𝗔𝗽𝗼𝗶𝗮 𝗔𝗱𝗲𝘇𝗮𝘂𝗻 𝗧𝗟 𝗕𝗮 𝗔𝗦𝗘𝗔𝗡 ! 𝗣𝗠 𝗫𝗮𝗻𝗮𝗻𝗮 𝗔𝗽𝗿𝗲𝘀𝗶𝗮 𝗥𝗲𝗽𝘂́𝗯𝗹𝗶𝗸𝗮 𝗞𝗼𝗿𝗲𝗮
Imajem : Primeiru Ministru Kay Rala Xanana Gusmão apresia apóia República Corea Sul ba Timor-Leste nia adesão ba ASEAN iha Malásia.
SAP News TL, Malásia : Primeiru-Ministru (PM), Kay Rala Xanana Gusmão apresia tebtebes ho apoiu hosi Repúblika Koreia bá Timor-Leste ninia adezaun bá Association of Southeast Asian Nations (ASEAN).
Marciana da Conceição – Mídia Sapnews
Primeiru-Ministru Xanana Gusmão hato’o apresiasaun ne’e liu-hosi intervensaun iha Simeira ASEAN – Repúblika Koreia (ROK) bá dala-26 iha Kuala Lumpur, Malázia, segunda (27/10/2025).
“Timor-Leste apresia tebtebes Repúblika Koreia nia apoiu metin bá Timor-Leste nia adezaun bá ASEAN,” PM Xanana apresia
Timor-Leste mós elojia finalizasaun Planu Asaun foun ASEAN-ROK nian bá 2026-2030. Marku ida-ne’e sei orienta Parseria Estratéjika Abranjente sira iha tinan lima oin mai no fó kbiit atu harii parseria ida ne’ebé reziliente no responde bá povu sira-nia aspirasaun.
Planu Asaun harii iha realizasaun substansiál sira iha diálogu polítiku, konetividade ekonómika, transformasaun dijitál no dezenvolvimentu sustentável.
Timor-Leste fó benvindu bá kompromisu Koreia nian atu habelar finansiamentu kooperasaun nian, ho promesa atu halibur kontribuisaun anuál bá programa sira ASEAN nian.
Investimentu sira hanesan ne’e, reflete apoiu forte bá sentralidade ASEAN, konsensu rejionál no Vizaun 2045 ne’ebé líder hotu-hotu apoia.
Timor-Leste mós apoia maka’as prioridade sira kona-bá konetividade, dezenvolvimentu kapitál umanu no dezenvolvimentu sustentável atu garante katak oportunidade sira ne’ebé kria hosi parseria sira to’o bá segmentu hotu-hotu hosi sosiedade sira.
Habelar fahe koñesimentu, troka edukasionál no infraestrutura dijitál maka fundamentál atu taka lakuna sira. Timor-Leste mós halo advokasia bá asesu luan liu-tán bá bolsa estudu no programa dezenvolvimentu abilidade sira, nune’e foin-sa’e sira bele ekipadu bá futuru.
Parseria Estratéjiku Komprensivu ASEAN-ROK aprezenta oportunidade ida ne’ebé laiha presedente ba nasaun sira hotu ASEAN nian.
Timor-Leste hein atu kontribui ho ativu, avansa integrasaun ekonómika, promove kooperasaun iha edukasaun no formasaun no hametin aplikasaun direitu internasionál.
“Mai ita hamutuk hodi harii futuru ida ne’ebé nakloke, inkluzivu no sustentável bá jerasaun sira tuir mai,” Xanana Gusmão konvida.
Simeira ASEAN-ROK bá dala 26 ne’e partisipa hosi Líder ASEAN ka sira nia reprezentante, Prezidente Repúblika Koreia (ROK), Lee Jae-myung no Sekretáriu-Jerál ASEAN, Kao Kim Hourn.
Simeira ne’e reafirma kompromisu hosi parte rua atu avansa liu-tán Parseria Estratéjiku Komprensivu ASEAN-ROK ne’ebé estabelese iha tinan kotuk, no diskute kona-bá diresaun kooperasaun iha futuru.
Simeira ne’e mós fó benvindu bá Planu Asaun foun (2026-2030) no hein bá ninia implementasaun ne’ebé efetivu.