Veteranu “Funu La Ta’uk” Konsidera Setor Edukasaun Sei Fraku
Imajem : Veteranu Manuel Soares kodiku “Funu la tauk” iha resintu Palasiu Prezidensial Aitarak-laran, Segunda (20/05/2024) foto : Guilhermino Ramos da Cruz
SAPNews TL, Díli – Iha ambitu komemorasaun independénsia Timor-Leste nian ba dala 22 ho tema jéral, “Hametin Instituisaun Estadu hodi Serbi Povu,” Veteranu Manuel Soares kodiku “Funu la tauk” husu IX Governu Konstitusional investe maka’as iha setór Edukasaun
Tuir Veteranu Manuel Soares hateten, tinan 22 ona Timor-Leste konsagra nia vitoria ba ukun rasik a’an, maibé setor edukasaun sei fraku hodi trasforma joventude ida kualidade, edukativa, intelejensia no profisionál hodi kaer metin espiritu nasionalismu no patriotizmu iha nasaun Repúblika Demokrátika de Timor-Leste (RDTL sigla Portugués)
“Ohin loron ita selebra tan restaurasaun independénsia ba dala 22, maibé ha’u nota setór edukasaun sei fraku, atu produs rekursu humanu ida ne’ebe kualidade, iha ita nia rain, Governu presija investe maka’as iha setór edukasaun.” Hateten Veteranu Manuel Soares kodiku “Funu la tauk” ba Média SAPNews Timor-Leste iha resintu Palasiu Prezidensial Aitarak-laran, Segunda (20/05/2024)
Veteranu Manuel Soares akresenta, atu kaer metin historia funu nain sira nian, Governu presija hadia kualidade edukasaun ho adekuadu, hodi fo espasu ba Joventude sira atu kaer metin istoria luta ba libertasaun nasionál durante tinan 24 ne’ebe konsege determina povu Timór nia Independensia iha 20 de Maio 2002, Tenik nia.
“Setór edukasaun importante tebes iha faze dezenvolvimentu nasionál, bainhira edukasaun forte Joventude sira sei matenek no edukadu, nasaun Timór-Leste ba futuru bele sai diak liu kompara ho ohin loron, Governu no Parlamentu Nasionál (PN) presija hare fila fali lei kona-ba transformasaun edukasaun kualidade, Tamba kada tinan eskola sira produs númeru finalista barak maibé laiha kualidade, aktu krime, violasaun no difasaun kontinua buras,” Nia Salienta.
Veteranu Manuel hato’o nia mensajen ba Joventude sira atu kaer metin espiritu nasionalismu no patriotizmu, hodi kontribui ba paz no estabilidade iha Timor-Leste, tamba papel Joventude nu’udar fonte importante ba dezenvolvementu iha Timor-Leste ida soberanu independénte no hamonia
“Ha’u nia mensajen ba Joventude sira primeiru ita tenki hanoin katak rai ne’e ita nian, entaun papel nu’udar foinsa’e tenki hametin espiritu nasionalismu no patriotizmu hodi banati tuir hahalok funu nain sira nian ne’ebe luta ba liberta povu no liberta patria, ho fiar ne’ebe bo’ot hodi konkista ita nia vitoria ba ukun rasik aan”
Funu la tauk, rekomenda ba Governu no Parlamentu Nasionál (PN) tau iha planu estratéjiku Dezenvolvimentu nasionál hodi hadia setór Edukasaun sai kualidade, inklui hadia infrastrutura basika hanesan Estrada, Ponte, Bee mos no Eletrisidade iha area rurais sira ne’ebe halerik ba dezenvolvementu, nune’e povu bele senti Timor-Leste nia Independensia
Entertantu, Tuir Observasaun Média SAPNews Timor-Leste nota iha terenu katak iha serimónia komemorasaun 20 de Maio, Tinan ne’e Partisipa masimu husi Prezidente Repúblika (PR) José Ramos Horta, Prezidente Tribunal Rekursu (PTR)
Deolindu dos Santos, Prezidente Parlamentu Nasionál (PN) Maria Fernanda Lay, Primeiru-Ministru (PM) Kay Rala Xanana Gusmão, Leader historiku sira, Veteranu no Veterana, Majestade Sultan Haji Hassanal Bolkiah Mu’izzaddin Waddaulah, Brunei Darussalam, Membru Governu sira, Embaixador no Embaixadora sira Timor-Leste
Jornalista : Guilhermino Ramos da Cruz & Eleonora Fatima Dos Santos