𝗫𝗮𝗻𝗮𝗻𝗮 : “𝗝𝗼𝘃𝗲𝗻 𝗦𝗶𝗿𝗮 𝗣𝗿𝗲𝗽𝗮𝗿𝗮 𝗔𝗻, 𝗥𝗮𝗶 𝗻𝗲’𝗲 𝗦𝗲𝗶 𝗘𝗻𝘁𝗿𝗲𝗴𝗮 𝗕𝗮 𝗜𝗺𝗶”.
Imagem : Primeiru Ministru Kay Rala Xanana Gusmão iha Dili, 29/10/2025
SAP News, Díli : Hafoin partisipa simeira ASEAN nian ba dala 47° no adezaun Timor-Leste ba ASEAN, Primeiru Ministru Kay Rala Xanana Gusmão ho delegasaun fila hikas mai Díli, populasaun sira iha kapital simu ho laran-ksolok no halo komboiu husi Comoro to’o Aitarak-Laran.
Daniel da Silva & Marciana da Conceição – Mídia Sapnews
Wainhira Primeiru Ministru Kay Rala Xanana Gusmão to’o aeroportu internasional Nicolau Lobato simu direta hosi Vise Primeiru Ministru Mariano Assanami Sabino hamutuk ho membru governu sira, deputadu sira no povu iha kapital Dili.
Tuir mai, Primeiru Ministru Kay Rala Xanana Gusmão mós halo konferensia imprensa hodi esklarese ba povu kona ba admisaun Timor-Leste ba ASEAN.
“Jovens tenki prepara an tanba depois ami liu tiha, rai ne’e sei entrega ba imi, muda imi hanoin, mindset, karakter hodi kontibui, joven sira labele husu ba nasaun saida mak nasaun atu fo maibe saida mak imi bele kontribui hodi dezenvolve rai ne’e”.
“Tama ASEAN oportunidade ida mós dezenvolve ita-nia kapasidade intelektual, ba haree hodi bele dezenvolve rai ne’e, husu ba o-nia saida mak o bele fo ba estadu”. Hateten Primeiru Ministru Kay Xanana Gusmão iha Palasiu Presidente Nicolau Lobato, 29/10/2025
Xanana hatutan, “inovasaun ne’e importante tebtebes, ita kontente tanba ita loke odamatan hodi ba aprende tan, diak ba ita tama ASEAN, responsabilidade iha ita hotu nia-an, laos atu tau deit bandeira no festa, maibe buat barak atu aprende, koko, koalia kona-ba desempregu, imi rasik mak kria, job creation activity, laos hein bolu deit, bolu tiha ba la halo buat ida”.
“Ita sei aproveita oportunidade, hamutuk ho sira hodi dezenvolve rai ida ne’e”. Nia konklui
Durante komboiu no akompanha Primeiru Ministru Xanana Gusmão hosi aeroportu Comoro to’o Palácio Presidencial Nicolau Lobato, iha luron ninin labarik barak, estudante barak no populasaun sira ho laran ksolok hodi hakilar “viva Timor-Leste, Viva Avo Nana, Viva ASEAN”.
Populasaun sira ne’ebe hamrik iha dalan ninin, uza kamiza ” Together We Rise”, kaer bandeira ASEAN, bandeira Timor-Leste, Indonésia, Brunei, Laos, Malásia, Tailândia, Kambodia, Singapura, Filipina, Vietname no Myanmar hodi hein Primeiro Ministro Kay Rala Xanana Gusmão hahu forma hosi Aeroporto Internacional Nicolau Lobato to’o Palácio Presidencial Nicolau Lobato Aitarak laran.
Lembra fali katak, eventu importante ne’ebe Primeiru Ministru partisipa maka Asinatura hosi Deklarasaun kona-ba Admisaun Timor-Leste nian ba ASEAN iha loron 26 Outubru 2025 inklui enkontru importante sira selukseluk hosi loron 26-28 Outubro 2025.
Serimónia Asinatura hosi Instrumentu Adezaun ba Tratadu Amizade no Kooperasaun iha Sudeste Aziátiku (TAC) hosi Finlándia, Serimónia Asinatura hosi Protokolu Alterasaun Daruak hosi Komérsiu ASEAN nian Akordu (ATIGA), Simeira Líder sira Parseria Ekonómika Komprensivu Rejionál (RCEP) ba dala 5 no mós Serimónia Aprezentasaun Prémiu ASEAN.
Série enkontru nivel aas nian ne’e fornese oportunidade importante hodi halo balansu ba progresu ASEAN nian, estabelese diresaun sira iha futuru no reafirma kompromisu ASEAN nian ba pás rejionál, estabilidade, seguransa no dezenvolvimentu sustentável no inkluzivu.
Delegasaun ofisial hosi Timor-Leste mak hanesan Presidente Republika José Manuel Ramos Horta, Primeiru Ministru Kay Rala Xanana Gusmão, Vise Primeiru Ministru Francisco Kalbuadi Lay, Ministru Negosius Estranjeirus no Kooperasaun Bendito Freitas no Vise Ministra Asuntu ASEAN Milena Maria Da Costa Rangel, Ministru Transporte no Telecomunicações Miguel Manetelo, Sekretariu Estadu Komunikasaun Sosial Expedito Dias Ximenes, Vise Ministru Asuntu Parlamentares Adérito Hugo da Costa no Xefe Bankada CNRT, FRETILIN, PD, KHUNTO & PLP.