𝗔𝗺𝗮𝗻 𝗗𝗲𝗳𝗶𝘀𝗶𝗲𝗻𝘁𝗲 𝗠𝗲𝗻𝘁𝗮𝗹 & 𝗢𝗮𝗻 𝗗𝗲𝗳𝗶𝘀𝗶𝗲𝗻𝘁𝗲 𝗠𝗮𝘁𝗮𝗻 ! 𝗟𝗮’𝗼 𝗕𝘂𝗸𝗮 𝗧𝘂𝗹𝘂𝗻

SAPNews TL, Ainaro : Sidadaun hosi husi Suku Muulo Aldeia Bleheto Posto Hato-Builico Munisipiu Ainaro ne’ebe sofre defisiente mental la’o ain hosi Bleheto to’o Dare, oan feto ne’ebe hetan kanek hetan hela tratamentu hosi pessoal saúde iha Mau-Chiga.

Marciana da Conceição – SAPNewsTL

Tuir publikasaun Adventure Ram-Lau Kablake haktuir aman ho ho naran Armando Amaral de Deus sofre moras mental no oan ho naran Joselina de Deus defisiente matan no hetan kanek iha kotuk laran, sira rua la’o ain hosi Bleheto to’o Dare.

“Atu informa hela katak, iha sidadaun nain rua husi Suku Muulo Aldeia Bleheto Posto Hato-Builico Munisipio Ainaru, aman ho oan hetan moras ho kondisaun difisiensia fisiku mental no matan”. Agora dadaun la’o mai iha hela Suku Nuno-Mogue Aldeia Nuno-Moguelau, pesoal nain rua ne’e aman ho oan la’o husi Bleheto mai Dare”. Sita Adventure Ram-Lau Kablake, Ainaro, 04/09/2025

Adventure Ram-Lau hatutan, hafoin sidadaun na’in rua ne’e to’o Dare hetan assistênsia hosi Zelia nu’udar parteira ne’ebe destaka iha Mau-Chiga.

“Parteira ne’ebe destaka iha Iha suku Mau-Chiga mak ajuda hela lori mai nia uma iha Nuno-Mogue hodi halo tratamentu, pessoal nain rua hela iha Bleheto”.

Nia mós husu ba parte Ministériu Solidariedade Sosial no Inkluzaun (MSSI) munisipiu Ainaro no autoridade lokal sira hodi fo apoia emergênsia ba sidadaun na’in rua ne’ebe sofre defisiente mental no matan.

“Husu ba parte MSSI Munisipio Ainaro no Autoridade Munisipio no posto no Suku atu halo asisténsia sosial ba sidadaun nain rua, Joselina iha kanek boot iha kotuk laran tamba ahi mak han no grave los inklui defisiente matan”.

“Espera katak liu husi informasaun ne’e bele loke maluk sira nia laran hodi fo tulun ba ita nia ema nain rua ne’e”. Nia hein

Liu tiha loron ida, Prezidente Repúblika, Jose Ramos Horta orienta halo intervensaun urjente liu hosi orienta Unidade Servisu Sosiedade Sivíl no Assuntu Sosiál (SSSAS) Prezidénsia Repúblika desloka ba suku Mulo, Postu Administrativu Hato-Builico, Munisípiu Ainaro hodi haree direta no fó asisténsia lalais ba aman ho oan ida ne’ebé iha kondisaun defisiénsia fíziku-mental.

Armando Amaral de Deus tinan 49 no nia oan feto Joselina de Deus tinan 23 moris ho limitasaun grave rezulta husi ahi-han ne’ebé prova kanek boot iha kotuk laran. Maski kondisaun ne’e grave loos maibé família to’o agora seidauk simu apoiu sosiál ruma.

Kazu ida ne’e primeiru-vez fó hatene husi profisionál saúde Zélia da Silva de Jesus, hosi Postu Saúde Mau-Chiga, ne’ebé hasoru aman no oan feto iha dalan ho kondisaun ne’ebé difísil.

“Iha oras 17:48, rai komesa nakukun, bainhira ha’u fila husi servisu fatin, iha dalan ha’u hasoru avo ho alin feto ida, ne’ebé avo dada hela nia oan nia liman. Kondisaun alin feto ne’e ha’u haree hanesan la seguru no ha’u mós sente aroma la-diak husi sira. Ha’u para motor no husu informasaun, ha’u-nia laran sente triste tebes haree kondisaun ne’e”, hateten Zelia da Silva iha nia mensajen liu-husi Telefone. Sita media PR

Hafoin nia foti inisiativa atu tula avo ho nia oan ne’e ba nia uma hodi halo tratamentu mediku. Família ne’e husu ona asisténsia sosiál ba Ministériu Solidariedade Sosiál no Inkluzaun (MSSI) no autoridade lokál, maibé seidauk hetan responde ka asaun ruma.

Tuir orientasaun husi Prezidente Ramos-Horta, Ekipa Prezidénsia Repúblika liu husi Unidade Servisu Sosiedade Sivil no Asuntu Sosiál (SSSAS) hamutuk ho doutór espesialista nain rua husi Kuba, halo vizita direta kedas ba familia ne’e iha Ainaro. Ekipa médiku fó konsulta inisial no deside desloka ona família ne’e ba Hospital Nasionál Guido Valadares (HNGV), Dili, hodi hetan tratamentu mediku apropriadú.