𝗧𝗟 & 𝗠𝗮𝗹𝗮𝘀𝗶𝗮 𝗣𝗿𝗲𝘀𝗶𝘇𝗮 𝗦𝗲𝗿𝘃𝗶𝘀𝘂 𝗛𝗮𝗺𝘂𝘁𝘂𝗸 𝗜𝗵𝗮 𝗔𝗿𝗲𝗮 𝗗𝗶𝗷𝗶𝘁𝗮𝗹𝗶𝘇𝗮𝘀𝗮𝘂𝗻 & 𝗞𝗮𝗽𝗮𝘀𝗶𝘁𝗮𝘀𝗮𝘂𝗻

Imajem : Deputada bankada FRETILIN Cristina Yuri Rebelo Iha Uma Fukun PN, 24/09/2025

SAPNewsTL, Dili : Hafoin partisipa vizita Primeiru Ministru Malázia Dato Seri Anwar Ibrahim iha plenária Parlamentu Nasionál, Deputada bankada FRETILIN Cristina Yuri Rebelo hateten presiza servisu hamutuk iha area dijitalizasaun no kapasitasaun ba joven sira.

𝐌𝐚𝐫𝐜𝐢𝐚𝐧𝐚 𝐝𝐚 𝐂𝐨𝐧𝐜𝐞𝐢𝐜ã𝐨 – 𝐒𝐀𝐏𝐍𝐞𝐰𝐬𝐓𝐋

“Ami sente kontente no apresia tebes ba vizita husi Primeiru-Ministru Malázia mai iha Timor-Leste, ha’u simu iha ne’e nu’udar reprezentante povu sente haksolok”.

“Iha buat barak ne’ebe ita tenke hare’e no servisu hamutuk liliu iha area estratejiku sira kona-ba dijitalizasaun no kapasitasaun ba ita-nia joven. Ita tenke haree ba alternativu iha futuru, aban bairua ita bele servisu hamutuk maibe parte Parlamentu nian iha buat barak ne’ebe esensiál tebes atu parte rua ne’e bele servisu hamutuk”. Dehan Deputada Bankada opozisaun Cristina Yuri Rebelo ba jornalista sira iha sala plenária Parlamentu Nasionál, Kuarta-Feira 24/09/2025.

Deputada bankada FRETILIN ne’e konsidera vizita Primeiru-Ministru Malázia laos vizita bain-bain, nia memoriza fila fali vizita PM Malázia Mahathir Muhammad nia vizita mai Timor-Leste, hafoin Timor ukun aan.

“Vizita ida ne’e laos vizita baibain, tanba ita lori fali ba istorikamente sira mai kedas Timor depois de referendum, ne’e mak ohin ami mensiona kona-ba vizita PM Malázia Dr. Mahathir Muhammad mai Timor-Leste hodi hatudu sira-nia seriedade no komitmentu, hatudu mos sira-nia apoiu ba Timor-Leste”. Nia subliña.

Cristina Yuri Rebelo apresia ho Malázia nia apoiu ba Timor-Leste hodi adere ba ASEAN, TL nia adezaun laos deit atu sai membru maibe hodi sai kontributor boot liu-liu ba prosperiedade, paz no justisa ne’ebé sai vizaun ASEAN nian.

“Ami mos apresia ba Malázia nia apoiu ba Timor-Leste nia adezaun ba ASEAN, ami husu katak adezaun ba ASEAN ne’e laos ita tama deit atu sai parte ida husi ASEAN maibe ita ba iha ne’eba para ita mos bele sai kontributor boot ida, liu-liu ba prosperiedade, paz no justisa”.

Iha fatin hanesan, Deputada Partidu PLP Maria Angelina Lopes Sarmento fo agradese ba Malázia ne’ebé sai parseiru importante ho Timor-Leste.

“Ami agradese ba Malázia ne’ebé durante ne’e sai parseiru importante ba Timor-Leste iha setor lubuk ida liu-liu iha defeza, seguransa, saúde, dezenvolvimentu rekursu umanu, agrikultura no setor ekonómia nian”.

“Ita hare’e husi parte ekonomia liu-liu iha negosiu Malázia ho Timor-Leste ninia kooperasaun ne’e apoiu entermus de fundus atinji ona 43.7 milloens ne’ebé ajuda tebes Timor-Leste atu estimula ninia ekonomia”.

“Embora, ita sei iha dezafiu barak iha kresimentu ekonomiku no diversifikasaun ekonómika maibe apoiu husi parseiru sira liu-liu bilaterál sira ajuda responde dejafiu ne’ebé estadu no país ida ne’e hasoru”.

Deputada Maria Angelina agradese ba Malázia tanba timoroan barak hetan bolsa estudu hodi kontinua sira-nia estudu iha nivel universitáriu iha nasaun refere no balun mos sai traballador hodi dezenvolve moris no familia nian.

“Iha rekursu umanu, ita agradese tanba timoroan lubuk ida maka hetan bolsa estudu hodi kontinua iha universidade sira iha Malázia. Maibe laos ida ne’e deit, atualmente ita-nia sidadaun timoroan mos balun sai traballador hodi bele dezenvolve sira-nia familia”.

Nia reafirma fila fali ho diskursu Primeiru Ministru Malázia nian ne’ebé elozia ho bankada opozisaun sira iha PN ne’ebé halo kritika no auto auto-kritika ba governasaun.

“Primeiru Ministru mos elozia tebes bankada opozisaun sira nia papel iha Parlamentu Nasionál hodi halo kritika no auto-kritika ba lalaok guvernasaun nian”.

“Primeiru Ministru Malázia mos dehan katak ho opozisaun nia prezensa fó oportunidade ba bankada governu atu esplora oportunidade sira hodi bele hadia diak-liu tan nia gorvernasaun”.

Imajem : Primeiru Ministru Malásia Dato Seri Anwar Ibrahim hamutuk ho Presidente Parlamentu Nasionál Maria Fernanda Lay iha Uma Fukun Parlamentu Nasionál Dili, 24/09/2025

Primeiru-Ministru Malázia Dato Seri Anwar Ibrahim apresia ho Timor-Leste ne’ebé esforsu atu prense rekizitu hotu hodi adere ba ASEAN no sai fraternidade iha ASEAN.

“Ha’u agredese ba Timor-Leste nia akollamentu no apresia esforsu ne’ebé mak Timor-Leste halo hodi preense rekizitu sira ba membru ASEAN nian”. Dehan Primeiru-Ministru Malázia Dato Seri Anwar Ibrahim liu husi nia diskursu.

Nia mos apresia ho Parlamentu Nasionál iha ne’ebé partidu no deputadu sira defende politika lahanesan maibé sempre unidu hodi defende interese komun.

“Apresia mos demokrasia ne’ebé la’o iha Timor-Leste, espesialmente iha Parlamentu Nasional ne’ebé hatudu katak mesmu partidu no deputadu sira defende politika diferente, maibe sempre unidu hodi defende interese komun. Ha’u afirma katak Malázia kontinua konsistente apoiu Timor-Leste nia adezaun ba ASEAN”.

Ibrahim reafirma katak ASEAN aposta ba inkluzividade no sustentabilidade ne’ebe foka mós ba konektividade liliu iha integensia artifisial no tranformasaun digital.

“Ita tenki representa aspirasaun povu nian, dignidade mane no feto nian iha mundu, ha’u respeitu imi-nia lian, ASEAN aposta ba inkluzividade, sustentabilidade no konektividade iha tranformasaun digital no artifisial intelegensia, proteze ita-nia povu no proteze ita-nia valor sira”. Anwar Ibrahim sublinha