Ahi-Han Uma Iha Oesilo ! Alcino Fo Agradese Ba APC
Imagem : Ahi-han uma iha Postu Administrativu Oesilo, RAEOA, 05/05/2025
SAP News TL, RAEOA : Akontese insendiu ahi han uma ida iha bairo kuafe’u aldeia Pune Suku Usi-tasae Postu Administrativu Oesilo, Rejiaun Administrativu Espesial Oe-Cusse Ambeno (RAEOA) maizumenus 14:16 Oras Timor-Leste.
Tuir vitima afetadu insendiu, Alcino Quelo sente triste tanba insendiu ne’e akontese derepente hodi rezulta sira halai namkari no la konsege salva sasan uma laran balun.
“Ami triste tanba ami la hatene ahi ne’e mai husi ne’ebe, derepente ahi han ona uma maka ami hakfodak halai sai, akontesimentu ne’e rezulta ami nia sasan uma laran balun la konsege salva”. Informa vítima Alcino Quelo ba ekipa kontributor SAPNews iha Oesilo,05/05/2025
Alcino konta, insendiu ohin ne’e mosu primeiru husi uma kakuluk, tanba uma du’ut, ne’ebe ahi mosu boot kedas husi leten.
“Ami hotu-hotu hakfodak halai sai husi uma ida iha sorin, ami haree ahi suar sa’e makas ona, nune’e ami hakilar ho lian makas, tanis to’o maluk vizinu sira sai mai hotu kuru bee hodi rega ahi ne’e to’o mate”. Tenik Vitima Alcino Quelo
Hafoin inséndiu, parte sekretaria apoiu suku Usi-tasae Paulo Sufa informa kedas ba Autoridade Protesaun Civil ( APC ) RAEOA kona ba insendiu refere.
Nune’e, ekipa Autoridade Protesaun Civil ( APC ) RAEOA to’o kedas iha fatin akontesimentu iha tuku 18:00 Otl hodi fo apoia emergensia hanesan aihan no sasan uma-laran nian ba vítima inséndiu.
Hafoin simu apoia, Alcino Quelo agradese tebes ba governu liu husi Autoridade Protesaun Civil (APC) RAEOA tanba bele apoiu emergensia urgente aihan balun no sasan uma laran nian.
Vítima ne’e mós husu ba governu hodi apoia material uma nian, nune’e bele hadia ninia uma ne’ebé vítima hela ba ho ninia feen no oan sira.
Jornalista : Ariqui Crisanto Colo