Vizita Illas Na’in Feto ! Fanun Sarani Batugade Hametin Fiar & Fraternidade
Imajem Sarani Batugade hala’o proseisaun akompanha Illas Santa María Auxiliadora iha Balibo, 24/05/2025.
SAPNewsTL, Bobonaro : Sarani Sentru Pastoral Batugade-Balibo ho entusiasmu simu padroeira Santa Maria Auxiliadora, durante entrevista Padre George Michael Stephen hateten vizita refere hodi fatun sarani sira hametin fiar, domin, no damen.
Anina Martins Gama – SAPNews
Fulan Maiu hanesan fulan ida ne’ebe santa kreda katólika dedika ba Nain Feto do Rosário, fulan ne’e sarani sira iha mundu fo intensaun espesial liu hosi halo misa, reza tersu no halo proseisaun akompanha Illas Nain Feto vizita sarani sira.
Padre George Michael Stephen SVD fo agradese ba autoridade lokal no sarani sira tanba hatudu fiar, domin no sakrifisiu hodi hahi Aman Maromak, vizita ne’e hodi hafanun no hametin sarani sira domin, damen no unidade.
“Agradese ba aman maromak ho nia inan Santa Maria Auxiliadora, suku Batugade haksolok tebes tanba ho sarani hotu nia sakrifisiu hahu husi loron preparasaun to’o remata, ha’u hare’e sarani barak fo sira nia tempu no hala’o sira nia sakrifisiu”. Hateten Pe. George Michael Stephen ba SANews iha 24/05/2025
Wainhira vizita, iha serimonia resepsaun sarani simu poejia, lia-dadolin, likurai, Tebedai no knananuk kultural husi Sarani sira, asaun espiritual ne’ebe realiza husi sarani sira iha Sentru Pastoral Batugade ho haksolok, hari’i Fiar no dame ba Sarani sira leet.
Xefe Suku Sesante Batugade, Januario Moises sente haksolok tanba bele hetan vizita hosi illas Na’in Feto hodi bele hametin fraternidade entre joven sira iha Batugade.
“Ami hamutuk ho sarani tomak iha Batugade haksolok hodi selebra loron Padroeira Santa Maria Auxiliadora Estasaun Batugade, sarani hotu sente haksolok tanba illas Nain Feto hala’o vizita iha sarani sira leet hodi hametin fraternidade ba joven no komunidade sira”. Hateten Xefe Suku Sesante Batugade, Januario Moises.
Xefe Bairu Lotan Andreas Bere dehan, “maske lori illas Nain Feto la’o hakur mota maibe ho konsiénsia ne’ebe sarani Bairu Lotan iha, sira nafatin haksolok hodi akompanha, simu ho likurai no bidu husi inan ferik no labarik sira”. Hateten, Xefe Bairu Lotan Andreas Bere.
Xefe Bairu Nubadak, Camilo Gomes hatutan, “atividade lori illas Nain Feto la’o vizita kada Bairu ne’e hodi hafanun sarani sira hodi hakbesik an ba igreja, halibur joven sira no dada labarik kiik sira no kria damen”. dehan Xefe Bairu Nubadak, Camilo Gomes.
Durante vizita Illas Santa Maria Auxiliadora loron haat, sarani Batugade ne’ebe kompostu husi Bairo Nubadak, Batugade, Aidak-Laran no Lotan simu ho laran ksolok, halo venerasaun, misa, orasaun no animasaun.