APFTL & OXFAM Halo Advokasia Ba Impaktu Mudansa Klimátika
SAPNewsTL, DILI- Alumni Parlamentu Foinsa’e Timor Leste (APFTL), servisu hamutuk ho OXFAM kria espasu diskusaun kona-ba impaktu mudansa klimátika ba komunidade inklui Ema ho Difisiénsia (EhD), feto no labarik sira iha Timor-Leste.
Objetivu husi dialogu ne’e hodi halo advokasia ida forte no diak, nune’e bele reduz impaktu klimátika ba komunidade sira ne’ebe vulneravel liliu feto no labarik sira.
Representante Presidente Alumni Parlamentu Foinsa’e Timor-Leste Ambrózio Colo hateten atividade ne’e organiza husi APFTL no OXFAM, dialogu ne’e atu halo advokasia ba mudansa klimátika.
“APFTL servisu hamutuk ho OXFAM realiza dialogu ne’e tanba ita hakarak oinsa joven sira ou sira ne’ebe mak iha preokupasaun kona-ba asuntu mudansa klimatika nian atu hato’o sira nia preokupasaun sira, oinsa ita bele hamenus impaktu husi mudansa klimátika”.Dehan Representante Presidente Alumni Parlamento Foinsa’e Timor-Leste, Ambrózio Colo ba Jornalista sira iha, Orchild room Timor plaza, Kuinta-Feira(21/03/2024)
Iha fatin hanesan, Panelista Sekretariu Estadu Floresta(SEF), Fernandino Vieira da Costa konsidera papel juventude importante hodi asegura no fo nia hanoin kona-ba problema mudansa klimátika ne’ebe akontese iha regional no internasional.
“Ha’u mai partisipa iha serimonia ne’e atu fahe hanoin ruma kona-ba politika IX governu liliu sekretariu estadu floresta, ministériu agrikultura pekuaria no peska, aprova programa hamutuk sanulu resin haat, no sub-programa hamutuk 25 ne’ebe mak sei hala’o durante tinan lima(5) nia laran husi programa sira ne’ebe ligadu ho mudansa klimatika iha regional no mundial”.Tenik nia
Sekretariu Estadu ne’e haktuir mós katak loron 21 de marsu sai hanesan loron mundial ba Floresta no Timor-Leste foin selebra dala-1, husi selebrasaun ne’e ho objetivu atu tau importansia ba sektor floresta nian iha Timor-Leste.
Ohin loron 21 de marsu de 2024, Timor-Leste selebra loron mundial floresta primeiru iha Timor-Leste, selebrasaun loron mundial ne’ebe mak selebra ne’e bazeia ba resolusaun governu no.7/2012 hodi deklara sai loron floresta mundial, no Timor-Leste foin mak selebra dala-1 ho objetivu atu fo konsiénsia no importánsia ba setor floreta”nia informa.
Atividade dialogu ne’e partisipa husi Sekretariu Estadu Floresta (SEF Fernandino Vieira da Costa, OXFAM, UNDP, NDA no ANLA inklui membru APFTL sira.
Jornalista : Marcela Mery da Costa