Anula Bolsa da Mãe Jerasaun Foun ! Guvernu Sei Halo Estudu
SAPNewsTL, DILI- Reuniaun Konsellu Ministru(KM), governu aprova ona projeitu dekretu-lei n.22/2021,loron 10 fulan-novembru kona-ba Bolsa da Mãe-Nova Geração no dekretu-lei n.18/2012 loron 4 fulan-abril kona-ba Bolsa da Mãe ne’ebe apresenta husi Ministra Solidariedade Sosial no Inklusaun,Verónica das Dores.
Dekretu-lei n.18/2012,loron 4 fulan-abril ne’ebe kria subsidiu apoiu kondisionál “Bolsa da Mãe” ho subsidiu mensal nian ne’ebe la hanesan husi dolares amerikanu 9 to’o 10 ne’ebe baze siklu eskola ba labarik benefisiariu ba labarik sira ho difiseinte ne’ebe mak frekuenta hela eskola sei aumenta husi dolar amerikanu 5.
“Ho diploma ida ne’e, halo reforsu ba Subsídiu apoiu Kondisionál “Bolsa da Mãe”, ho aprezentasaun valór ba subsídiu mensál nian ne’ebé la hanesan, husi dólar amerikanu 8 to’o 10, ho baze iha siklu eskolár ba labarik benefisiáriu sira, nune’e insentiva sira-nia frekuénsia eskolár.” SapNewsTL assesu liu husi komunikandu emprensa, sorumutu konsellu Ministru iha palasiu Governu ne’ebe hala’o iha kuinta-feira(06/12/2023).
Aleinde ne’e, valór sira ne’ebé destina ona ba labarik sira ho defisiénsia ho idade eskolár no ne’ebé frekuenta hela eskola sei aumenta husi dólar amerikanu 5. Governu konsidera katak importánsia boot husi partisipasaun iha eskola, bainhira benefisiáriu ikus sira ho idade kompativel ho ida ne’e, sei sai kritériu ida husi kritériu sira ne’ebé estabelese ona, tamba, iha sentidu ida ne’e, integra polítika asisténsia sosiál ba perspetiva edukasionál nian ida.
Dekretu-lei n.22/2022 loron 10 fulan-novembru ne’ebe kria subsidiu ba inan isin-rua no labarik sira ne’ebe hanaran “Bolsa da Mãe Geração” sei halo revogasaun ba programa refere hodi hala’o estudu impaktu ida husi rezultadu sira ne’ebe mak alkansa ona.
“Revogasaun ba programa “Bolsa da Mãe-Nova Geração”, ne’ebé estabelese husi Dekretu-Lei N. 22/2021, loron 10 fulan-novembru, sai hanesan baze ba avaliasaun krítika ida husi polítika sira asisténsia sosiál nian ne’ebé iha vigór.”
Governu rekoñese importánsia atu proteje labarik ki’ik sira, hanesan konsagra ona iha Konstituisaun Repúblika Demokrátika Timor-Leste, maibé hatene katak importante halo ajustamentu hodi garante distribuisaun ida ne’ebé efikás ba rekursu sira.
Governu konsidera katak protesaun sosiál ba inan isin-rua importante tebes atu proteje labarik ki’ik sira (infánsia), maibé hatene katak molok fó kontinuidade ba disponibilidade subsídiu apoia sosiál nian ba inan isin-rua, importante ba Estadu hala’o estudu impaktu ida husi rezultadu sira ne’ebé alkansa ona no objetivu atu alkansa ba redusaun vulnerabilidade no korrespondénsia ho polítika natalidade país nian.
Jornalista : Marcela Mery da Costa