Abertura Liga Timorense ! LFTL Fo Agradese Ba MJDAC, FFTL & PAM Manatuto
Imajem : Abertura Liga Timorense époka 2025 iha Estadium Manatutu, 24/05/2025. Foto : Média MJDAC
SAPNewsTL, Dili: Orgaun Liga Futebol Timor-Leste (LFTL) hato’o agradese ba Ministeriu Juventude Desportu Arte Kultura (sigla portuges MJDAC), Federasaun Futebol Timor-Leste (FFTL) no Prezidente Autoridade Munisipiu Manatuto (PAM), hafoin hala’o jogu abertura divizaun dahuluk entre Karketu Dili FC kontra AD SLB Laulara iha Estadium Manatuto.
Augusto dos Santos – SAPNews
“Ita hakarak agradese ba governu Timor-Leste liu husi MJDAC ho FFTL ne’ebe ajuda finanseiru hodi realiza Liga Timorense epoka 2025”, dehan Prezidente LFTL Ipolito Soares liu husi diskursu iha Estadium Manatuto Sabadu (24/05/2025).
Prezidente hatutan, agradese mos ba Prezidente autoridade munisipiu Manatutu tanba oferese ona Estadium Manatutu ba jogu divizaun dahuluk Liga Timorense epoka 2025.
Iha biban hanesan, Ministru Juventude Desportu Arte Kultura Nelyo Izaac Sarmento dehan, Manatuto hetan privilejiu boot ida bele halo abertura Liga Timorense divizaun dahuluk epoka 2025.
“Manatutu ne’e privilejiu boot ida ohin ita bele halo abertura Liga Timorense divizaun dahuluk epoka 2025 iha munisipiu Manatutu mezmu Estadium Manatuto seidauk inaugura”, tenik Nelyo
Ministru informa, Úniku Manatutu mak iha kondisaun naton atu realiza jogu abertura divizaun dahuluk Liga Timorense epoka 2025, nune’e komesa ohin ba oin Estadium Manatuto sei akontese jogu barak liu tan ba divizaun dahuluk Liga Timorense epoka 2025.
Governu hakarak dezenvolve Futebol liu husi lori futebol ba munisipiu maibe iha munisipiu balun infraestrutura balun seidauk kompletu maibe neineik sei to’o iha ne’eba.
Governante ne’e salienta, autoridade regulador Futebol Timor-Leste inklui LFTL ho governu tenki fo apoiu tomak iha termu finanseiru no infraestrutura atu uza ba jogu.
Regulamentu ne’e orgaun LFTL sira-nia responsabilidade ba klube sira iha divizaun dahuluk no daruak iha obrigasaun atu kumpri regulamentu iha orgaun LFTL no FFTL, nune’e jogador sira bele respeita malu, hatudu responsabilidade no sai ezemplu diak ba jogador foun sira futuru mai.