Vizita Papa Francisco ! PM Xanana Husu Povu Hatudu Kultura Respeitozu
Imajem : Primeiru Ministru Kayrala Xanana Gusmão, iha Palasiu Prezidensial, Aitarak-laran, Quinta (27/06/2024).
SAPNewsTL, Díli – Relasiona ho vizita Papa Francisco, Primeiru-Ministru Kay Rala Xanana Gusmão husu Povu Timor-Leste hatudu valores kulturais respeitozu, bainhira vizita, Sua Santidade Papa Fransisco mai Timor-Leste iha fulan Setembru 2024.
Xefi Governu Kay Rala Xanana Gusmão hateten, vizita Sua Santidade Papa Fransisco mai Timor-Leste importante tebe-tebes tamba ne’e, Xefi Governu husu sarani katolika Timór hatudu respeitu durante prezensa Papa Fransisco iha Timor-Leste.
“Papa Fransisco nu’udar lider igreija katolika mudial tamba ne’e nu’udar Primeiru-Ministru husu ba ita nia povu no sarani sira hotu iha teritoriu nasionál atu hatudu respeitu banhira Papa Fransisco nia prezensa iha ita nia le’et” informa, Primeiru-Ministru Kay Rala Xanana Gusmão ba, Jornalista sira hafoin remata enkotru semanal ho Prezidenti Republika (PR) José Ramos Horta, iha Palasiu Prezidensial, Aitarak-laran, Quinta (27/06/2024)
Governante ne’e fundamenta, hafoin hasoru malu ho Prezidenti Republika, parte Governu no Estadu Timor-Leste diskute kona-ba asuntu importante vizita, Sekretariu Jeral Organização das Naçõens Unidas António Guterres mai Timor-Leste inklui realsa asuntu importante vizita, Estadu no Pastoral Sua Santidade Papa Fransisco iha loron sia 9-11 fulan, Setembru.
“Ita nia nasaun Timor-Leste maioria sarani katolika, tamba ne’e ba familia, inan aman no joventude sira iha 13 Munisipiu atu kopera ho Governu hodi hatudu ita nia respeitu, banhira bainaka importante sira mai iha ita nia le’et liu-liu prezensa Papa Fransisco no konsellu lider igreja katolika husi vatikadu”.
Enkuantu, antes ne’e ekipa delegasaun vatikadu hato’o apresiasaun ba Governu no igreja kona-ba preparasaun ne’ebe hala’o fazeadamente, maibé atingi ona pursentu 50.
Aleinde ne’e mos representante vatikadu iha Timor-Leste Monseñor Marco Sprizze hateten, vatikadu satisfeitu ho ekipa konjunta Governu no igreja nia esforsu kona ba vizita Amu Papa Francisco.
Entretantu iha loron lima (5) fulan Juñu foin lalais ne’e, Ministru Administrasaun Estatal, Tomas Cabral hateten, Governu serbisu hamutuk ho ekipa konjunta igreiza katolika Timor-Leste nian, sei esforsu aan atu konklui preparasaun molok loron 15 Amu Papa to’o Timor-Leste.
Jornalista : João Maritho & Guilhermino Ramos