Vizita Prezidente Índia, Selebra Akordu 3 Inklui Interkámbiu Kultural

SAPNewsTL, Dili – Prezidente Repúblika Índia, Smt. Droupadi Murmu hasoru-malu ho Primeiru-Ministru (PM), Kay Rala Xanana Gusmão ho membru IX Governu Konstitusionál, durante sorumutu parte rua selebra  akordu tolu hodi servisu hamutuk ba futuru.

Tuir komunikadu ne’ebe SAPNews asesu liu hosi Pajina Xanana Ba Ema hotu katak presenza Presidente Repúblika Índia iha Timor-Leste ne’e asina akordu tolu mak Izensaun Obrigasaun Vistu bá Passaporte Titulares Diplomátiku no Ofisial, Programa Interkâmbiu Kulturál entre Governu Repúblika Demokrátika Timor-Leste ho Governu Repúblika Índia no Kooperasaun no Kolaborasaun kona-bá Radiodifuzaun entre Rádiu no Televizaun Timor-Leste (RTTL) ho Prasar Bharati, Índia (Broadcasting Corporation of India).

Akordu dahuluk kona-bá Izensaun Obrigasaun Vistu bá Passaporte Titulares Diplomátiku no Ofisial, akordu ne’e   assina hosi Ministru Negósiu Estranjeiru no Kooperasaun Timor-Leste (MNEC-TL), Bendito dos Santos Freitas ho Embaixadór Extraordináriu no Plenipotensiáriu Repúblika Índia, Sandeep Chakravorty.

Akordu daruak Memorandu Entendimentu kona-bá Programa Interkâmbiu Kulturál entre Governu Repúblika Demokrátika Timor-Leste ho Governu Repúblika Índia bá tinan 2024-2028, akorde refere assina hosi Sekretáriu Estadu Arte no Kultura, Jorge Soares Cristovão ho Embaixadór Extraordináriu no Plenipotensiáriu Repúblika Índia, Sandeep Chakravorty.

Akordu datoluk maka, Memorandu Entendimentu bá Kooperasaun no Kolaborasaun kona-bá Radiodifuzaun entre Rádiu no Televizaun Timor-Leste (RTTL) ho Prasar Bharati, Índia (Broadcasting Corporation of India), akordu ne’e assina hosi Embaixadór Extraordináriu no Plenipotensiáriu Repúblika Índia, Sandeep Chakravorty ho Prezidente Konsellu Administrasaun RTTL, José António Belo “TARALEU”.

Durante enkontru ne’e, Primeiru-Ministru, Xanana Gusmão agradese bá Índia oan sira ne’ebé apoia Timor-Leste (TL) durante tempu rezisténsia no hafoin ukun-an.

Antes ne’e Timor-Leste estabelese ona kooperasaun iha área estratéjiku sira mak hanesan setor edukasaun, saúde, agrikultura no seluk tán.

Vizita ofisiál iha sábadu 10 Agostu 2024 ne’e nu’udar vizita dahuluk Xefe Estadu Índia nian mai TL no vizita ida-ne’e hanesan parte ida hosi ajenda vizita Prezidente Índia iha rejiaun pasífiku inklui nasaun Fiji ho Nova Zelándia.

Durante enkontru ASEAN-India ne’ebé hala’o iha ámbitu simeira ASEAN bá dala-43 iha Setembru tinan kotuk, Primeiru-Ministru Índia Narendra hodi anunsia desizaun atu estabelese embaixada Índia iha Díli.

Deklarasaun ofisiál ne’ebé publika iha pájina ofisiál Ministériu Negósiu Estranjeiru Índia hateten katak, Desizaun ne’e refleta importánsia hosi relasaun amizade entre Índia-ASEAN ho Timor-Leste.

Sorumutu entre Primeiru Ministru Kayrala Xanana Gusmão no Prezidente Repúblika Índia, Smt. Droupadi Murmu ne’e hala’o iha Palásiu Governu Dili, 10 Agustu Tinan 2024.

Jornalista : Marciana da Conceição