![“Vise PM, Ministru Assanami Apresia Joven Hari’i Mídia & Asume Dejafiu” “Vise PM, Ministru Assanami Apresia Joven Hari’i Mídia & Asume Dejafiu”](https://sapnewstl.com/wp-content/uploads/2024/02/IMG-20240220-WA0019.jpg)
“Vise PM, Ministru Assanami Apresia Joven Hari’i Mídia & Asume Dejafiu”
SAPNewsTL, Dili : Relasiona ho aniversáriu Mídia ba daruak ne’ebe akontese iha loron 26 fulan Fevereiru tinan ne’e, Estrutura Mídia Nasional Sa’ani Assamana Prazer News Timor-Leste (SAPNewsTL) halo audiensia ho Vise Primeiru Ministru Mariano Assanami Sabino Lopes, Sexta feira foin lailais ne’e iha Palasiu Governu Dili.
Objetivu husi Audiensia ne’e, Estrutura mídia introduz ezisténsia mídia nian, konvida direita Vise Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitária (VPM-MKAS-MDRHK) Mariano Assanami Sabino Lopes hodi halo palestra no partisipa iha selebrasaun anivesáriu SAPNews ba daruak.
Durante audiénsia, Prezidente Mídia SAPNewsTL Clemetino Bragamça Machado ho laran ksolok fo agradese ba disponiblidade Vise Primeiru Ministru Mariano Assanami Sabino nian ne’ebe bele simu audiénsia husi SAPNewsTL
“Dahuluk ami agradese ba Sua Exselénsia Vise Primeiru Ministru tanba bele simu ami hodi halo audiénsia, atu introduz katak Mídia SAPNewsTL hari’i husi estudante universitáriu sira, formandu profisional jornalizmu no estudante sekundária sira iha loron 26 Fulan Fevereiru 2022, iha ne’ebe hamrik ho vizaun atu atinji sosiedade Timor Leste ida informativu, inspirativu, konstrutivu no edukativu ba hametin no haburas konstrusaun estadu de direitu no demokrátiku”.
“Mídia SAP News idéntiku ho foinsa’e sira, estudante akadémiku sira, formandu jornalizmu profisionalismu no estudante sekundária sira, ami hari’I mídia ne’e ho ispíritu vontade juvenil sein iha kapitál finanseira, maibe to’o ohin loron ami kontinua la’o no luta iha misaun mundu jornalismu”. Prezidente Mídia SAPNewsTL Clemetino Bragamça hateten
Iha biban ne’e, Vise Primeiru Ministru Mariano Assanami Sabino apresia ba komitmentu foinsa’e sira nian iha SAPNews hodi hasoru dejafiu ne’ebe boot ho laiha rekursu finanseira halo atividade kobertura sira iha Timor-Leste.
“Ha’u Apresia ba imi hotu iha SAPNews, imi kontinua la’o ba oin, apresia ba komitmentu ne’e tanba imi bele hasoru dejafiu boot no asume responsabilidade hodi halo atividade jornalistika iha Timor Leste, biar ohin loron seidauk iha rendimentu maibe to’o loron ruma imi sei hetan wainhira google ne’e bele loke ona ninia sentru iha Timor-Leste”. Tenik Vise PM Mariano Assanami Sabino durante sorumutu iha Gabinete Vise PM, Palasiu Guvernu, 02/02/2024.
Vise Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitária (VPM-MKAS-MDRHK) Mariano Assanami Sabino afirma nia sei ba partisipa iha selebrasaun aniversáriu refere hodi lansa revista, marsa SAPNews, plataforma mídia SAPNews (tiktok, instagram, twiter, no youtube), no halo diskursu ofisial iha serimónia ne’e.
“Kona ba konvite ne’e, ha’u sei ba partisipa, imi kordena ho gabinete para tau iha ajenda”. nia afirma
Governante ne’e konsidera, papel mídia krusial iha kontextu hari’i estadu no nasaun Timor-Leste, papel mídia sai fator fundamentu ba demokrasia no dezenvolvimentu nasionál. Tan ne’e Mariano Assanami Sabino husu mídia hotu inklui SAP News TL kontinua asume dejafiu sira iha mundu jornalismu.
Jornalista : Marcela Mery da Costa