Wainhira To’o Palásiu Presidente Nicolau Lobato, PM Albanese Fo Haruk Ba Bandeira TL
Imajem : Primeiru Ministru Austrália Anthony Albanese hakruk ba Bandeira Timor-Leste iha Palasiu Presidente Nicolau Lobato Dili, 28/01/2026. Foto : Média GPR
SAPNewsTL, Dili : Hafoin Primeiru Ministru Austrália Anthony Albanese to’o Aeroportu, Prezidente Repúblika Jose Ramos-Horta tula ho Mini Moke ne’ebe akompanha husi Primeiru-Ministru Kay Rala Xanana Gusmão to’o Palásiu Presidente Nicolau Lobato.
Objetivu prinsipal hosi vizita oficial ne’e hodi diskute relação no kooperasaun bilateral entre Timor-Leste no Austrália ne’ebe metin, forte no buras iha diversifikasaun ekonómika, seguransa marítima no dezenvolvimentu kapitál umanu.
Wainhira to’o Palásiu Presidente Nicolau Lobato, Primeiru Ministru hetan simu ho parada militar, iha ne’ebe hananu inu nasional hosi Austrália no Timor-Leste, no Xefe Governu Austrália ne’e fo ninia hakruk ba Bandeira Timor-Leste.
Prezidente Repúblika, José Ramos-Horta mós kondekora ho órdem Grande Colár Timor-Leste ba PM Austrália Anthony Albanese iha salaun Xina nu’udar símbolu rekunhesimentu no dalan ba hametin lasu amizade.
Durante iha Palásiu Presidente Nicolau Lobato, Prezidente Ramos-Horta, hamutuk ho Primeiru-Ministru Gusmão, Vise Primeiru-Ministru sira, membru Governu eskollidu balun fo komprimentu no bem-vindu ba Primeiru-Ministru Austrália.
Tuir mai, líder na’in rua ne’e hakat bá Salaun ASEAN hodi halo asinatura ba livru bainaka, hasai fotografia, no halo enkontru entre líder na’in rua ne’ebe akompaña husi sira nia membru delegasaun sira.
Iha enkontru ne’e, Prezidente Ramos-Horta hato’o Timor-Leste nia agradesimentu kle’an ba Austrália nia apoiu konstante ba dezenvolvimentu iha setór oioin. Diskusaun sira foka ba hametin kolaborasaun iha diversifikasaun ekonómika, seguransa marítima no dezenvolvimentu kapitál umanu.
Líder sira reafirma sira-nia kompromisu atu reforsa mobilidade traballadór nian iha ámbitu programa Pacific Australia Labour Mobility (PALM) no promove kooperasaun iha matéria seguransa nian, iha ámbitu akordu bilaterál 2022 nian, ne’ebé abranje formasaun iha matéria defeza nian no hametin kapasidade polísia.
Diskusaun sira seluk subliña apoiu ba kreximentu setór privadu no projetu estratéjiku boot sira, inklui dezenvolvimentu Greater Sunrise.
Reflete kona-ba parseria ne’e, Prezidente J. Ramos-Horta deklara: “Timor-Leste no Austrália la’ós viziñu de’it – ita nu’udar família. Ita-nia istória ne’ebé fahe, valór komún no ita-nia kompromisu ba pás no prosperidade halibur ita”.
“Ohin, ita reafirma ita-nia promesa atu la’o hamutuk rumu ba futuru ida ho seguransa, oportunidade no amizade ne’ebé dura ba tempu naruk.”
Timor-Leste no Austrália estabelese relasaun diplomátika formál iha tinan 2002. Ohin loron, parseria ne’e abranje kooperasaun polítika, ekonómika, seguransa no sósiu-kulturál, hodi reflete vizaun ne’ebé fahe ba rejiaun ida ne’ebé estável, prósperu no iha ligasaun.
Tuir ajenda, Primeiru Ministru Austrália Anthony Albanese sei fila hikas ba Austrália iha Aban, loron 29 Janeiro 2026.