Vestidu La Nakles ! Joni W Derrota, Titi Nizia Fo Agradese Ba Maromak
SAPNewsTL, Dili : Boxista ho naran estimadu Titi Nizia manan Joni W iha Eventu Commemoration 10 Years of Guardian Angle Entertainment Existence.
Hafoin konkista vitoria, Titi Nizia sente kontente no fo agradese ba Aman Maromak tanba bele manan Joni W iha eventu the Ultimate Boxing.
“Ha’u kontente tebes tanba ha’u bele manan, agradese ba Maromak tanba ha’u halakon Joni W, maske antes ne’e nia dehan atu les vestidu maibe pelu kontrariu ha’u hamonu nia iha ronda dahuluk, ikus mai nia lakon”. Tenik Titi Nizia ba SAPNews iha Hudi-Laran, 26/12/2024.
Boxista husi RAEOA ne’e dehan “Ha’u marka istoria foun no uniku iha ha’u nia jornada, realidade sai vensedor iha kalan ne’e, liu hosi diak no aat liliu esforsu an mak ita bele manan”.
Titi Nizia deklara nia parte sei kontinua talentu ne’e no hein ema ruma nia request hodi kontinua sa’e rin.
“Ha’u nia hakuak no domin ba sira ne’ebe suporta ha’u no la gosta ha’u, ha’u sei kontinua talentu ne’e no ha’u hein ema ruma request, ha’u sei simu hodi sa’e rin”. Nia deklara
Boxista Titi Nizia
Titi Nizia mos fo boas festas no boas entradas ba ninia fans sira no Timor oan sira, hamutuk simu tinan foun ho paz no unidade, karik iha problema bele sa’e rin leten hodi labele baku malu iha dalan ninin.
“Ha’u nia boas festas no boas entradas ba ita hotu, karik ita hemu tua, labele lanu, ita mak hemu tua laos tua mak hemu ita, karik ita problema ruma bele sa’e rin maibe labele tuku malu ida dalan ninin”.
Iha sorin seluk, Joni W hateten nia parte sente normal no kontente tanba bele partisipa iha eventu the ultimate boxing hodi hetan medalla no manan experiensia foun.
“Ha’u sente baibain deit, lakon ka manan sente normal, ha’u kontente bele hetan medalla, importante sa’e rin, ha’u apresia Titi Nizia tanba nia hatudu metal diak no preparasaun diak, parabens ba nia”. Dehan Joni W
“Ida ne’e hanesan experiensia diak, ami foin aprende, ami sei dezenvolve diak liutan, sai boxista profesional hodi lori Timor ba oin”.
Boxista Joni W
Joni husu ba joven sira hodi hatudu jagoan ka expertu liu hosi sa’e rin, labele tuku malu iha dalan ninin tanba ne’e la fo efeitu pozitivu ba dezenvolvimentu Juventude iha prezente no futuru.
“Ba joven sira labele tuku malu iha dalan ka iha liur, jagoan ne’e sa’e rin deit, bainhira ita sa’e rin ita hetan premiu no apresiasaun”.
Boxista ne’e fo boas festas santu natal no felix tinan foun ba Timor oan sira hodi moris ho haksolok liutan iha tinan 2025.
Maske hetan derrota, maibe Joni kontinua sadik Mariano da Costa hodi bele sa’e rin iha futuru tanba nia parte konsidera Mariano sai targetu ida ne’ebe nia hein durante ne’e.
“Ba oin ha’u sadik Mariano, tanba agora nia subar deit, ha’u hakarak sa’e rin hasoru nia”. Nia hein
Fo hanoin fali katak Event the Ultimate Boxing refere kompostu hosi par haat ne’e hala’o iha Hudi-Laran, Dili, 26 fulan Dezembru 2024.
Jornalista : Marciana Conceição
