Votu Folin Osan Mean, Aneceto Husu Ema Hotu Favor Ba Vota & Determina Destinu Estadu

SAPNewsTL, Manatutu : Relasiona eleisaun parlamentar ne’ebe sei realiza iha loron 21 Maiu 2023,  Xefe Aldeia Leohaat Aneceto Quintão, konsidera eleisaun parlamentar tinan ne’e importante tebes, ema hotu presiza ba vota, vota hodi determina distinu nasaun ba tinan lima mai

“Eleisaun tinan ne’e importante tebes, ita hotu tenki ba vota, votu ida folin osan mean, votu mak save ba desenvolvimentu, favor ba vota para bele determina distinu nasaun ba tinan lima mai, ita nia votu bele determina ita nia desenvolvimentu, vota konsiensia no matenek hodi hili ita nia ukun nain sira ne’ebe bele hadia desenvolvimentu no lori moris diak ba povu tomak”. Tenik Xefe Aldeia Leohaat Aneceto Quintão ba SAPNewsTL iha Santuáriu Nain Feto Soibada, 13/05/2023

Xefe Aldeia ne’e husu ema hotu hodi kontribui ba paz no estabilidade iha ambitu eleisaun parlamentar 2023, nune’e ema hotu bele sente livre, seguru hodi ba tuir eleisaun ho diak no susesu

“Ha’u husu ba ema hotu hodi kontribui ba paz, amizade, unidade no estabilidade iha tempu eleisaun paramentar no depois de eleisaun”. Hatete nia

Iha Parte seluk, Xefe Aldeia Leohaat Aneceto Quintão haktuir, kleur tebes ona estrada diresaun Soibada hahu husi mota boot to’o Soibada Villa aat no seidauk hetan atensaun husi estdau, tanba ne’e husu ba guvernu mai, favor tau atensaun ba estrada Soibada

“Ami husu favor boot ida ba guvernu foun ne’ebe sei mai, atu tau matan ba ami no hadia ami nia estrada hahu husi Ponte boot Soibada nian to’o mai Soibada villa no lga ba Suku lima hanesan Suku Lala, Leohaat, Fatu- Makerek, Samoro no Manufahi tanba estrada ne’e difikulta tebes sirkulasaun transporte  sira ne’ebe kompostu husi Aldeia sanulu”. Nia dehan

Autoriedade Lokal ne’e hatutan, Rai Soibada rai ida furak ho beleza natural, rai ida istóriku no dook tebes husi villa, Soibada ne’ebe iha Santuáriu Nasionál ida, maibe nia estrada kontinua aat, situasaun ne’e sai preokupasaun boot ba komunidade sira

“Ami husu ho haraik an, atu guvernu foun mai bele hadia ami nia estrada ne’ebe sei aat hela, ami preokupa tebes tanba wainhira udan susar tebes ba kareta sira atu ultrapassa, Soibada iha nia Santuáriu Nasionál ida ne’ebe kada tinan ema sempre mai vizita, maibe estrada guvernu la tau matan, kolejiu antigu ne’ebe siha mos, oras ne’e sai abadonadu, ami preokupa tebes”. Dehan Xefe Aldeia Leohaat

Entretantu, tuir observasaun nota katak daudaun ne’e sidadaun sira ne’ebe hela iha kapital Dili, hahu aranka ona ba munispiu sira hodi partisipa iha eleisaun, balun hetan fasilita husi partidu sira, balun fasilita husi guvernu no ablun fasilita sira nia na rasik

Tuir dadus ne’ebe SAPNewsTL asesu liu husi Sekretariadu Tekniku Administrasaun Eleitora (STAE) hatudu katak eleitor ba eleisaun tinan ida ne’e hamutuk 890.145, entre sira 11.000 ital mai sei vota iha rai-liur

Jornalista : Luis Pailofo