV) hodi hein no submete ba prosesu autópsia.
Autópsia mak prosesu examinasaun korpus (isin matebian) husi médiku espesialista atu buka hatene saida mak kausa loloos husi mate no idenfika kanek sira iha ema nia isin lolon. Iha prosesu ne’e, médiku sei observa no analiza parte liur no laran husi isin, inklui órgaun sira, atu deteta estragus, ka sinal krime sira.
Objetivu prinsipal husi autópsia mak atu haatene kauza hosi morte, konfirma kanek, kondisaun saúde no ajuda prosesu investigasaun legal, wainhira iha suspeita krime.
To’o oras ne’e, sidadaun mane (laen) ne’ebe oho vítima feto refere, iha ona parte autoridade segurança nia liman hodi submete ba prosesu investigasaun.
Ligadu ho kazu omesidu ne’e, Komandante PNTL Munisípiu Dili Orlando Gomes informa asidente ne’e akontese iha Pantai Kelapa maiz ou menuz 3:45. Oras ne’e suspeitu parte segurança asegura ona iha komandu munisipiu Díli.
“Ohin madrugada 3:45 hanesan ne’e iha asidente ida iha area Pantai Kelapa tasi-ibun besik SEARA ninian, kazu omesidu ne’ebé maka akontese iha ne’eba, fen ho laen ne’ebé maka nia laen oho nia fen”.
“Iha kazu ida ne’e patrollamentu sira to’o kedas fatin hodi asegura autor krime no ita kontaktu ba Forensik atu bele mai foti mate isin ba iha mortuariu Ospitál Nasionál Guido Valadares”. Informa Komandante PNTL Munisípiu Dili Orlando Gomes iha Comoro, 21/03/2026
Nia hatutan, suspeitu kaptura no detein ona iha komandu munisipiu Díli, nune’e bele submete ba prosesu investigasaun hodi enkamina ba iha Ministeriu Públiku.
Orlando Gomes sublinha kazu refere sei iha prosesu investigasaun no seidauk hatene kauza hosi kazu omesidu refere.
“Motivu husi kazu ne’e sei iha prosesu investigasaun depois maka ita hare’e motivu saida maka to’o laen oho nia fen, espera katak iha kazu violasaun doméstika ne’e mosu iha uma laran depois maka hamosu laen oho nia fen, iha prosesu ne’e maka ita bele hatene motivu husi kazu ne’e”. Nia hakotu
Hafoin notisia ne’e públika, ekipa SAP News TL seidauk halo komfirmasaun ho parte família ligadu ho kauza hosi akontesimentu ne’e.
